Oku Turikubaasa Kwongyera Kubuurira Gye—Ba Niiwe Waatandika Okugaaniira Kubaasa Kubuurira Kitaraariire

Ahabw’Enki Ni Kikuru: Twaba nitubuurira enju aha nju, obwire obwingi nitushanga abantu batari muka. Kwonka, nitubaasa kubashanga omu motoka baaba bari aha rugyendo, baaba bategyereize omushaho, baaba bari omu kahuumuro aha murimo nari aha ishomero n’omu myanya endiijo. Yehova naayenda ngu buri omwe amanye amakuru marungi g’Obukama. (1 Tim. 2:3, 4) Kubaasa kubuurira abantu, niitwe twine kutandika okugaaniira.

Oku Turikubaasa Kukikora:

Koresa okwetegyereza. Omuntu ogu naabaasa kukunda kugaaniira naanye? Embeera eriho neetubaasisa kugaaniira? Ababuurizi abamwe nibabanza bareeba omuntu aha maisho reero bamwenya. Omuntu ogwo ku arikumwenya, batandika kugaaniira nawe.
Shabira aha mutima omu bugufu waaba oine okutiina.—Neh. 2:4; Byak. 4:29.
Tandika n’ebigambo byorobi, nk’okuramutsya. Yesu taraatandikire arikugamba aha Bukama obu yaagaaniira n’Omusamariakazi. (Yoh. 4:7) Obumwe noobaasa kutandika kugaaniira n’omuntu orikusiima oti: “Abaana baawe ka baine emicwe mirungi!” Omuringo ogundi, n’okukoresa ekibuuzo nka, “Oreebire amakuru nyekiro?”
Waatandika kugaaniira n’omuntu, teeraho kureeba oku oraayanjure amakuru marungi omu muringo murungi. Noobaasa kugamba aha kintu ekiraamuhige kwenda kumanya ebirikukiraho. Nk’eky’okureeberaho, mwaba nimugaaniira ebirikukwata aha maka, noobaasa kugira oti: “Hariho obuhabuzi oburikwesigwa oburikukwata aha ku turikubaasa kukuza gye abaana.” Mwaba ni nimugaaniira ahari bimwe ebibaireho omu makuru, noobaasa kugira oti: “Hariho amakuru marungi agu nshomire agarikukwata aha nshonga egi . . .” Mwahendera okugaaniira otabaasize kumubuurira otahwa amaani.
Guma ogyende na turakiti nari ebitabo ebindi ebi orikubaasa kuha oraayorekye ngu naayenda kumanya ebirikukiraho.

Teeraho Kukora Eki Okwezi Oku:

Buri wiiki teeraho kugaaniira n’omuntu kugira ngu obaase kumubuurira kitaraariire.