Akabokisi k’Ebibuuzo

◼ Omwegi wa Baibuli orikutunguuka omu by’omwoyo aine kwega kuhitsya ryari?

Ni kirungi kugumizamu nitwega n’omwegi wa Baibuli orikutunguuka omu by’omwoyo okuhitsya yaaheza obutabo bubiri—Niki Eki Baibuli Buzima Erikwegyesa? na “Mwerindire omu Kukunda kwa Ruhanga.” N’obu omwegi yaakubatizibwa atakabuherize aine kugumizamu akabuheza. N’obu yaakuba yaabatiziibwe noobaasa kugumizamu noobara eshaaha, emirundi ei oragarukyeyo kumwegyesa kandi omubare nk’omwegi. Waagyenda n’omubuurizi ondiijo kandi akeejumba omu kwegyesa, nawe naabaasa kubara eshaaha.—Reeba Obuheereza Bwaitu obw’Obukama aka Maaci 2009, orupapura 2.

Ni kikuru abasya kubanza baagira omusingi gw’amazima oguhami tutakarekiire aho kwega nabo. Baine kuba ‘batsimbire emizi’ omuri Kristo kandi ‘bahamiibwe omu kwikiriza’ okubaasa kugumisiriza oburemeezi obu baraagire. (Kol. 2:6, 7; 2 Tim. 3:12; 1 Pet. 5:8, 9) Ekindi, kubaasa kwegyesa gye abandi, baine kugira ‘okumanya okuhikire okw’amazima.’ (1 Tim. 2:4) Twaheza kwega nabo obutabo bubiri obwo, nituba twabahwera kuhamira omu ‘ruguuto orurikuhitsya omu magara agatahwaho.’—Mat. 7:14.

Batakaikiriize omwegi kubatizibwa, abareeberezi baine kuhamya ngu naamanya gye enyegyesa za Baibuli ez’okubandizaho kandi ngu naazigyenderaho omu magara ge. Abareeberezi bashemereire kuba abegyendesereza na munonga baaba nibaza kucwamu yaaba omwegi otakaherize akatabo k’okubanza ahikire kubatizibwa. Yaaba atakahikire kubatizibwa, abareeberezi baine kuteeraho kureeba ngu yaatunga obuhwezi obu arikwetenga kugira ngu abe ohikire kubatizibwa omu bwire bw’omumaisho.—Reeba akatabo Organized to Do Jehovah’s Will, orupapura 217-218.

[Ebigambo ebirikworeka enshonga eri nkuru orupapura 2]

Ni kikuru abasya kubanza baagira omusingi gw’amazima oguhami