Oriyo Nootebeekanisiza Ekiijutsyo?

Okuhingurwaho okw’aha muheru oku Yesu yaakurize kukaba kuri kukuru. Ahabw’okugira ngu akaba ari haihi kwitwa, akatebeekanisa kurya Okuhingurwaho n’entumwa ze n’okutandikaho omukoro gwa buri mwaka, Ekiihuro kya Mukama Waitu. N’ahabw’ekyo akatuma Petero na Yohaana kutebeekanisa ekishengye. (Luk 22:7-13; reeba ekishushani eky’aha mutwe.) Eki nikitwijutsya ngu twine kwetebeekanisiza Ekiijutsyo ekiraabeho Maaci 27. Buri kibiina nikibaasa kuba kyatooraine oraahe orubazo, abaraakore obumanyiso, n’ebindi. Kwonka, buri omwe naabaasa kukora ki kwetebeekanisiza Ekiijutsyo?

Tebeekanisa omutima gwawe. Shoma kandi oteekateekye aha biri omu Kushoma Baibuli okw’Ekiijutsyo. Noobaasa kutunga ebyahandiikirwe ebi omu katabo Okushwijuma Ebyahandiikirwe Buri Izooba. Appendix B12 omu New World Translation of the Holy Scriptures ehindwirwemu neeyoreka ebirikukiraho. (Reeba ebiri omu Obuheereza Bwaitu N’oku Turikutwaza Akatabo k’Okukoresa aka Apuri 2020.) Amaka nigabaasa kutunga eby’okwegaho omu kuramya kw’eka ebirikukwata aha bukuru bw’ekitambo barikureeba ebiri omu Watch Tower Publications Index nari Akatabo Akarikuhwera omu Kucondooza ak’Abajurizi ba Yehova.

Yeta abandi kwija aha Kiijutsyo. Yenjumbire kimwe omu kampeyini y’okweta abantu. Teekateeka aha bu orikubaasa kweta, nk’abu orikugarukira, abu waabaire nooyegyesa Baibuli, abanyabuzaare baawe, n’abandi. Abareeberezi bashemereire kuteeraho kweta abatakibuurira. Ku haakuba hariho omuntu ou orikumanya otarikutuura omu kicweka kyanyu, noobaasa kumanya eshaaha n’omwanya ahu Ekiijutsyo kiraabe omu kicweka eki arikutuuramu orikuza aha jw.org ah’okubanza, reero oimate EBIRIKUTUKWATAHO, reero osherure “Ekiijutsyo.”

Niki ekindi eki turikubaasa kukora kubaasa kwetebeekanisa?