Kuratira eky’Okureeberaho Ekyatairweho Yesu
1. Ni ky’okureeberaho ki eki Yesu yaataireho?
1 Twaba nitwejumba omu murimo gw’okuhindura abantu abeegi, tugume nitwijuka ngu eky’okureeberaho kyaitu nikibaasa kuhiga abarikutureeba. Yesu akeegyesa omu bigambo n’omu bikorwa. Abaabaire bamureeba bakaba bareeba ngu aine omujinya, ngu naakunda abantu, ngu aine ekyetengo ky’okweza eiziina ry’Ishe, kandi ngu amaririire kuhikiiriza ebi Ishe akunda.—1 Pet. 2:21.
2. Ni mu miringo ki ei eky’okureeberaho kyaitu kirikubaasa kuhiga abarikubuurira naitwe?
2 Twaba Nitubuurira Enju aha Ndiijo: Nka Yesu, eky’okureeberaho kyaitu nikihiga abo abarikubuurira naitwe. Ababuurizi abasya kandi abamazire obwire bukye omu kubuurira abarikutureeba nitwejumbira kimwe omu kubuurira nibaija kuteekateeka aha ku bo barikukwejumbamu. Ku barikureeba okushemererwa oku turikuba twine n’oku turikufayo aha bandi, nibaija kwijuka obukuru bw’okworeka emitwarize egyo baaba nibabuurira. Ku barikureeba obweziriki bwaitu omu kukoresa Ebyahandiikirwe, omu kugarukayo aha barikwenda kumanya ebirikukiraho, n’omu kushomesa abantu Baibuli, nibaija kugira omujinya gw’okukora nk’itwe.
3. Eky’okureeberaho kyaitu nikibaasa kita kwegyesa abeegi ba Baibuli, kandi nibabaasa kwega ki?
3 Twaba Nitwegyesa Abantu Baibuli: Abu turikwegyesa Baibuli, okukira munonga nibaija kureeba emicwe yaitu. Nk’eky’okureeberaho, n’obu turaabe nitubaasa kubashoboororera obukuru bw’okwetebeekanisiza okwega, obw’okusherura ebyahandiikirwe, n’obw’okuta omusitaari aha nshonga enkuru, nibaija kureeba yaaba itwe twetebeekaniise. (Rom. 2:21) Twakwata eshaaha ezi turikuba turagaine kushoma naabo, tibarikwija kurahuka kwikiriza ebindi bintu kutaahataaha omu kwega kwabo okwa Baibuli. Hatariho kubanganisa, nibaija n’okureeba okwefiisiriza kwaitu omu kubuurira, hamwe n’okwikiriza kwaitu okuhamire. Tikirikutangaaza okureeba ngu abeegi abarikwegyesibwa abo abarikukuratira gye eky’okureeberaho kya Yesu butoosha nibahinduka ababuurizi b’amakuru marungi abeeziriki.
4. Twaba turi omu nteerane z’ekibiina, eky’okureeberaho kyaitu nikyegyesa ki?
4 Twaba Turi omu Nteerane z’Ekibiina: Abo boona abari omu kibiina Ekikristaayo, eky’okureeberaho kyabo nikyegyesa baaba bari omu nteerane z’ekibiina. Abasya abarikutandika kwija omu nteerane nibagasirwa eky’okureeberaho kirungi eki barikureeba omu kibiina. Nibaija kureeba rukundo y’Ab’eishe-emwe, obumwe bw’Ekikristaayo, enjwara hamwe n’endebeeka nungi. (Zab. 133:1) Eky’okureeberaho kyaitu ky’okwija omu nteerane z’ekibiina butoosha hamwe n’okuturikworeka okwikiriza kwaitu twaba tuzirimu nabyo nibyija kureebwa. Omugyenyi owaizire omuri rumwe aha nteerane zaitu, akareeba oku omwishiki muto yaarahukire kubona ekyahandiikirwe omuri Baibuli ye n’oku yaakuratiire kirikushomwa. Eky’okureeberaho ky’omwishiki ogwo kikamureetera kushaba kushomesibwa Baibuli.
5. Ahabw’enki tutashemereire kutwara eky’okureeberaho kyaitu nk’ekitari kikuru?
5 Ebyahandiikirwe nibituhiga kukuratira eky’okureeberaho kirungi ekya bataahi baitu. (Fil. 3:17; Heb. 13:7) N’ahabw’ekyo, tushemereire kwijuka ngu twakuratira eky’okureeberaho kya Yesu, abandi nibaija kukireeba kandi kibahige omu muringo murungi. Turikwijuka ekyo, ka tute aha mutima ebigambo ebiri omu 1 Timoseo:416: “Oyerinde iwe wenka kandi n’omu bi orikwegyesa.”