Yehova Atwire Naashoronzya ‘Emihanda Yangye’

ABAZAIRE BANGYE BAKAMPWERA KUZA OMU MUHANDA OGUHIKIRE

Abazaire bangye bakeega amazima omu myaka ya 1920, batakataahire hamwe omu bushwere. Nkazaarwa omwaka gwa 1939 gurikutandika. Obu naabaire nkiri muto omuri England, nkaba ngyenda n’abazaire bangye omu nteerane z’Ekikristaayo kandi bwanyima naaza omu Ishomero ry’Obuheereza. Okuhitsya na hati, ninyijuka ndikutemba aha kibokusi kubaasa kureeba abahurikize ndikuha orubazo rwangye rw’okubanza. Nkaba nyine emyaka mukaaga kandi okureeba abantu bakuru omu bahurikiize kikandeetera kugira obwoba.

Omu kubuurira, tata akaba ampandiikira aha kaada enyanjura y’okukoresa omu buheereza. Nkaba nyine emyaka munaana obu naabanza kubuurira nyenka enju aha nju. Nkashemererwa munonga ou naabuuriire ku yaashomire kaada kandi akaakiira ekitabo “Let God Be True”! Nkagyenda ninyiruka kugambira tata ekyabaho. Nkaba ninkunda munonga obuheereza n’enteerane, kandi eki kikampwera kugira ekihika ky’okuheereza Yehova omu buheereza obw’obutwire.

Amazima ga Baibuli gakatandika kumpika aha mutima tata ku yaataireyo okushaba kwangye kukuguma nintunga Watchtower. Nkaba niinfayo kushoma buri emwe naaheza kugitunga. Nkongyera kwesiga Yehova kandi naayehayo ahariwe.

Omuri 1950 nk’eka tukaza omu ruteerane orw’Ekiro kimwe orwine omutwe Theocracy Increase omuri New York. Okwamunaana, aha Rwakana 3, omutwe gw’eizooba gukaba guri “Eizooba ry’Abamiisani.” Eizooba eryo, Ow’eishe-emwe Carey Barber, owaizire kuheereza aha Kakiiko Akareeberezi, niwe yaahaire orubazo rw’okubatiza. Ku yaaherize kubuuza abarikuza kubatizibwa ebibuuzo aha muheru gw’orubazo rwe, nkemerera kandi naagarukamu ngu, “Eego!” Nkaba nyine myaka 11 kwonka nketegyereza ngu naateera orutambwe rw’omutaano. Kwonka, nkaba ntiinire kuza omu maizi ahabw’okutamanya kwibira. Tatento akagyenda naanye aha ibatirizo kandi yaampamiza ngu buri kimwe nikiza kugyenda gye. Kandi nikwo kyabaire. Ahonaaho nkabatizibwa kandi ebigyere byangye tibirahikire n’ahansi omu ibatirizo. Ow’eishe-emwe omwe akambatiza kandi ondiijo yaankiriza yaanyiha omu maizi. Kuruga obwo, Yehova atwiire naashoronzya emihanda yangye.

OKUCWAMU KWESIGA YEHOVA

Bwanyima y’okushoma, nkaba niinyenda kuba payoniya, kwonka abashomesa aha ishomero bakampiga kugumizamu n’obwegyese bw’ahaiguru. Nkagyemeserezibwa naaza aha yunivasite, kwonka nketegyereza ngu tindikubaasa kuhama omu mazima kandi nkagumizamu n’emishomo yangye, n’ahabw’ekyo nkacwamu kurugayo. Nkashaba Yehova aha nshonga egi, kandi naahandiikira abashomesa ebaruha erikukwata aha kucwamu kwangye kw’okuruga aha yunivasite bwanyima y’omwaka gumwe. Ahabw’okwesigira kimwe Yehova ahonaaho nkatandika kuba payoniya ow’obutwire.

Omu Kwamushanju 1957 nkatandika obuheereza bw’obutwire omu tauni ya Wellingborough. Nkashaba ab’eishe-emwe aha Beseeli ya London kwohereza ow’eishe-emwe amazire obwire ari payoniya kugira ngu mwegaiteho. Ow’eishe-emwe Bert Vaisey nkamwegyeraho ebintu bingi, kandi obweziriki bwe bukampwera kugira entebeekanisa nungi y’okubuurira. Ekibiina kikaba kirimu banyaanyazi-itwe mukaaga abakaikwire, Ow’eishe-emwe Vaisey, naanye. Okwetebeekanisiza enteerane zoona kandi nkazejumbamu kikambaasisa kwesigira kimwe Yehova n’okworeka okwikiriza kwangye.

Bwanyima y’okumara obwire bukye omu kihome ahabw’okwanga kuza omu mahe, nkabugana munyaanyazi-itwe Barbara payoniya w’omutaano. Tukataaha hamwe omu bushwere omuri 1959, kandi akaba ayeteekateekire kugyenda naanye buri hamwe. Tukabanza kuheereza omuri Lancashire omu bukiizi-bwa-bumosho bw’oburengyerwa izooba bwa England. Reero omu Kwokubanza 1961, tukeetwa omu Ishomero ry’Obuheereza kumara okwezi kumwe aha Beseeli ya London. Ekyantangaarize, aha kuhendera ishomero, nkaheebwa obujunaanizibwa bw’okutaayaayira ebibiina. Nkamara saabiiti ibiri, ndikutendekwa orikutaayaayira ebibiina omu rurembo Birmingham, kandi Barbara akaikirizibwa kunyegaitaho. N’ahabw’ekyo tukaza omu buheereza bwaitu omu mashaza ga Lancashire na Cheshire.

OKWESIGA YEHOVA BUTOOSHA NIKYO KIHIKIRE

Obu twabaire tuhuumwireho omu Kwamunaana 1962, tukatunga ebaruha kuruga aha ofiisi y’eitaagi. Ekaba erimu foomu z’okushaba kuza aha Gileadi! Bwanyima y’okushaba, nyowe na Barbara tukaijuza foomu ezo kandi ahonaaho twazoohereza aha ofiisi nk’oku baabaire batushabire. Bwanyima y’ameezi ataano, tukaza Brooklyn, New York, omu Ishomero rya Gileadi erya 38 kumara ameezi ikumi.

Aha Gileadi tukeega Ekigambo kya Ruhanga, ebirikukwata aha kibiina kye, n’obumwe bw’ab’eishe-emwe omu nsi yoona. Tukaba tukiri omu myaka ya 20 kandi tukeegyera aha beegi bagyenzi baitu. Tukatunga omugisha gw’okukora buri izooba n’omwe aha beegyesa baitu, Ow’eishe-emwe Fred Rusk. Butoosha akaba atwijutsa kuha abandi obuhabuzi obuhikire, ekirikumanyisa oburikwegamira aha Byahandiikirwe. Abeegyesa baitu bakaba bamazire obwire omu buheereza nk’ow’eishe-emwe Nathan Knorr, Frederick Franz, na Karl Klein. Kandi Ow’eishe-emwe omucureezi A. H. Macmillan tukamwegyeraho bingi, kandi akatuhwera kwetegyereza obuhabuzi bwa Yehova omu bwire bw’okugyezibwa kuruga 1914 kuhika 1919!

OBUHEEREZA BWAITU KUHINDUKA

Turi haihi kuhendera emishomo, nyowe na Barbara Ow’eishe-emwe Knorr akatugira ngu nituza kuheereza omuri Burundi omuri Africa. Ahonaaho tukairuka twaza omu raiburare ya Beseeli kusherura Yearbook kumanya omuhendo gw’ababuurizi abariyo. Ekyatutangaarize, omubaro gw’ababuurizi gukaba gutarikworekwa! Buzima, tukaba nituza kubuurira omu mwanya ogwabaire gutakabuuriirwemu kandi ogu twabaire tutarikumanya. Tukagira okwerarikirira! Kwonka tukashaba Yehova kutuhwera kwikaikana.

Omu buheereza bwaitu obusya, buri kimwe kikaba kiri eky’omutaano, nk’embeera y’obwire, entwaza, n’orurimi. Hati tukaba twine kwega Orufaransa. Tukagumirwa kutunga omwanya gw’okuraaramu. Bwanyima y’ebiro bibiri tuhikireyo Harry Arnott ou twabaire twine aha ishomero akaturabaho arikugaruka omu buheereza bwe Zambia. Akatuhwera kutunga omwanya gw’okuraaramu ogwahindikire eka y’abamiisani ey’okubanza. Omu bwire bukye, tukatandika kuteganisibwa ab’obushoboorozi omu kicweka ekyo, abaabaire bataine eki barikumanya aha Bajurizi ba Yehova. Ku twabaire tutandikire kukunda obuheereza bwaitu obusya, ab’obushoboorozi bakatugira ngu titurikubaasa kuheereza omu kicweka ekyo ahabw’okutagira ebihandiiko ebihikire. Eky’obusaasi, tukaba twine kuza omu ihanga erindi, erya Uganda.

Tukeesiga Yehova kutuhwera kutatiina kuza omu Uganda tutaine visa. Ow’eishe-emwe kuruga Canada owaabaire naaheereza omu Uganda akatuhwera kushoboororera orikukora aha by’okufuruka, kutwikiriza kumara ameezi makye obwo turikusherura ebihandiiko ebihikire. Ebyo byona bikatuhamiza ngu Yehova ariyo naatuhwera.

Embeera omu mwanya omusya zikaba nizitaana aha za Burundi. Uganda ekaba yaatandikire kubuurirwamu n’obu haraabe haabaire hariyo Abajurizi ba Yehova 28 bonka omu ihanga ryona. Tukaba nitubona abantu baingi abarikugamba Orungyereza. Bwanyima tukeetegyereza ngu, kubaasa kuhwera abarikwenda kumanya ebirikukiraho kutunguuka, twine kwega hakiri rumwe aha ndimi nyingi eziri omu Uganda. Tukatandika kubuurira omuri Kampala ahu barikukira kukoresa Oruganda kandi nirwo twataireho omutima kwega. Kikatwara obwire kwega kurugamba gye, kwonka kikatubaasisa kuhikiiriza gye omurimo gwaitu! Tukatandika kwetegyereza gye ebyetengo eby’omwoyo eby’abeegi ba Baibuli. Ekyo kikabahwera kutugambira ekiri omu mutima gwabo, n’oku ebi barikwega birikubakwataho.

ENGYENDO NYINGI

Tukashemererwa ahabw’okutunga abantu abacureezi abarikukunda amazima n’okugira omugisha gw’okutaayaayira ebicweka bingi omu ihanga eri. Ofiisi y’eitaagi eya Kenya, ekatutuma kusherura emyanya mirungi ei baapayoniya ab’omutaano barikubaasa kuheerezamu. Emirundi mingi abantu abatarikumanya Abajurizi ba Yehova bakaba batukunira. Bakaba batwakiira gye kandi batuha eby’okurya.

Tukatunga orugyendo orundi. Kuruga Kampala, nkamara ebiro bibiri omu gaari y’omwika kuza aha mwaro gwa Mombasa omuri Kenya kandi bwanyima naagumizamu naaza aha kirwa kya Seychelles, ekiri omuri Indian Ocean. Kuruga 1965 kuhika 1972, Barbara akanyegaitaho twaguma nitugyenda hamwe aha kirwa kya Seychelles. Omu bwire obwo, ababuurizi babiri abaabaire beehereire bakarugamu guruupu kandi bwanyima kyaba ekibiina. Omu ngyendo ezindi nkataayaayira ab’eishe-emwe ab’omuri Eritrea, Ethiopia, na Sudan.

Omu Uganda embeera zikahindukira kimwe omu by’obutegyeki amahe ku gaihireho gavumenti. Omu myaka eyaakuratsireho nkareeba obukuru bw’okukuratira obwengye obu, “ebya Kaisaari mubihe Kaisaari.” (Mak. 12:17) Hariho, obu abantu boona abatari batuuzi ba Uganda baabaire baine kwehandiikisa aha poriisi eri haihi n’ahu barikutuura. Ahonaaho tukooroba. Bwanyima y’ebiro bikye, ku naabaire ndi n’omumiisani ondiijo omuri Kampala, poriisi ekatuhikaho. Tukatiina munonga! Bakatutaho omushango gw’okuba entatsi, baatutwara eha kitebe kya poriisi ekikuru ahu twashobooroire ngu itwe turi abamiisani abataine kabi koona. Tukabashoboororera ngu tukaba twayehandiikiise kwonka ebyo bakaba batarikwenda kubihurira. Bagakatuvuga batutwara aha poriisi endiijo eri haihi n’ahu twabaire nituraara obwo turinzirwe omuserukare. Tukagaruka omutima omunda, omuporiisi ou twashangireyo ku yaatwijukire ngu tukaba twayehandiikiise enyimaho, kandi yaagambira omurinzi waitu kuturekura!

Omu bwire obwo, tukaba nitukira kwemerezibwa abaserukare aha nguuto, reero tutiina na munonga baaba basinzire. Emirundi mingi, tukaba tushaba kandi tuhurira twikaikana bwanyima y’okutwikiriza kurabaho. Eky’obusaasi, omuri 1973 abamiisani boona bakabingwa omu Uganda.

Obuheereza bwaitu bukagaruka bwahinduka, kandi twaza Côte d’Ivoire, omu burengyerwa izooba bw’Africa. Egi ekaba eri empinduka y’amaani. Tukaba twine kwega entwaza nsya y’ekicweka ahu barikugamba Orufaransa, n’okumanyiira embeera y’abamiisani abarikuruga omu bicweka ebindi! Kwonka, tukagaruka kureeba omukono gwa Yehova abantu abacureezi ab’amazima ahonaaho ku baarahukire kwikiriza amakuru marungi. Twembi tukareeba oku okwesiga Yehova kwaitu kwashorongize omuhanda gwaitu gukatereera.

Barbara akaceberwa yaashangwa aine ekookoro. N’obu twagumire nituza omu mahanga g’aheeru kutunga obujanjabi, omu omwaka gwa 1983 tukareeba butunu ngu titurikubaasa kugumizamu n’obuheereza bwaitu omuri Africa. Ekyo ka kyatugwisize kubi munonga!

OKUHINDUKA KW’EMBEERA

Ekookoro ya Barbara ekongyera kuba ey’amaani turikuheereza aha Beseeli ya London kandi bwanyima yaafa. Ababeseeli boona bakaanshagika munonga. Ow’eishe-emwe omwe n’omukazi we bakampwera kugumira embeera n’okugumizamu kwesigwa Yehova. Bwanyima nkareeba munyaanyazi-itwe owaabaire naahwera aha Beseeli owaabaire amazire emyaka maingi ari payoniya ow’omutaano arikukunda Yehova, kandi akuzire omu by’omwoyo. Munyaanyazi-itwe ogwo orikwetwa Ann nkamushwera omuri 1989, kandi tukagumizamu nituheereza aha Beseeli ya London kuruga obwo.

Okuruga 1995 kuhika 2018, nkakunda munonga omugisha gw’okutaayaayira amahanga nka 60 ndikuheereza nk’omujwekyerwa wa ofiisi enkuru (owaabaire naamanywa nk’orikutaayaayira ofiisi z’amataagi.) Buri murundi, nkaba ndeeba obuhame oku Yehova arikuha abaheereza be emigisha omu mbeera nyingi.

Omu 2017 tukataayaaya omuri Africa. Nkashemererwa munonga kutwara Ann omuri Burundi n’okureeba entunguuka omu mubaro gw’ababuurizi omu ihanga eryo! Aha ruguuto ahu twabaire nitubuurira enju aha nju omuri 1964, hati hariho Beseeli erikureebeka gye erikureeberera ababuurizi abarikurenga 15,500.

Nkashemererwa munonga ku naatungire maapu y’engyendo ezi naakozire omuri 2018. Rimwe aha mahanga rikaba riri erya Côte d’Ivoire. Ku naabaire ndi omu rurembo orukuru Abidjan, okaba nooshusha ngu ndi omuka. Ku naabaire nindeeba aha namba z’esimu aha Beseeli kureeba ori omu kishengye ekirikukurataho akaba ari ow’eishe-emwe Sossou eiziina erindikumanya. Nkaijuka ngu akaba ari omureeberezi w’orurembo obu naabaire ndi omuri Abidjan. Kwonka buzima akaba atariwe wenyini. Ogu akaba ari mutabani wa Sossou.

Yehova ahikiriize eki yaaraganiise. Omu mbeera zoona ezigumire, nyegire ngu twayesiga Yehova, naija kushoronzya emihanda yaitu. Hati twine ekihika ky’okugumizamu omu muhanda ogutaine bugarukiro ogu ekyererezi kyagwo kiraayeyongyere omu nsi ensya.​—Enf. 4:18.