Noobaasa Kuba Omwegyesa!

1. Ni mugisha ki ogw’omutaano ogu buri mubuurizi w’Obukama aine?

¹ Ekintu kimwe aha birikureeta okushemererwa omu kubuurira n’okwegyesa omuntu amazima. Okumureeba naayeyongyera kukunda amakuru g’Obukama n’okumuhwera kwirira haihi n’Omutegyeki wa byona n’ekintu eki tushemereire kutwara nk’eky’omuhendo. (Yak. 4:8) Okwegyesa omuntu orikwenda kumanya amazima hamwe n’okumureeba naatandika kukora empindahinduka z’amaani omu mitwarize ye, omu ndebeeka n’omu micwe ye kishemereire kuba ekigyendererwa kya buri mubuurizi w’Obukama weena.​—Mat. 28:19, 20.

2. Ahabw’enki abamwe nibabaasa kutiina kushomesa omuntu Baibuli, kandi n’enki ekiraije kubahwera kusingura okutiina okwo?

² Yesigye Yehova: Omu bwire obw’enyima, abaheereza abeesigwa bakeereeba nk’abaabaire batarikubaasa kuhikiiriza omurimo ogu Yehova yaabaire abahaire. Okwesiga Yehova Ruhanga kukabaasisa Musa, Yeremia, Amosi, n’abandi bantu ba butoosha kusingura okubangaanisa oku baabaire baine ngu tibarikubaasa kukora omurimo ogwabahairwe. (Kur. 4:10-12; Yer. 1:6, 7; Amo. 7:14, 15) N’entumwa Paulo ‘akagira obumanzi.’ Ata? Akagira ngu kikabaasika ‘ahabw’okuhwerwa Ruhanga waitu.’ (1 Tes. 2:2) Eego, twena nitubaasa kwesiga Yehova kutuhwera kutunga obwengye, n’amaani agu turikwetenga okwegyesa omwegi wa Baibuli akeeyongyera kukura omu by’omwoyo.​—Isa. 41:10; 1 Kor. 1:26, 27; 1 Pet. 4:11.

3, 4. Ni kutendekwa ki okurikutuhwera omu kwegyesa Ekigambo kya Ruhanga?

³ Ikiriza Kutendekwa: Omwegyesa waitu Omukuru, Yehova Ruhanga, naatutendeka kurabira omu ntebeekanisa ey’okwegyesibwa Baibuli obutoosha, kugira ngu tubaase kuba abeegyesa barungi. (Isa. 54:13; 2 Tim. 3:16, 17) Ikiriza okutendekwa oku, orikukora kyona eki orikubaasa kukoresa buri kagisha kwongyera kwetegyereza Ebyahandiikirwe kandi yongyera kuboneza omuringo ogu orikwegyesamu amazima ga Baibuli. N’obu eki, okukira munonga kiraabe nikikorerwa omu Ishomero ry’Obuheereza hamwe n’omu Ruteerane rw’Obuheereza, enteerane z’ekibiina zoona nizitutendeka kwegyesa Ekigambo kya Ruhanga.

⁴ Teeraho kwega emiringo eyorobi ey’okwegyesamu amazima ag’omunda. Ekitabo Ministry School aha rupapura 227 nikishoboorora kiti: “Oshemereire kwetegyereza gye ebi orikuza kwegyesa waaba nooyenda ngu abandi babyetegyereze.” Okugira eki twagarukamu omu nteerane nikituhwera okuguma nitwijuka enshonga nkuru kugira ngu tuzikorese omu biro by’omumaisho. N’ahabw’ekyo tebeekanisa gye, obaase kugira obwesigye omu kwegyesa kwawe.

5. Ni kutendekwa ki okundi oku twine omu kibiina okurikutuhwera kweyongyera kwegyesa gye?

⁵ Abakristaayo boona, hatariho kubangaanisa bakeegyera ahari bagyenzi baabo obwo barikwejumba omu murimo gw’okuhindura abantu abeegi. (Luka 10:1) Kyaba nikibaasika, buurira n’ababuurizi abarikumanya kubuurira gye, otwariiremu baapayoniya, abareeberezi, hamwe n’abareeberezi abarikutaayaayira ebibiina, waaba nooza kwegyesa omuntu Baibuli. Yetegyereze oku barikukoresa gye eby’okureeberaho ebyorobi n’ebindi ebirikushangwa omu bitabo byaitu kushoboorora amazima ga Baibuli. Bashabe kukworeka oku orikubaasa kuba omwegyesa murungi. (Enf. 1:5; 27:17) Yoreka okusiima kwawe ahabw’okutendekwa okwo okurikutuheebwa Ruhanga.​—2 Kor. 3:5.

6. N’enki ekikuru ekirikwetengwa okuba omwegyesa w’Ekigambo kya Ruhanga?

⁶ Yesigye Yehova, kandi gasirwa omu kutendeka oku arikutuha. Mushabe kukuhwera kweyongyera kwegyesa gye. (Zab. 25:4, 5) Naiwe noobaasa kutunga okushemererwa okurikuruga omu kuhwera abandi bakaba nka iwe, omwegyesa w’Ekigambo kya Ruhanga!