OMUTWE OGURI AHA MUNAARA | BUZIMA SITAANE ARIHO?
Mbwenu shi Sitaane Ariho?
“Nkakurira omuri El Salvador. Ku naabaire ngomera maawe akaba angira ngu; Omuregi naija kukukwata! Kandi nkaba mugarukamu nti: Murekye aije! Nkaba ninyikiiririza omuri Ruhanga beitu atari Sitaane.”—ROGELIO.
Noikirizana na Rogelio? Omu nshonga eziri ahaifo n’eha ei orikureeba ngu ehikire?
Sitaane ti waabuzima kureka n’akamanyiso k’ekibi.
Sitaane ariho, kwonka tarikufayo aha birikukwata aha bantu.
Sitaane n’ekihangirwe ky’omwoyo eky’amaani ekirikuteeraho kuhabisa abantu.
Buri emwe aha nshonga ezi hariho abantu baingi abarikugishagika. Mbwenu shi ni kikuru kumanya enshonga ehikire? Sitaane ku araabe atariho, abo abarikwikiriza ngu ariho babeihirwe. Sitaane ku araabe ariho kwonka atarikufayo kumanya ebirikukwata aha bantu, baingi nibaba nibatiinira busha. Kwonka, Sitaane ku araabe ari omubeihi orikuhabisa abantu, nikimanyisa ngu n’ow’akabi kukira oku baingi barikuteekateeka.
Ka tureebe oku Ebyahandiikirwe Ebirikwera birikugarukamu ebibuuzo ebi: Sitaane n’oha? N’akamanyiso k’ekibi nari n’ekihangirwe ky’omwoyo? Ku araabe ari ekihangirwe ky’omwoyo, n’ow’akabi ahariiwe? Ku kiraabe nikwo kiri, noobaasa kumwerinda ota?