Entebeekanisa y’Okuhwera Amaka
1. Sabato eya buri saabiiti ekaba egasira eta amaka g’Abaisraeli
1 Okweza Sabato ekaba eri entebeekanisa ya rukundo kuruga ahari Yehova eyaabaire egasira amaka. Abaisreali bakaba bahuumura aha mirimo yaabo kibabaasisa kugira obwire kuteekateeka munonga aha burungi bwa Yehova n’omukago gwabo nawe. Abazaire bakaba bakoresa obwire obwo kwegyesa abaana baabo Ebiragiro bya Ruhanga. (Bir.6:6, 7) Ekiro kya Sabato kikaba kibaasisa abaheereza ba Ruhanga buri saabiiti kuta omutima munonga aha bintu eby’omwoyo.
2. Sabato eya ira neetwegyesa ki ahari Yehova
2 N’eky’amazima, Yehova takiragiira amaka kweza Sabato. Kwonka, ekiragiro ekyo nikitwegyesa ekintu kikuru ahari Ruhanga waitu. Ruhanga atwire naafayo aha bantu be omu by’omwoyo. (Isa 48:17, 18) Omu bunaku obu, omuringo gumwe ogu Yehova arikworekamu ngu naafayo aha baheereza be n’okubateeraho entebeekanisa y’Okuramya okw’Eka.
3. Okuramya okw’Eka kwine mugasho ki
3 Okuramya okw’Eka Kwine Mugasho Ki Omuri Jenwari 2009, Okwega Ekitabo okw’Ekibiina kukatandika kubaho aha izooba rimwe n’Eishomero ry’Obuheereza hamwe n’Oruteerane rw’Obuheereza. Enshonga emwe eyaatumire empindahinduka egi neebaho n’okwenda kuhwera amaka kuhamya omukago gwabo na Yehova barikugira eizooba ry’okwegyeraho nk’eka buri saabiiti. Buri ka ekahigwa kugira okwega okw’eka aha izooba eryabaire riri ery’okwega ekitabo okw’ekibiina kyaba nikibaasika, kandi bakakoresa obwire obwo kwega n’okuhikaanisa ebiteekateeko aha biri omu Baibuli barikubihikaanisa n’ebyetengo by’eka yaabo.
4. Mbwenu shi Okuramya okw’Eka kushemereire kutwara eshaaha emwe yonka Shoboorora.
4 Okubaasa kuza omu ruteerane rw’Okwega Ekitabo okw’Ekibiina, tukaba twine kujwara, kugyenda, n’ebindi nk’ebyo. Baingi ahariitwe, okubaasa kuhika omu ruteerane orwo orw’eshaaha emwe kikaba kitutwarira obwire bwingi. Ahabw’empindahinduka egyo, eizooba eryabaire riri ery’okwega ekitabo okw’ekibiina hati nituramizaho Yehova nk’eka. N’ahabw’ekyo, tikugira ngu tushemereire kugira Okuramya okw’Eka omu shaaha emwe yonka. Kureka, tushemereire kuteekateeka aha byetengo by’eka yaitu tukataho obwire kurugiirira aha byetengo ebyo.
5. Mbwenu shi obwire bwona mushemereire kubumara nimuhikaanisa ebiteekateeko Shoboorora.
5 Mbwenu shi Obwire Bwona Mushemereire Kubumara Nimuhikaanisa Ebiteekateeko Omushaija n’omukazi we nari amaka againe abaana ku barikugaaniira aha Byahandiikirwe bari kumwe, nibagumyana. (Rom. 1:12) Nikibahwera kugira omukago guhamire. N’ahabw’ekyo, okugaaniira aha Byahandiikirwe nikyo kishemereire kuba kikuru omu Kuramya okw’Eka. Kwonka, buri omwe aha b’omu ka naabaasa kukoresa bumwe aha bwire obwo kweshomesa ebirikukwata ahari Baibuli. Nk’eky’okureeberaho, mwaheza kuhikaanisa ebiteekateeko, nimubaasa kuguma hamwe nk’eka buri omwe arikushoma wenka, obundi arikutebeekanisiza enteerane nari arikushoma zaamagaziini. Amaka agamwe gacwiremu kutataho tiivi omu bwire obwo bwona.
6. Okuramya okw’Eka kushemereire kwebemberwa kuta
6 Okuramya okw’Eka Kushemereire Kwebemberwa Kuta Tikugira ngu butoosha okuramya okwo kushemereire kubamu ebibuuzo n’eby’okugarukamu kwonka. Okubaasa kugira Okuramya okw’Eka okurimu omuhimbo n’okushemererwa, amaka maingi gaine entebeekanisa erikushushana n’ey’enteerane zaitu ez’ahagati ya saabiiti. Okuramya okwo nibabaasa kukugira omu miringo mingi. Nk’eky’okureeberaho, nibabaasa kushomera hamwe Baibuli, batebeekanise bimwe aha bicweka by’enteerane, kandi beegyeze omu nyanjura ezi baraakorese omu kubuurira. Aha rupapura hariho obuhabuzi obumwe oburikworeka oku kirikubaasa kukorwa.
7. Abazaire bashemereire kuteeraho kutaho mbeera ki
7 Abazaire Bashemereire Kuteeraho Kutaho Mbeera Ki Eka yaanyu neija kwega gye, okuramya kwanyu kwaba kurimu rukundo n’obuteeka. Obumwe nimubaasa kwegyera aheeru, embeera y’obwire yaaba neebabaasisa. Nimubaasa n’okuhuumuramu kyaba nikyetengyesa. Abamwe nibacwamu kugira eki baarya nari eki baanywa baaheza kwega. N’obu abazaire baraabe nibetantara kukoresa obwire bw’Okuramya okw’Eka kuhana abaana, nibabaasa kukoresa obwire obumwe kugamba aha mitwarize mibi ei bareebire omu baana baabo. Kwonka, ni kiba kiri kirungi enshonga ezirikukwata munonga aha mwana kuzigaaniiraho n’omwana ogwo wenka aha izooba erindi omu saabiiti egyo okutenda kumuhemura omu maisho g’abandi. Okuramya okw’Eka kushemereire kuba kurimu okushemererwa kurikworeka ngu Ruhanga ou turikuramya n’ow’okushemererwa.—1 Tim. 1:11.
8, 9. Nyineeka naabaasa kutebeekanisa ata
8 Nyineeka Naabaasa Kutebeekanisa Ata Eka neija kugasirwa munonga nyineeka yaatebeekanisiza Okuramya okw’Eka bukiri kare arikuteekateeka aha bishemereire kugaaniirwaho n’oku kiine kukorwa. (Enf. 21:5) Omushaija ashemereire kubuuza omukazi we aha bi bashemereire kwegaho. (Enf. 15:22) Baanyineeka obumwe nibabaasa n’okubuuza abaana baabo ebi barikwenda kwegaho. Baakora batyo, nibaija kwetegyereza gye ebirikubashemeza n’ebi barikwetenga.
9 Saabiiti ezimwe nyineeka tikirikwija kumwetengyesa kukoresa obwire bwingi omu kutebeekanisa. Eka buri saabiiti neebaasa kuguma neegyendera aha ntebeekanisa ei etaireho, obwo tikirikwija kwetengyesa nyineeka kukora entebeekanisa ensya buri saabiiti. Naabaasa kushanga kirikuhwera kutebeekanisa bwanyima y’okwega kw’eka obu arikuba naakiijuka gye ebyetengo by’eka ye eby’omwoyo. Baanyineeka abamwe nibahandiika entebeekanisa reero bagihanika ahu erikubaasa kurahuka kureebwa, nk’ahari furiigi. Eki nikihwera ab’omu ka kugira ekihika n’okwetebeekanisiza okwega kyaba nikyetengyesa.
10. Abo abari bonka nibabaasa kukoresa bata obwire bwabo obw’Okuramya okw’Eka
10 Kwonka shi ku Waakuba ori Wenka omu Ka Abo abari bonka nibabaasa kukoresa obwire obw’Okuramya okw’Eka kweshomesa. Ebiine kutwarwa nka bikuru omu ntebeekanisa y’okweshomesa nibitwariramu okushoma Baibuli, okutebeekanisiza enteerane n’okushoma Watchtower na Awake! Ababuurizi abamwe, obumwe nibakoresa obwire obwo kucondooza aha nshonga ezi barikwenda kwetegyereza gye. Obumwe, nibabaasa kweta omubuurizi ondiijo nari eka kubegaitaho okubaasa kwombekana omu by’omwoyo.
11, 12. Ni birungi ki ebirikuruga omu kugira Okuramya okw’Eka butoosha
11 Ni Birungi Ki Ebirikuruga omu Kugira Okuramya okw’Eka Butoosha Abo abarikwejumba omu kuramya okw’amazima n’omutima gwabo gwona nibeyongyera kwirira haihi Yehova. Kandi, ab’omu ka abarikuramiza hamwe Yehova nibahamya omukago gwabo. Omushaija n’omukazi we bakahandiika aha bikwatiraine n’emigisha ei baatungire barikugira bati: “Nka baapayoniya abataine baana, nituba twine ekihika ky’okuba omu Okuramya okw’Eka kwaitu. Itwe twembi nitureeba nitweyongyera kugira omukago guhami kandi turikweyongyera kwirira haihi Tataitwe ow’omu iguru. Aha izooba eriturikwega hamwe, ku turikwimuka tubuuzana tuti: Noomanya ekiriho omu mwabazyo Okuramya okw’Eka!”
12 Entebeekanisa y’okugira okuramya okw’eka neehwera n’ab’omu ka abarikuba baine bingi by’okukora. Nyina w’aboojo babiri ori omuzaire omwe omu ka kandi ori payoniya ow’obutwire akahandiika ati: “Omu kubanza, okwega kwaitu okw’eka kukaba nikuburabura. Tukaba tutakugira butoosha ahabw’okuba nkaba mba nduhire. Nkaba mbura obwire bw’okuhikiiriza byona. Nimbahandiikira kubeebaza munonga ahabw’okututeeraho entebeekanisa y’Okuramya okw’Eka. Hati okwega okwo nitukugira butoosha kandi tutungiremu n’ebirungi.”
13. Oku eka yaanyu eraagasirwe omu Kuramya okw’Eka nikurugiirira ahari ki
13 Nka Sabato, Okuramya okw’Eka n’ekiconco kuruga ahari Tataitwe ow’omu iguru okurikubaasa kuhwera amaka. (Yak. 1:17) Okugasirwa kw’amaka g’Abaisraeli omu by’omwoyo kukaba kurugiirira aha ku gaabaire gakoresa eizooba rya Sabato. Naitwe okugasirwa kwaitu nikwija kurugiirira aha ku turikukoresa obwire bw’Okuramya okw’Eka. (2 Kor. 9:6; Gal. 6:7, 8; Kol. 3:23, 24) Mwakoresa gye obwire obwo, eka yaanyu neija kubaasa kugamba nk’ebi omuhandiiki wa Zaaburi yaagambire ebi: “Kwonka ekirungi ahariinye n’okwirira haihi Ruhanga; Mukama RUHANGA mmuhindwire obweshereko bwangye.”— Zab. 73:28.
[Ebigambo ebitoorainwe aha rupapura 5]
Okuramya okw’Eka kushemereire kuba kurimu okushemererwa kurikworeka ngu Ruhanga ou turikuramya n’ow’okushemererwa
RUBIIKE
[Akabokisi aha rupapura 6]
Obuhabuzi Obumwe Oburikukwata aha Kuramya okw’Eka
Baibuli:
• Nimubaasa kushomera hamwe eshuura za Baibuli eziine kushomwa saabiiti egyo. Ebi murikushoma saabiiti egyo byaba nibikibaasisa, omwe naabaasa kushoma ebyabaireho reero abandi bashome nk’abaabaire bariho.
• Ekicweka kya Baibuli eky’okushoma saabiiti egyo nimubaasa kukikora nk’omuzaano.
• Noobaasa kuha buri muntu omu ka eshuura za Baibuli ez’okushoma bukiri kare reero ahandiikye ekibuuzo kimwe nari bibiri ebi araatungye omu kushoma ekicweka ekyo. Reero musherure eby’okugarukamu eby’ebibuuzo bya buri omwe muri hamwe.
• Buri saabiiti nimubaasa kuhandiika ekyahandiikirwe aha rupapura, reero enyima yaarwo muhandiikyeho ebigambo by’ekyahandiikirwe ekyo kandi muteereho kukiijuka n’okukishoboorora. Nimubaasa kuguma nimubiika empapura ezo, kandi buri saabiiti mugume mweijutsye ebiziriho kureeba ebyahandiikirwe ebi murikwijuka.
• Nimubaasa kuhurikiza Baibuli erikushomwa aha rutambi reero mukuratire omu zaanyu.
Enteerane:
• Nimubaasa kutebeekanisiza hamwe bimwe aha bicweka by’enteerane.
• Nimubaasa kwegyeza omu byeshongoro ebiraakoresibwe omu nteerane saabiiti eraabe neekurataho.
• Omwe aha b’omu ka yaaba aine orubazo omu Eishomero ry’Obuheereza nari aine eky’okureeberaho omu Ruteerane rw’Obuheereza, nimubaasa kumuhwera omu kutebeekanisa nari ayeegyezemu murikumureeba.
Ebyetengo by’Eka:
• Nimubaasa kukoresa ebiri omu katabo Young People Ask nari ekitabo Learn From the Great Teacher.
• Nimubaasa kugira eky’okureeberaho kworeka oku abaana barikubaasa kutwaza omu mbeera erikubaasa kubaho ah’eishomero.
• Omu ky’okureeberaho, abaana nibabaasa kukora nk’abazaire n’abazaire bakore nk’abaana. Abaana nibabaasa kucondooza aha nshonga erikubaasa kubaho reero bahikaanise ebiteekateeko n’abazaire baabo aha nshonga egyo.
Okubuurira:
• Nimubaasa kwegyeza omu nyanjura ezi muraakorese omu kubuurira omu wiikenda.
• Nimubaasa kugaaniira aha bigyendererwa ebi murikubaasa kuhikiiriza okubaasa kwongyera aha kubuurira kwanyu omu bwire bw’Ekiijutsyo nari omu kihuumuro.
• Noobaasa kushaba buri omwe omu ka kukoresa obudakiika bukye kusherura eky’okugarukamu ky’ekibuuzo ekirikubaasa kubuuzibwa omu kubuurira kandi mwegyezemu oku murikubaasa kukigarukamu.
Obuhabuzi Obundi:
• Nimubaasa kushoma hamwe ekicweka kimwe omuri zaamagaziini ensya.
• Shaba buri omwe omu ka bukiri kare kushoma ekicweka ekiraamushemeze omuri magaziini, reero akigambeho mwaba muri omu Kuramya okw’Eka.
• Obumwe noobaasa kweta omubuurizi nari omushaija n’omukazi we kukwegaitaho omu Kuramya okw’Eka, reero obashabe kukugambira eby’okureeberaho birungi ebi batungire omu kubuurira nari oku baayegire amazima.
• Nimubaasa kureeba emwe ahari vidiyo z’ekibiina kandi mugigaaniireho.
• Nimubaasa kugaaniira ahari bimwe aha biri omu kicweka “Eminyeeto Neebuuza” nari “Ebirikuhwera Amaka Kweijutsya” ebirikwizira omuri Awake!
• Nimubaasa kugaaniira hamwe aha biri omu kicweka “Yegyesa Abaana Baawe” nari “Eby’Abaana Abato” ebirikwizira omuri Watchtower.
• Nimubaasa kushomera hamwe kandi mugaaniire ahari bimwe ebiri omuri Yearbook ensya nari ekitabo ekiherize kushohora aha ruteerane orw’ebiro bishatu.
• Bwanyima y’okuruga omu ruteerane rw’ekyanga nari orw’ebiro bishatu, mweijutsye ebikuru ebibaire birimu.
• Nimubaasa kureeba ebihangirwe bya Yehova kandi mugaaniire aha ki birikutwegyesa ahari Yehova.
• Nimubaasa kugira eki mwakorera hamwe nk’okukora ebishushani by’ebyabaireho, muteere maapu nari kyati.