Ekiragiro ‘ky’Embabazi’ ka Kikuhige

“EMBABAZI z’ab’eishe-emwe na banyaanyazi-itwe zikankwataho munonga,” nikwo Lisa arikugira.a Akaba naamanyisa ekyamureeteire kukunda amazima. Nikyo kimwe na Anne, owaagizire ati: “Nkakunda amazima ahabw’embabazi ezi baanyorekire okukira ebi baabaire nibanyegyesa.” Banyaanyazi-itwe aba bombi hati nibakunda kushoma Baibuli n’okugiteekateekaho, kwonka embabazi ezi baayorekirwe zikabakwataho munonga.

Nitubaasa kugirira tuta abandi embabazi tukabahika aha mutima? Ka tureebe emiringo ebiri, omu bigambo n’omu bikorwa. Bwanyima nituza kureeba abu twine kworeka embabazi.

OINE KUGUMA ‘NOOYEGYESA EBY’EMBABAZI’

Omukazi w’omutima naashoboororwaho omu Enfumu eshuura 31 nk’oine ekiragiro ‘ky’embabazi’ omu kanwa ke. (Enf. 31:26) Omuringo ogu arikugambamu n’ebi arikugamba nibiba biri eby’embabazi. Abashaija nabo baine kugira ekiragiro ky’embabazi. Abazaire baingi nibamanya ngu okugambira kubi abaana n’eky’akabi. Abazaire nibamanya ngu baagambira kubi abaana baabo, tibarikwija kubahurikiza. N’ahabw’ekyo baagamba nabo omu muringo gw’embabazi nibaija kubahurikiza kandi baboorobere.

Yaaba oine abaana nari otabaine noobaasa kugamba ota n’embabazi? Eky’okugarukamu kiri omu kicweka ky’okubanza omu Enfumu 31:26: ‘Akanwa ke kagamba eby’obwengye.’ Eki nikitwariramu okutoorana gye ebigambo byaitu, kandi tukabigamba omu iraka rirungi. Ni kirungi kwebuuza oti: ‘Ebi ndikwenda kugamba nibiija kugwisa kubi abandi, nari nibiija kureetaho obusingye?’ (Enf. 15:1) Eego, n’eky’obwengye kuteekateeka otakagambire.

Enfumu endiijo neegira eti: “Hariho orikurahukiiriza ebigambo, ebirikucumita nka rurara.” (Enf. 12:18) Twateekateeka aha ku ebigambo byaitu n’eiraka eri turikukoresa birikukwata aha bandi, nitwija kwegyendesereza omu migambire yaitu. Eego, okugyendera aha kiragiro ‘ky’embabazi’ nikiija kutuhwera kutakoresa ebigambo bibi nari kugamba omu muringo mubi. (Efe. 4:31, 32) Omu mwanya gw’ebiteekateeko bibi n’emigambire mibi, nitwija kutamu ebigambo by’embabazi n’eiraka rirungi. Yehova akatuteeraho eky’okureeberaho kirungi obu yaahuumuriza omuheereza we Eliya owaabaire atiinire. Maraika ou Yehova yaayohereize akagamba omu “karaka kakye kandi koorobi.” (1 Bag. 19:12) Kwonka okuba omunyambabazi nikikira aha kugamba omu muringo gw’embabazi. Twine n’okubakorera eby’embabazi. Tuta shi?

EBIKORWA BY’EMBABAZI NIBIHIGA ABANDI

Twatooreza Yehova, nitugirira abandi embabazi omu bigambo byaitu n’omu bikorwa. (Efe. 4:32; 5:1, 2) Lisa, owaaba yaagambirweho akagamba aha mbabazi ezi Abajurizi ba Yehova baamworekire ati: “Eka yaitu ku yaagyemesereziibwe kufuruka ahonaaho, ab’eishe-emwe babiri n’abakazi baabo, bakaruga aha mirimo yaabo baija kutuhwera kufuruka. Omu bwire obwo, nkaba ntakatandire kwega Baibuli!” Ebikorwa by’embabazi ebyo bikareetera Lisa kwenda kumanya amazima.

Anne, owaaba yaagambirweho, naasiima munonga embabazi ezi Abajurizi ba Yehova baamworekire. Naagira ati: “Ahabw’okugira ngu omu nsi baingi tibarikutwariza gye bagyenzi baabo, nikingumira kwesiga abantu.” Naayongyeraho ati: “Nkeekyengyera n’Abajurizi ba Yehova. Nkaba niinyebuuza nti: ‘Ahabw’enki nibanfaho munonga?’ Kwonka ku naareebire ngu orikunyegyesa Baibuli buzima naanfaho, nkatandika kumwesiga.” Hakarugamu birungi ki? “Bwanyima, nkatandika kuta omutima aha bi naabaire niinyega.”

Yetegyereze ngu Lisa na Anne bombi bakakwatwaho munonga ebikorwa by’embabazi eby’ab’eishe-emwe omu kibiina, kandi ekyo kikabareetera kwenda kwega amazima. Embabazi z’ab’eishe-emwe omu kibiina zikabahwera kwigura emitima yaabo.

TOOREZA RUHANGA OGIRIRE ABANDI EMBABAZI

Bamwe nibabaasa kuba nibagamba omu muringo gw’embabazi, kandi barikukira kumwenya ahakuba ei baakuriire nikwo abantu barikutwaza. Twaba nitugirira abandi embabazi ahabw’oku twakuziibwe nari entwaza yaitu, ekyo ni kirungi. Kwonka twaba nituhigwa ebyo byonka, ezo nizibaasa kutaba embabazi ezirikuruga ahari Ruhanga.—Gyeragyeranisa Ebyakozirwe 28:2.

Embabazi ezirikuruga ahari Ruhanga ezaabuzima n’omutwarize gw’omwoyo gurikwera. (Gal. 5:22, 23) N’ahabw’ekyo twine kwikiriza omwoyo gurikwera kutuhwera kugira embabazi. Eki nikihikaana n’ekyetengo kyaitu ky’okutooreza Yehova na Yesu. Kandi obu turi Abakristaayo twine kuba nitufayo aha bandi. N’ahabw’ekyo, nituhigwa rukundo ei twiniire Yehova Ruhanga n’abagyenzi baitu. Twakora ekyo nikyoreka ngu embabazi zaitu niziruga aha mutima, kandi ekyo Yehova naakisiima.

NI BAAHI ABU TWINE KUGIRIRA EMBABAZI?

Nikibaasa kworoba kugirira embabazi abatwire nibazitugirira nari abu turikumanya. (2 Sam. 2:6) Omuringo gumwe gw’okukora ekyo n’okubasiima. (Kol. 3:15) Kwonka shi ku twakuba nitwereeba nk’abatashemeire kugirirwa embabazi?

Teekateeka ahari eki: Yehova niwe arikukirayo kutugirira embabazi ezitatushemereire, kandi Ekigambo kye nikyoreka obukuru bw’okugira omutwarize ogu. Ebigambo embabazi ezitatushemereire nibikoresibwa emirundi mingi omu Byahandiikirwe eby’Orugriika. Ruhanga naatworeka embabazi mu muringo ki?

Teekateeka aha bukaikuru bw’abantu omu nsi abu Yehova arikugirira embabazi ze arikubaha eby’okubabaisaho. (Mat. 5:45) Yehova niwe yaabandize kugirira abantu embabazi, nangwa batakamumanyire. (Efe. 2:4, 5, 8) Nk’eky’okureeberaho, akahayo ekirikukirayo oburungi, niwe Omwana we omwe nyamunegyere ahabw’abantu. Entumwa Paulo akahandiika ngu Yehova akahayo ekitambo ‘ahabw’obutungi bw’embabazi ze oku buri.’ (Efe. 1:7) Kandi, n’obu turaabe turi abasiisi n’obumwe turikukora ebitarikushemeza Yehova, naagumizamu naatwegyesa. Obuhabuzi bwe n’ebigambo bye biri “nk’orutoonyerera.” (Bir. 32:2) Titurikubaasa kumushashura ahabw’embabazi ezi arikutugirira. Kandi amazima gari ngu n’amatsiko agu twine aha biro by’omumaisho nigeegamira aha mbabazi ze.—Gyeragyeranisa 1 Petero 1:13.

Hatariho kubangaanisa, embabazi za Yehova nizitureetera kukundwa kandi nizituhiga. N’ekirikurugamu, omu mwanya gw’okutoorana abu turaagirire embabazi, twine kuteeraho kutooreza Yehova turikuba abanyambabazi ahari boona. (1 Tes. 5:15) Twaguma turi abanyambabazi obwire bwona nitwija kuba nk’obutagatsi bw’omuriro omu bwire bw’obufuki. Nitwija kuhuumuriza ab’amaka gaitu, ab’eishe-emwe bagyenzi baitu, abu turikukora nabo, abeegi bagyenzi baitu, n’abataahi.

Teekateeka aha b’eka yaawe nari ab’ekibiina abarikwija kugasirwa waaba omunyambabazi omu bigambo n’omu bikorwa. Obundi omu kibiina kyanyu haine orikwenda obuhwezi kureeberera eka ye, nari omusiri gwe, nari okugura ebintu omu katare. Kandi, waabuurira omuntu orikwenda obuhwezi, noobaasa kugira eki waakora kumuhwera?

Turikutooreza Yehova, butoosha ebigambo byaitu n’ebikorwa byaitu ka bibe ‘eby’embabazi’!