Ekyabaireho Ahabw’okumwenya!

Helen naamwenya ari haihi n’akagaari. Abaishiki babiri nibahingura.

ABAISHIKI babiri bakaba nibagyenda hamwe omu rurembo Baguio, omuri Philippines. Bakareeba akagaari k’okukoresa omu kubuurira omu rweteeraine, kwonka tibaragiireyo kwihaho ebitabo. Munyaanyazi-itwe Helen owaabaire akariho akabamwenyera. Abaishiki aba bombi bakagumizamu baahingura kwonka bakashemezibwa okumwenya kwa Helen.

Bwanyima, abaishiki aba ku baabaire bari omu baasi nibataaha, baareeba ekyapa kihango ekya jw.org aha Kyombeko ky’Obukama. Bakaijuka ngu ekyapa ekyo nikyo kimwe ekyaba kiri aha kagaari enyimaho. Bakaruga omu baasi reero baayetegyereza obwire bw’enteerane z’ebibiina bitari bimwe aha irembo ry’Ekyombeko ky’Obukama.

Abaishiki nibo bamwe nibamwenya barikureeba Helen aha Kyombeko ky’Obukama.

Abakazi bombi bakaija omu ruteerane orwakuratsireho. Bakatangaara ku baareebire Helen barikutaaha omu Kyombeko ky’Obukama! Ahonaaho bakeetegyereza ngu niwe yaabamwenyera aha kagaari. Helen naagira ati: “Ku baizire ahu ndi nkagiramu obwoba. Nkateekateeka ngu shana haine eki naashobya.” Kwonka abakazi aba bombi bakamugambira ngu okumwenya kwe aha kagaari nikwo kwabahiga kwija.

Abaishiki aba bakakunda munonga enteerane n’okushashaanuka, baahurira baikaikaine. Ku bareebire abandi barikuboneza Ekyombeko ky’Obukama bwanyima y’enteerane, nabo bakashaba kuhwera. Omwe aha baishiki aba takituura omuri Philippines, kwonka ondiijo we akaguma naija omu nteerane yaatandika n’okwega Baibuli. Ebi byona bikabaho ahabw’okumwenya!