Nooreeberera Engabo Yaawe Mpango ey’Okwikiriza?

1-2. (a) Kurugiirira aha Abaefeso 6:16, ahabw’enki twine kugira “engabo y’okwikiriza” empango? (b) Ni bibuuzo ki ebi turikuza kugarukamu?

OINE “engabo y’okwikiriza” mpango? (Shoma Abaefeso 6:16.) Hatariho kubangaanisa ogiine. Nk’engabo mpango erikurinda omubiri gwona, okwikiriza kwawe nikukurinda eby’obushambani, obushaarizi, n’ebikorwa ebindi ebiri omu nsi egi embi ebitarikuhikaana n’emitindo ya Ruhanga.

² Kwonka, turi omu ‘biro by’emperu’ kandi okwikiriza kwaitu nikwija kugumizamu nikugyezibwa. (2 Tim. 3:1) Noobaasa kuguma nooshwijuma ota engabo yaawe y’okwikiriza kuhamya ngu ehami? Kandi noobaasa kuguma okwaitse ota engabo yaawe y’okwikiriza okagihamya? Ka tutungye eby’okugarukamu by’ebibuuzo ebi.

SHWIJUMA ENGABO YAAWE N’OBWEGYENDESEREZA

3. Abaserukare bakaba bareeberera bata engabo zaabo, kandi n’ahabw’enki?

³ Ira, abaserukare bakaba nibakira kukoresa engabo ezibambirweho oruhu. Abaserukare bakaba bata oiro aha ngabo zaabo kurinda oruhu, n’okurinda ebyoma ebiri aha ngabo kutakyereenya. Omuserukare ku yaabaire areeba ngu engabo ye esiisikaire, akaba agihuunduza, kugira ngu butoosha abe ayetebeekanisiize okurwana. Eky’okureeberaho eki nikikwata kita aha kwikiriza kwawe?

4. Ahabw’enki oine kuguma nooshwijuma engabo yaawe y’okwikiriza, kandi eki oine kukikora ota?

⁴ Nk’abaserukare ba ira, nooba oine kushwijuma engabo yaawe y’okwikiriza butoosha kugira ngu obe oyeteekateekiire okurwana. Naitwe Abakristaayo turi omu rutaro rw’eby’omwoyo kandi abazigu baitu nibatwariramu emyoyo emibi. (Efe. 6:10-12) Tihaine ondiijo orikubaasa kureeberera engabo yaawe. Noobaasa kuhamya ota yaaba oyetebeekanisiize okugyezibwa? Okubanza, oine kushaba Ruhanga kukuhwera. Reero, nooba oine kukoresa Ekigambo kya Ruhanga kukuhwera kwereeba nk’oku Ruhanga arikukureeba. (Heb. 4:12) Baibuli neegira eti: “Yesigye [Yehova] n’omutima gwawe gwona, orekye kwegamira okwetegyereza kwawe ahabwawe.” (Enf. 3:5, 6) Oine ekyo omu biteekateeko, noobaasa kushwijuma ebi oherize kucwamu juba. Nk’eky’okureeberaho, oraatungireho oburemeezi bw’amaani omu by’entaatsya? Mbwenu shi okaijuka okuraganisa kwa Yehova okuri omu Abaheburaayo 13:5 okurikugira ngu “tindikutsigaho, kandi tindikuhemukaho na kakye”? Mbwenu shi okuraganisa okwo kukakureetera kuhamya ngu Yehova naija kukuhwera? Ku kiraabe kiri kityo, ekyo nikyoreka ngu nooguma nooreeberera engabo yaawe y’okwikiriza eguma eri omu mbeera nungi.

5. Waashwijuma okwikiriza kwawe noobaasa kutangaara kureeba ki?

⁵ Waashwijuma gye okwikiriza kwawe noobaasa kutangaara. Noobaasa kureeba obweremwa bwawe obu otwire otarikureeba. Nk’eky’okureeberaho, noobaasa kushanga ngu okwerarikirira ekirenga, ebishuba, nari okutamwa bituubize okwikiriza kwawe. Eki ku kiraabe kyakuhikireho, noobaasa kurinda ota okwikiriza kwawe kuteeyongyera kusiisikara?

YERINDE OKWERARIKIRIRA EKIRENGA, EBISHUBA, N’OKUTAMWA

6. Ni by’okureeberaho ki eby’okwerarikirira okurungi?

⁶ Okwerarikirira okumwe ni kurungi. Nk’eky’okureeberaho, ni kirungi kwerarikirira aha bikwatiraine n’okushemeza Yehova na Yesu. (1 Kor. 7:32) Waakora ekibi ky’amaani, nooyerarikirira aha bikwatiraine n’okugaruraho omukago gwawe na Ruhanga. (Zab. 38:18) Nitubaasa kwerarikirira aha bikwatiraine n’okushemeza abu turi nabo omu bushwere, okureeberera ab’omu maka gaitu n’okuhwera ab’eishe-emwe bagyenzi baitu.​—1 Kor. 7:33; 2 Kor. 11:28.

7. Kurugiirira aha Enfumu 29:25, ahabw’enki tutaine kutiina abantu?

⁷ Kwonka, okwerarikirira ekirenga nikubaasa kushiisha okwikiriza kwaitu. Nk’eky’okureeberaho, nitubaasa kuba nitukira kwerarikirira aha bikwatiraine n’eby’okurya birikumara n’eby’okujwara. (Mat. 6:31, 32) N’ahabw’ekyo kubaasa kutuubya aha kwerarikirira okwo, nitubaasa kucwamu kuta omutima aha kusherura ebintu. Nitubaasa n’okugira omutima gw’okukunda esente. Twaikiriza ekyo kubaho, okwikiriza kwaitu omuri Yehova nikwija kutuuba, kandi nitwija kutunga akabi k’amaani omu by’omwoyo. (Mak. 4:19; 1 Tim. 6:10) Nari nitubaasa kugira okwerarikirira okundi okutarikwetengyesa okw’okwenda kusiimwa abandi. N’ekirikurugamu nitubaasa kutiina ngu abantu nibaija kutujuma nari batuhiiganise omu mwanya gw’okwetantara kugwisa kubi Yehova. Kubaasa kwerinda akabi aka, twine kweshengyereza Yehova kutuha okwikiriza n’obumanzi oburikwetengyesa kusingura embeera egi.​—Shoma Enfumu 29:25; Luk. 17:5.

8. Tushemereire kutwaza tuta baatugambaho ebishuba?

⁸ Sitaane, “ishe w’ebishuba” naakoresa abari ahansi y’obushoboorozi bwe kujanjaaza ebishuba bye ebi arikugamba ahari Yehova n’ab’eishe-emwe na banyaanyazi-itwe. (Yoh. 8:44) Nk’eky’okureeberaho, abeehagwire aha mazima, nibashohoza ebishuba kandi nibahindahindura ebihikire ebirikukwata aha kibiina kya Yehova kurabira aha mikura, tiivi, n’eby’amakuru ebindi. Ebishuba ebyo ni bimwe aha ‘myambi y’omuriro yoona ey’omubi.’ (Efe. 6:16) Twine kutwaza tuta omuntu yaaba naatugambira ebishuba nk’ebyo? Twine kubyangira! Ahabw’enki? Ahabw’okugira ngu nitwikiririza omuri Yehova, kandi nitwesiga ab’eishe-emwe. Buzima, twine kwetantara kuhurizana n’abeehagwire aha mazima boona. Titurikwikiriza omuntu weena nari ekintu kyona, otwariiremu n’okwenda kumanya ebi barikwikiriza kutureetera kuhurizana nabo.

9. Okutamwa nikubaasa kuturugiramu ki?

⁹ Okutamwa nikubaasa kutuubya okwikiriza kwaitu. Titurikubaasa kwehuzya oburemeezi bwaitu. Ekyo twakikora nikyoreka ngu tituri bantu b’obujunaanizibwa. Kandi obumwe nitubaasa kuhurira twatamwa embeera zaitu. Kwonka titwine kuguma nituteekateeka aha buremeezi bwaitu obwire bwona. Twakora tutyo, nitubaasa kuremwa kureeba amatsiko marungi agu Yehova atuhaire aha biro by’omumaisho. (Kush. 21:3, 4) Okugira enyehurira z’okutamwa nikibaasa kutumaramu amaani, reero turekyere aho kuheereza Yehova. (Enf. 24:10) Kwonka ekyo tikiine kutuhikaho.

10. Nooyegyera ki aha baruha ei munyaanyazi-itwe omwe yaahandiikire?

¹⁰ Yetegyereze oku munyaanyazi-itwe omuri United States yaarinzire okwikiriza kwe arikureeberera iba owaabaire arwaire. Omu baruha ei yaahandiikiire ofiisi enkuru, akahandiika ati: “Embeera yaitu neetureetera amaganya n’okutamwa obumwe, kwonka amatsiko gaitu gahami. Ninsiima munonga obutumwa obu tutwire nitutunga kuhamya okwikiriza kwaitu n’okutugaruramu amaani. Buzima nitwetenga obuhabuzi obu n’okugumibwa. Nibutuhwera kugumizamu nituheereza Yehova n’okugumira okugyezibwa oku Sitaane arikutureetera.” Nitwegyera ahari munyaanyazi-itwe ogu ngu nitubaasa kusingura enyehurira z’okutamwa! Mu muringo ki? Reeba okugyezibwa kwawe nk’okurikuruga ahari Sitaane. Manya ngu Yehova niwe bukomooko bw’okuhuumurizibwa. Kandi siima eby’okurya by’omwoyo ebi arikutuha.

11. Kubaasa kureeba yaaba okwikiriza kwaitu kuhami, nitubaasa kwebuuza bibuuzo ki?

¹¹ Mbwenu shi nooreeba ngu engabo y’okwikiriza kwawe eine kwongyera kuhamibwa? Omu meezi makye ag’enyima, obaasize kwetantara okwerarikirira ekirenga? Obaasize kwetantara kuhurikiza abeehagwire aha mazima nari kuhakana nabo waahurira ebishuba ebi barikujanjaaza? Kandi shi obaasize kusingura okutamwa? Ku kiraabe kiri kityo, nikimanyisa ngu okwikiriza kwawe kuri gye. Kwonka twine kuguma twerinzire ahakuba Sitaane aine ebikoreso ebindi ebi arikukoresa kuturwanisa. Hati ka tureebe kimwe aharibyo.

YERINDE OMUTEGO GW’OKUSHERURA EBY’OBUGAIGA

12. Eby’obugaiga nibibaasa kutureetera kukora ki?

¹² Eby’obugaiga nibibaasa kutuhuzya bituremese kufayo aha ngabo yaitu y’okwikiriza. Entumwa Paulo akagira ati: “Tihariho muserukare oza kurwana, akeetaasya omu mirabanamu ey’amagara aga, ngu asiimwe owaamuhandiikiire obuserukare.” (2 Tim. 2:4) Nangwa, omuserukare Omurooma, akaba atarikwikirizibwa kwejumba omu by’obushuubuzi eby’omuringo gwona. Niki ekirikubaasa kubaho omuserukare yaayanga kukuratira obuhabuzi obwo?

13. Ahabw’enki omuserukare atashemereire kwejwanzya omu by’obushuubuzi?

¹³ Teekateeka ahari eki. Ka tugire ngu abaserukare baamara akasheeshe koona barikwetendeka kwega kukoresa gye ebisyo byabo, kwonka omwe aharibo tiyaazayo kutendekwa. Omuserukare ogwo we yaaza omu tauni kuguza eby’okurya. Omu mwabazyo, abaserukare bashwijuma eby’okwerindisa byabo, kandi batyaza n’ebisyo byabo. Kwonka ogwo oine eduuka we yaamara obwire arikutebeekanisa eby’okurya by’okuguza eizooba erindi. Akasheeshe akarikukurataho, eihe ry’abazigu baabo ribataahirira kitaraariire. Nooteekateeka ngu ni muserukare ki orikwija kukora gye, kandi akasiimwa omukuru w’abaserukare? Kandi n’oha omuri abo ou waakwenzire ngu akwemerere aha rubaju? N’omuserukare otaire omutima aha kwetebeekanisa, nari obaire ahugire arikuguza eby’okurya?

14. Itwe abaserukare ba Kristo, niki eki turikutwara nka kikuru?

¹⁴ Nk’abaserukare barungi, titurikwenda kwikiriza ekintu kyona kutureetera kwehuzya ekigyendererwa kyaitu ekikuru, okukorera okusiimwa Bakama baitu Yehova na Kristo. Ekyo nitukireeba nk’eky’omuhendo okukira ekintu kyona eki turikubaasa kutunga omu nsi ya Sitaane egi. Twine kuhamya ngu twine obwire n’amaani agarikwetengyesa kuheereza Yehova n’okurinda engabo yaitu y’okwikiriza n’eby’okwerindisa ebindi kuguma omu mbeera nungi.

15. Paulo akatuha kurabura ki, kandi ahabw’enki?

¹⁵ Butoosha twine kuguma tweteekateekire! Ahabw’enki? Entumwa Paulo akarabura ngu abamaririire “kuba abatungi” nibaija ‘kuhaba barugye omu kwikiriza.’ (1 Tim. 6:9, 10) Ekigambo ‘okuhaba’ nikyoreka ngu nitubaasa kuhuga twaba nituteeraho kutunga ebintu ebirikwetengyesa. Nitubaasa kushanga tutaire omutima gwaitu aha “kwetenga kwingi kw’obushema okurikushiisha.” Omu mwanya gw’okwikiriza okwetenga okwo kutaaha omu mitima yaitu, twine kukimanya ngu Sitaane naakoresa emitego egyo kushiisha okwikiriza kwaitu.

16. Ebiri omuri Mako 10:17-22 bishemereire kutuhwera kuteekateeka ahari bibuuzo ki?

¹⁶ Kandi shi ku twakuba twine esente ezirikutubaasisa kugura ebintu bingi? Mbwenu shi kigwire kugura ebintu ebi turikwenda, kwonka buzima ebitarikwetengyesa? Nikibaasa kuba kitagwire. Kwonka teekateeka aha bibuuzo ebi: N’obu twakuba twine esente z’okugura ebintu, mbwenu shi twine obwire n’amaani g’okureeberera ebintu ebyo? Kandi shi, nitubaasa kutandika kukunda ebintu ebyo ekirenga? Mbwenu shi okukunda ebintu byaitu nikibaasa kutureetera kuba nk’omutsigazi owaayangire kukuratira Yesu kubaasa kwongyera aha ku arikuheereza Ruhanga? (Shoma Mako 10:17-22.) Ka kyakubaire kirungi kworobya embeera zaitu tukamara obwire bwaitu obw’omuhendo n’amaani gaitu turikukora ebi Ruhanga arikukunda!

GUMA OKWAITSE ENGABO YAAWE Y’OKWIKIRIZA

17. Niki eki tutashemereire kwebwa?

¹⁷ Titwine kwebwa ngu turi omu rutaro, kandi ngu twine kuba tweteekateekire kurwana buri izooba. (Kush. 12:17) Ab’eishe-emwe na banyaanyazi-itwe tibarikubaasa kutukwatira engabo yaitu ey’okwikiriza. Buri omwe aine kuguma naarinda okwikiriza kwe.

18. Ahabw’enki abaserukare aba ira baabaire bakwata engabo zaabo bakazihamya?

¹⁸ Ira, omuserukare akaba atunga ekitiinisa ahabw’okuba emanzi omu rutaro. Kwonka akaba ahemuka yaagaruka omuka ataine ngabo ye. Omunyabyafaayo Omurooma orikwetwa Tacitus akahandiika ati: “Omuserukare ku yaabaire agaruka ataine ngabo ye, okwo kukaba kuba okuhemuka kw’amaani.” Egi n’emwe aha nshonga ahabw’enki abaserukare baabaire bakwata engabo zaabo bakazihamya.

19. Nitubaasa kuhamya tuta engabo yaitu y’okwikiriza?

¹⁹ Nitukwata engabo yaitu y’okwikiriza tugihamya turikuguma nituza omu nteerane z’Ekikristaayo tutarikwosha, kandi turikugambira abandi eiziina rya Ruhanga, Yehova n’Obukama bwe. (Heb. 10:23-25) Kandi, nitushoma Ekigambo kya Ruhanga buri izooba, tumushaba n’okutuhwera kugyendera aha bi twashoma omuri byona ebi turikukora. (2 Tim. 3:16, 17) Reero obwo, tihariho ky’okurwanisa eki Sitaane araakorese ekiraatureeteho akabi k’obutwire bwona. (Isa. 54:17) Engabo yaitu mpango ey’okwikiriza neija kuturinda. Nitwija kwemerera tuhami, turikukora hamwe n’ab’eishe-emwe na banyaanyazi-itwe. Kandi nitwija kukora ekirikukira aha kusingura okurwana, kureka nitwija n’okugira ekitiinisa ky’okuba aha rubaju rwa Yesu yaaba naasingura orutaro arikurwanisa Sitaane n’abakuratsi be.​—Kush. 17:14; 20:10.