Baanabi Mubatware Nk’eky’Okureeberaho—Yona
1. Yona akaba aine mitwarize ki emirungi?
1 Niki eki orikwijuka ku orikuteekateeka ahari nabi Yona? Bamwe nibateekateeka ngu Yona akaba naatiina nari aine amaryo. Kwonka akaba ari omucureezi, aine obumanzi hamwe n’omutima gw’okwefeerereza. Nitubaasa kutooreza tuta ‘eky’okureeberaho’ kya Yona eky’okugira emitwarize mirungi?—Yak. 5:10.
2. Nitubaasa kuba tuta abacureezi nka Yona?
2 Obucureezi: Omu kubanza Yona akahunga tiyaaza ei yaabaire aine kuza kubuurira. Ahabw’okugira ngu Abasiria bakaba bari enshaarizi, Nineeve ekeetwa “Oru rurembo orurikusheesha eshagama” (Nah. 3:1-3) Kwonka Yehova ku yaamufubiire Yona akooreka ngu n’omucureezi arikwikiriza kukora eki yaagambiirwe. (Enf. 24:32; Yon. 3:1-3) N’obu araabe yaabandize kuhunga, bwanyima akakora ebi Yehova akunda. (Mat. 21:28-31) Tumaririire kubuurira amakuru marungi n’obu twakuhanwa nari twaba twine ekicweka ekigumire kubuuriramu?
3. Omu kubuurira ni ryari obu kirikwetengyesa kugira obumanzi n’okwefeerereza?
3 Obumanzi Hamwe n’Okwefeerereza: Yona ku yaamanyire ngu okucwamu kwe kwata omu kabi amagara g’abaabaire bari omu meeri, akaikiriza ngu abe niwe yaafa. (Yon. 1:3, 4, 12) Bwanyima ku yaagire kubuurira omu Nineeve, akatandika kugyendagyenda omu rurembo arikugambira abantu ngu Yehova akaba naija kucwekyereza orurembo. Ebyo byona bikooreka ngu nabi Yona akaba ari emanzi. (Yon. 3:3, 4) Kandi shi itwe obunaku obu? Obumanzi obu Ruhanga arikutuhwera kugira nibutubaasisa kubuurira n’obu twakuhiiganisibwa. (Byak. 4:29, 31) Twine kwefeerereza obwire bwaitu n’ebintu byaitu ahabw’omurimo gw’okubuurira.—Byak. 20:24.
4. Ahabw’enki tushemereire kugira obwire tukateekateeka aha ky’okureeberaho eki baanabi ba Yehova baatutereireho?
4 Waashoma ebirikukwata ahari omwe ahari baanabi ba Yehova noija kugasirwa waayeshushaniriza ngu naiwe ori omu mbeera nk’ezo. Yebuuze oti: Nkaba ninyija kutwaza nta? Nimbaasa kutooreza nta emitwarize ye emirungi? (Heb. 6:11, 12) Ebicweka ebindi ebiraijire Obuheereza Bwaitu obw’Obukama nibiija kworeka ebindi ebi turikubaasa kwega ahari baanabi ba Yehova abeesigwa.