Okwongyera Kubuurira Gye—Okutendeka Omwegi wa Baibuli Omuringo Murungi gw’Okweshomesa

Ahabw’Enki Ni Kikuru: Abeegi ba Baibuli kubaasa kutunguuka omu by’omwoyo, tibashemereire kwega eby’okubandizaho byonka ebiri omu Kigambo kya Ruhanga. (Heb. 5:12–6:1) Kubaasa kwega nikyetengyesa kutamu amaani. Nikitwariramu okugyeragyeranisa ebisya ebi turikwega n’ebi tutwire nitumanya reero tukareeba oku birikubaasa kutugasira. (Enf. 2:1-6) Baamanya kucondooza, nikiija kubabaasisa kutunga eby’okugarukamu eby’ebibuuzo ebirikukwata aha Baibuli barikukoresa ebitabo byaitu. Okuguma nibateeraho kuta omu nkora ebi barikwega nikiza kubahwera kwemera oburemeezi oburikubaasa kubahikaho nk’Abakristaayo.—Luk. 6:47, 48.

Oku Turikubaasa Kukikora:

Yoreka ahabw’enki ni kikuru kushaba Yehova kukuhwera burikuza kwega.—Yoh 14:26; 1 Kor. 2:10.
Kuruga obu oraatungye omwegi, muhige kuguma naatebeekanisa bukiri kare. Mworekye akatabo kaawe oku katebeekaniise, kandi omwegyese oku arikubaasa kushaza aha nshonga enkuru zonka.
Hwera omwegi kugarukamu arikukoresa ebigambo ebye. Yetantare kumanyiiza omwegi kugarukamu ebi arikushoma ebiri omu kitabo byenyine.
Higa omwegi kushoma Ekigambo kya Ruhanga obutoosha. Mworekye entebeekanisa ei arikubaasa kukoresa omu kushoma Baibuli eri aha jw.org. Omwegi kubaasa kushoma Baibuli obutoosha aine kumariira kandi nikiija kurugamu ebirungi.—Zab. 1:2, 3.
Yoreka omwegi oku arikubaasa kutunga eby’okugarukamu by’ebibuuzo ebirikukwata aha Baibuli arikukoresa Omunaara gw’Omurinzi RAIBURARE Y’AHA INTANEETI. Kandi muhwere kumanya obumanyiso bw’ebitabo ebi turikukira kukoresa omu kibiina.

Teeraho Kukora Eki Okwezi Oku:

Bwanyima y’okwega ebiri ahansi y’omutwe omukye nari eshuura, shaba omwegi kugamba omu bugufu eki yaayega. Waaba otaine mwegi wa Baibuli, yeemanyize kumanya enshonga enkuru eziri omu kicweka ky’omu Munaara gw’Omurinzi nari ebi waashoma omu Baibuli, kibaase kukuhwera kwongyera kumanya enshonga enkuru.