Akabokisi K’ebibuuzo

◼ Tushemereire kujwara tuta twaba nitutaayaaya omu myanya erikukorerwamu emirimo ya Yehova?

Omu nsi yoona, Ebyombeko by’Obukama, Ebyombeko by’Enteerane Empango, za Beseeli, na ofiisi z’amataagi n’emyanya y’omutaano ehairweyo kukorerwamu emirimo ya Yehova. Nibireebeka gye, bicumire gye, bitebeekanisiibwe gye, kandi nibihaisa ekitiinisa. Hariho entaaniso mpango munonga ahagati y’ebyombeko ebyo n’ebirikureebwa omu busingye bwa Sitaane. Abarikutaayaaya omu myanya nk’egyo nabo bashemereire kureebwa nk’abantu ba Yehova, abo abarikukora ebi akunda.

Nk’Abakristaayo, “nitweyoreka nk’abashemereire kuba abaheereza ba Ruhanga” omu miringo yoona, otwariiremu okujwara ebijwaro ebishemeire hamwe n’okweboneza. (2 Kor. 6:3, 4) Tushemereire n’okworeka emicwe mirungi. Obwire bwona, ebi turikujwara n’oku turikweboneza bishemereire kworeka ekitiinisa ky’abo abahikire kuba abaheereza ba Yehova Ruhanga. Eki tushemereire kukikora namunonga twaba nituza kutaayaaya aha ofiisi enkuru omuri New York n’aha za ofiisi z’amataagi omu nsi yoona.

Omu kugamba aha bukuru bw’okujwara n’okweboneza gye, akatabo Organized to Do Jehovah’s Will nikagamba aha bukuru bw’okuba abeecumi, okujwara gye, n’okweboneza gye twaba nituza omu kubuurira n’omu nteerane z’Ekikristaayo. Reero aha rupapura 138, akacweka 3 nihagira hati: “Ijuka, eiziina Beseeli nirimanyisa ‘Enju ya Ruhanga.’ N’ahabw’ekyo, tihashemereire kubaho entaaniso n’oku turikujwara, oku turikweboneza n’oku turikutwaza twaba nituza omu nteerane z’okuramya omu Kyombeko ky’Obukama.” Omutindo ogu ogw’ahaiguru gushemereire kukuratirwa ababuurizi b’Obukama abarikutaayaaya aha Beseeli abarikuruga haihi nayo n’abarikuruga hare. Omu kukora atyo, orikutaayaayayo naayoreka ngu naasiima kandi ngu naaha omwanya ogwo ekitiinisa.​—Zab. 29:2.

Ebi turikujwara bishemereire kututaanisaho nk’abo “abeeyeta abarikutiina Ruhanga.” (1 Tim. 2:10) Enjwara nungi n’okweboneza gye nibihwera abandi kuha ekitiinisa okuramya okw’amazima okwa Yehova. Kwonka, kyetegyereziibwe ngu bakye aha b’eishe-emwe n’abanyaanyazi-itwe abarikutaayaaya omu myanya erikukorerwamu emirimo ya Yehova nibajwara ebijwaro ebitashemereire Bakristaayo, obumwe emyenda erikureeberwamu. Tihariho obu Omukristaayo ashemereire kujwara ebijwaro nk’ebyo. Omu nshonga egi nk’oku kiri omu bintu ebindi byona omu magara gaitu g’Obukristaayo, nitwenda kuguma nitukuratira emitindo y’ahaiguru erikutaanisaho abantu ba Ruhanga aha b’ensi, tukore byona okuhaisa Ruhanga ekitiinisa.​—Rom. 12:2; 1 Kor. 10:31.

N’ahabw’ekyo, waaba nootaayaaya aha ofiisi enkuru omuri New York nari aha ofiisi y’eitaagi yoona, yebuuze oti: ‘Oku njwaire n’oku ndikureebeka nibyoreka obwecumi, kandi nibihaisa ekitiinisa omwanya ogu ndikuza kutaayaayamu? Nibihaisa ekitiinisa Ruhanga ou ndikuramya? Endebeeka yangye neija kuteeza abandi entsibo?’ Omu njwara n’omu ndebeeka yaitu, butoosha ka “tusiimise enyegyesa ya Ruhanga Omujuni waitu omuri byona”!​—Tito 2:10.