Omu Kubuurira Kwaitu Twine Kugumisiriza
1. Yehova ayorekire ata ngu naagumisiririza abantu?
1 Ruhanga atwire naagumisiririza abantu. (Kur. 34:6; Zab. 106:41-45; 2 Pet. 3:9) Okugumisiriza kwe okurikworeka rukundo nikureeberwa aha murimo gw’okubuurira omu nsi yoona. Okumara emyaka nka 2,000, Yehova atwire naagumisiririza abantu kandi naakigumizamu kweyiriza haihi abo abarikwenda kugira omukago murungi nawe. (Yoh. 6:44) Omu kubuurira kwaitu nitubaasa kutooreza tuta okugumisiriza kwa Yehova?
2. Nitubaasa kworeka tuta okugumisiriza twaba nitubuurira omu kicweka kyaitu?
2 Okubuurira Enju aha Nju: Nitubaasa kutooreza Yehova turikugumisiriza tukabuurira ‘tutarikureka’ n’omu kicweka eki abantu bataakorekire ngu nibakunda amazima. (Byak. 5:42) Omu kubuurira kwaitu nitugumisiriza, abantu baayanga amazima, baatushekyerera nari baatuhakanisa. (Mak. 13:12, 13) Kandi nitworeka okugumisiriza turikugumizamu nitwitirira embibo z’amazima nangwa n’obu kiraabe kigumire kushanga omuka abarikukunda amazima.
3. Ahabw’enki twine kugumisiririza abo abarikwenda kumanya ebirikukiraho n’abeegi baitu ba Baibuli?
3 Abeegi ba Baibuli: Okukuza ekimera nikyetengyesa okugumisiriza. Nitubaasa kukireeberera kwonka titurikubaasa kurahutsya kukura kwakyo. (Yak. 5:7) Nikyo kimwe, n’okukura kw’omuntu omu by’omwoyo titurikubaasa kukurahutsya. (Mak. 4:28) Abo abu turikwega nabo Baibuli nikibaasa kutaboorobera kureka enyikiriza z’amadiini g’ebishuba n’emigyenzo etarikuhikaana n’ebyahandiikirwe. Titushemereire kugyemesereza abeegi baitu kukora empindahinduka kugira ngu bakure juba omu by’omwoyo. Omwoyo gwa Ruhanga okubaasa kuhwera omwegi kukura omu by’omwoyo, nikyetengyesa obwire kuhinguraho n’okugumisiriza.—1 Kor. 3:6, 7.
4. Okugumisiriza nikubaasa kutuhwera kuta kubuurira abanyabuzaare baitu omu muringo murungi?
4 Abanyabuzaare Abatari mu Mazima: N’obu turaabe nitwenda ngu abanyabuzaare baitu beegye amazima, nitworeka okugumisiriza turikutegyereza obwire burungi kubaasa kubabuurira turikwetantara kubagambira bingi omurundi gumwe. (Mub. 3:1, 7) Tutakatungire obwire burungi nk’obwo tushemereire kuba eky’okureeberaho kirungi kandi tukaguma tweteekateekire kushoboorora okwikiriza kwaitu omu muringo gw’obucureezi n’ekitiinisa. (1 Pet. 3:1, 15) Buzima twagumisiriza omu kubuurira, niharugamu ebirungi kandi nikishemeza Tataitwe ow’omu iguru.