Nookoresa Byona Ebiri omuri Watchtower ey’Okugaba omu Kubuurira?

¹ Munyaanyazi-itwe ku yaaherize kushoma The Watchtower eya Jenwari 1, 2008, yaagira ati: “Tindayeziringe kugikoresa omu kubuurira!” Nookira kushwijuma ebirikuba biri omuri Watchtower ez’okugaba omu kubuurira, kandi otaireho oburyo kureeba oku oraazanjure gye omu kubuurira?

² “Eki Turikwegyera Ahari Yesu”: Obundi oshangire ekicweka eki kirikuhwera omu kutandika kwegyesa abantu Baibuli. Ku oraabe otakakikoreise, teeraho kushomera ou orikubuurira omutwe gw’ekicweka eki, reero omworekye eki Yesu yaagambire aha nshonga egyo nk’oku kirikworekwa omu kacweka k’okubanza. Ku araayende kumanya ebirikukiraho, teeraho kweyongyera kugaaniira nawe orikukoresa emitwe emikye, eri omu muringo gw’ebibuuzo ebirikuhiga omuntu kugira eki yaagamba. Mushabe kugira eki yaagamba aha kibuuzo. Ku haraabe hariho ebishushani ebirikuhikaana n’ekibuuzo ekyo, bishoboororeho omu bigufu reero muze aha kacweka akandi. Nimubaasa kuheza kimwe kya kabiri ky’ebiri ahansi y’omutwe ogwo, reero ku oraagarukeyo mumariirize ebyatsigara. Tebeekanisa kugumizamu okwega nawe Baibuli orikukoresa akatabo Eki Baibuli Erikwegyesa.

³ “Ebirikureetera Amaka Okushemererwa”: Emitwe egi erikwizira omu magaziini egi bwanyima y’ameezi ashatu, egyendereire kuhwera abashaija, abakazi n’abazaire kureeba oku barikubaasa kugyendera aha misingye ya Baibuli baaba baine oburemeezi oburikushiisha obusingye bw’eka. Noobaasa n’okukoresa emitwe egi kuhwera abatari Bajurizi ba Yehova kureeba obwengye oburi omu Baibuli.​—2 Tim. 3:16, 17.

⁴ Ebicweka eby’Abato: Ebiri ahansi y’omutwe “Eby’Abaana Baitu Abato” nibihwera abarikushoma magaziini egi kwetegyereza ebimwe ebyabaireho ebihandiikirwe omu Baibuli hamwe n’ei birikushangwa. Noobaasa kubikoresa kuhwera eminyeeto ei orikushanga omu kubuurira kureeba obukuru bw’okwega Ekigambo kya Ruhanga. (Zab. 119:9, 105) Waaba noogamba n’abazaire, noobaasa kubooreka ebiri ahansi y’omutwe “Yegyesa Abaana Baawe” ogurikwija omurundi gumwe omu meezi abiri. Ebi nibibaasa kuhwera abaana bato kugira ebikuru ebi baayega kuruga aha bantu abarikugambwaho omu Baibuli. Waataireho kwega n’abaana baawe aha biri ahansi y’emitwe egi?

⁵ Ebindi Ebirimu: Buri kwezi, ekicweka ekiine omutwe “Ebibuuzo by’Abashomi Baitu” nikigarukamu ekibuuzo eki abatari Bajurizi ba Yehova barikubaasa kubuuza. Noobaasa kukoresa ebiri ahansi y’omutwe ogu waaba noogaba zaamagaziini enju aha nju. Ekicweka ekiine omutwe “Ebaruha Kuruga . . .” nikiba nikigamba aha buremeezi obu abamiisani n’abandi babuurizi barikubugana omu kubuurira kwabo. Ebiri ahansi y’emitwe egi nibibaasa kuhwera abarikwenda kumanya ebirikukiraho kumanya ngu amakuru marungi gariyo nigabuurirwa omu nsi yoona, omu kuhikiiriza akamanyiso k’okubaho kwa Kristo.​—Mat. 24:3, 14.

⁶ Omutwe “Yirira Haihi na Ruhanga,” ogurikwija buri kwezi ogurikuruga omu kushoma Baibuli okw’omu Ishomero ry’Obuheereza, nigubaasa kuhiga ab’emitima mirungi kwenda kwega ebirikukwata ahari Yehova. Omutwe “Tooreza Okwikiriza Kwabo,” ogurikwija emirundi ena omu mwaka, gutebeekanisiibwe kuhwera abantu kwetegyereza ebyabaireho ebihandiikirwe omu Baibuli, abantu abarikugambwaho omu Baibuli​—ebi baabaire nibakunda, oburemeezi obu baatungire, hamwe n’okwikiriza kwabo.

⁷ Ka nitushemererwa munonga buri kwezi okutunga The Watchtower etebeekanisiibwe kukoresibwa omu kubuurira! Omu muringo gwona, ka twetegyereze gye ebigirimu kandi tubaase kugikoresa gye omu kubuurira.