EKICWEKA EKY’OKWEGA 40
EKYESHONGORO 30 Taata, Ruhanga Kandi Munywani Wangye
Yehova ‘Naakiza ab’Emitima Ehendekire’
“Akiza ab’emitima ehendekire, ashemba obuhuta bwabo.” —ZAB. 147:3.
ENTIMA
Yehova naafayo munonga aha baine obusaasi bw’omu mutima. Ekicweka eki nikiza kworeka oku arikwihaho obusaasi bwabo, n’oku arikutuhwera kuhuumuriza abandi.
1. Yehova naayehurira ata aha baheereza be?
Yehova naareeba buri kimwe eki abaheereza be barikurabamu, kandi naamanya okushemererwa kwaitu, n’obusaasi bwaitu. (Zab. 37:18) Ku arikureeba turikukora ekirikukirayo oburungi kumuheereza n’obu turaabe twine obusaasi omu nyehurira, naashemererwa munonga. Kukira ahari ekyo, aine ekihika ky’okutushagika n’okutuhuumuriza.
2. Yehova naakorera ki ab’emitima ehendekire, kandi nitubaasa kugasirwa tuta omu buhwezi bwe?
2 Zaaburi 147:3 neegira ngu Yehova ‘naashemba obuhuta’ bw’ab’emitima ehendekire. Omu kyahandiikirwe eki Yehova naagambwaho nk’orikuhwera abaine obuhuta bw’omu mutima. Twine kukora ki kugasirwa omu buhwezi bwe? Teekateeka aha ky’okureeberaho eki. Omushaho omukugu naabaasa kuhwera munonga omuntu ohutaire kukira. Kwonka, omuntu ohutaire kubaasa kukira, naaba aine kukuratira obuhabuzi bw’omushaho. Omu kicweka eki, nituza kureeba eki Yehova arikugambira abaine obusaasi omu nyehurira, kandi nituza kureeba oku turikubaasa kugyendera aha buhabuzi bwe obwa rukundo.
YEHOVA NAATUHAMIZA NGU TURI AB’OMUHENDO
3. Ahabw’enki abamwe nibeereeba nk’abataine mugasho?
3 Nitutuura omu nsi etarimu rukundo, kandi eky’obusaasi, abantu baingi bareeteire abandi kwereeba nk’abataine mugasho. Munyaanyazi-itwe Helena naagira ati: “Nkakurira omu ka etaine rukundo. Tata akaba ari enshaarizi, kandi butoosha akaba atugira ngu titwine mugasho.” Nka Helen, noobaasa kuba nootwariziibwe kubi, nookira kujumwa, nari barikukureetera kwehurira ngu torikukundwa. Kyaba nikwo kiri, noobaasa kugumirwa kwikiriza ngu hariho orikukufaho.
4. Kurugiirira ahari Zaaburi 34:18, Yehova naatuhamiza ki?
4 N’obu abandi baakuba nibakutwariiza kubi, noobaasa kuhamiza kimwe ngu Yehova naakukunda kandi naakureeba nk’ow’omuhendo. Ari “haihi ab’emitima ehendekire.” (Shoma Zaaburi 34:18.) Waaba ori omu mbeera egyo, ijuka ngu Yehova akareeba ebirungi omu mutima gwawe, yaakweyiriize haihi. (Yoh 6:44) Butoosha naaba ayeteekateekire kukuhwera ahabw’okuba ori ow’omuhendo ahariiwe.
5. Nitwegyera ki aha ku Yesu yaatwariize abaabaire nibeereeba nk’abataine mugasho?
5 Nitubaasa kumanya enyehurira ezi Yehova aine twashwijuma eky’okureeberaho kya Yesu. Omu buheereza bwe omu nsi, akaba naafayo aha baabaire nibareebwa nk’abatari b’omugasho, kandi akaba naabatwariza omu muringo gw’embabazi. (Mat. 9:9-12) Omukazi owaabaire aine amatsiko g’okukira endwara y’amaani, ku yaakwatsire aha kijwaro kya Yesu, akamuhuumuriza kandi yaamusiima ahabw’okwikiriza kwe. (Mak. 5:25-34) Yesu akooreka gye emitwarize ya Ishe. (Yoh. 14:9) N’ahabw’ekyo, noobaasa kuhamiza kimwe ngu Yehova naakutwara nk’ow’omuhendo, kandi naareeba emitwarize mirungi ei oine otwariiremu okwikiriza na rukundo ei omwiniire.
6. Noobaasa kukora ki waaba nookira kwereeba nk’otaine mugasho?
6 Noobaasa kukora ki waaba nookira kwereeba nk’otaine mugasho? Shoma emishororongo erikukuhamiza ngu ori ow’omuhendo ahari Yehova, kandi ogiteekateekeho.b (Zab. 94:19) Waaba oremirwe kuhika aha kigyendererwa kyawe, nari ohwairemu amaani ahabw’okugira ngu tokikora bingi nk’abandi, otecwera orubanja. Yehova tarikukwenza kukora ebi otarikubaasa. (Zab. 103:13, 14) Ku oraabe waatwariziibwe kubi omu muringo gwona, oteecwera orubanja ahabw’eki owaakutwariize kubi yaakozire. Buzima okaba otaine kutwariziibwa otyo! Ijuka ngu Yehova naija kucwera orubanja enkozi z’ebibi, beitu batari abarikutwarizibwa kubi. (1 Pet. 3:12) Sandra, owaatwariziibwe kubi ari muto naagira ati: “Butoosha ninshaba Yehova kumpwera kwereeba nk’oku arikundeeba.”
7. Nitubaasa kukoresa tuta ebyatuhikireho enyima kuheereza Yehova?
7 Otabangaanisa ngu Yehova tarikubaasa kukukoresa kuhwera abandi. Akuhaire omugisha gw’okuba omukozi mugyenzi we omu buheereza bw’Ekikristaayo. (1 Kor. 3:9) Ebyakuhikireho bikuhweraire kugirira abandi embabazi, n’okwetegyereza oku barikwehurira. Hariho bingi ebi orikubaasa kukora kubahwera. Helen owaaba yaagambirweho, akatunga obuhwezi, kandi nawe naahwera abandi. Naagira ati: “Nkaba ninyereeba nk’otaine mugasho, kwonka Yehova andeetaire kuhuurira ngu ninkundwa, kandi naankoresa kuhwera abandi.” Helen ashemereirwe ahabw’okuheereza nka payoniya ow’obutwire.
YEHOVA NAAYENDA NGU TWIKIRIZE OKUSAASIRA KWE
8. Yehova naatuhamiza ki omuri Isaaya 1:18?
8 Abaheereza ba Yehova abamwe nibateganisibwa munonga okwefuuza ahabw’ebi baakozire, batakabatiziibwe nari bwanyima y’okubatizibwa. Kwonka ni kirungi kwijuka ngu Yehova akahayo ekitambo ahabwa rukundo mpango ei atwiniire. Buzima, naayenda ngu twikirize ekiconco ekyo. Yehova naatuhamiza ngu ‘twahanuura nawe,’c kandi tukatereeza enshonga, naatusaasirira kimwe. (Shoma Isaaya 1:18.) Ka nikitushemeza munonga kumanya ngu Tataitwe oine rukundo tarikuguma naijuka ebibi byaitu eby’enyima! Kandi, tarikwebwa ebirungi ebi tukozire.—Zab. 103:9, 12; Heb. 6:10.
9. Ahabw’enki twine kuteeraho kuta omutima aha bya hati n’ebya nyentsya omu mwanya gw’okuguta aha by’enyima?
9 Waaba nooyefuuza ahabw’ebi waakozire enyima, teeraho kuta omutima aha bya hati n’ebya nyentsya omu mwanya gw’okuguta aha by’enyima. Teekateeka aha ky’okureeberaho ky’entumwa Paulo. Akaba naayefuuza ahabw’okugira ngu akahiiganisa Abakristaayo, kwonka akaba naamanya ngu Yehova akamusaasira. (1 Tim. 1:12-15) Mbwenu shi akaguma naateekateeka aha bibi bye eby’enyima? Ngaaha tarabitaireho omutima, nk’oku ataragutaire aha ebi yaahikiriize omu diini y’Ekiyudaaya. (Fil. 3:4-8, 13-15) Omu mwanya gw’ekyo, Paulo akeejumbira kimwe omu buheereza, kandi yaata omutima aha bya nyentsya. Nka Paulo, torikubaasa kuhindura eby’enyima. Kwonka noobaasa kuhaisa Yehova ekitiinisa hati, kandi ote omutima aha birungi ebi arikukuraganisa omu biro by’omumaisho.
10. Nitubaasa kukora ki ebi twakozire enyima byaba byasaasire abandi?
10 Noobaasa kwehurira kubi bimwe aha bi waakozire enyima byaba byasaasire abandi. Niki ekirikubaasa kukuhwera? Kora kyona eki orikubaasa kuteereza embeera, ekirikutwariramu okushaba okusaasirwa oyihire aha mutima. (2 Kor. 7:11) Shaba Yehova kuhwera abu waakozire kubi. Naabaasa kukuhwera, kandi nabo abahwere kugumisiriza, kandi bagaruke bagire obusingye.
11. Nitubaasa kwegyera ki ahari nabi Yona? (Reeba n’ekishushani )
11 Yegyera aha nshobe zaawe ez’enyima, kandi ba oyeteekateekire kwikiriza Yehova kukukoresa omu muringo gwona. Yetegyereze eky’okureeberaho kya nabi Yona. Omu mwanya gw’okuza Nineeve eyaabaire eri burugwa-izooba nk’oku Ruhanga yaabaire amugambiire, akaza Tarushiishi omu burengyerwa-izooba. Yehova akamuhana, kandi Yona akeegyera aha nshobe ye. (Yon. 1:1-4, 15-17; 2:7-10) Yehova taraarekiire aho kukoresa Yona nka nabi. Akagaruka yaamugambira kuza Nineeve, kandi aha murundi ogu Yona akooroba. Taraikiriize okwefuuza ahabw’enshobe ye y’enyima kumuremesa kwikiriza obujunaanizibwa kuruga ahari Yehova.—Yon. 3:1-3.
Nabi Yona ku yaarugire omunda y’eky’enyanja kihango, Yehova akagaruka yaamutuma Nineeve kugamba obutumwa bwe (Reeba akacweka 11)
YEHOVA NAATUHUUMURIZA ARIKUKORESA OMWOYO GURIKWERA
12. Yehova naatuha ata obusingye twahikwaho ekintu kibi nari twafeerwa? (Abafilipi 4:6, 7)
12 Yehova naakoresa omwoyo gwe ogurikwera kutuhuumuriza twahikwaho ekintu kibi nari twafeerwa. Teekateeka aha ky’okureeberaho kya Ron na Carol. Bakagwerwa akagwe, obu mutabani waabo yaayeita. Bakagira bati: “Tukaba twahikirweho embeera ezindi zigumire, kwonka egi niyo yaabaire neekirayo. Ebiro bingi ku twabaire tuburwa oturo, tukaba tushaba, kandi tutunga obusingye oburikugambwaho omu Abafilipi 4:6, 7.” (Kishome.) Ku oraabe noogumisiriza oburemeezi bw’amaani, noobaasa kushaba Yehova emirundi yoona ei orikwenda. (Zab. 86:3; 88:1) Guma nooshaba Yehova kukuha omwoyo gwe ogurikwera. Tarikubaasa kwehuzya okushaba kwawe.—Luk. 11:9-13.
13. Omwoyo ogurikwera nigutuhwera guta kugumizamu nituramya Yehova omu bwesigwa? (Abaefeso 3:16)
13 Ohikirweho oburemeezi obukumaziremu amaani? Omwoyo ogurikwera nigubaasa kukuha amaani g’okugumizamu nooramya Yehova omu bwesigwa. (Shoma Abaefeso 3:16.) Teekateeka aha kyahikire ahari munyaanyazi-itwe Flora. We na iba bakaba nibaheereza hamwe nk’abamiisani obu iba yaamureebya, kandi bakagaitururwa. Naagira ati: “Nkagira obusaasi bwingi ahabw’okugira ngu ibanyi akandeebya. Nkashaba Yehova kumpa omwoyo gurikwera kumbaasisa kugumisiriza. Yehova akampa ekyabaire nikyetengyesa kuba gye, n’okwemera embeera eyaabaire egumire munonga.” Naareeba ngu Ruhanga amuhweraire kwongyera kumwesiga, n’okuhamiza kimwe ngu naija kumuhwera omu buremeezi bwe bwona. Flora naagira ngu ebigambo bya Zaaburi 119:32 nibyoreka gye oku Yehova amuhweraire. Nihagira hati: ‘Ku oraahe omutima gwangye obusingye. Niinyija kuguma niinyiruka, ndi omu muhanda gw’ebiragiro byawe.’
14. Nitubaasa kwikiriza tuta omwoyo gurikwera kutuhwera?
14 Oine kukora ki bwanyima y’okushaba Yehova kukuha omwoyo ogurikwera? Yejumbe omu mirimo eraakuhwere kwongyera kutunga omwoyo ogurikwera. Neetwariramu okuza omu nteerane, n’okubuurira abandi. Shoma Ekigambo kya Ruhanga buri izooba, kubaasa kugira ebiteekateeko nk’ebya Yehova. (Fil. 4:8, 9) Waaba nooshoma, teeraho kwetegyereza oburemeezi obu abarikugambwaho omu Baibuli baabaire baine, kandi oteekateeke oku Yehova yaabahweraire kugumisiriza. Sandra, owaaba yaagambirweho, akahikwaho oburemeezi bukurataine. Naagira ati: “Ebyahikire ahari Yosefu nibinkwataho munonga. Taraikiriize oburemeezi, n’obutari buringaniza obwamuhikireho kutuubya omukago gwe na Yehova.”—Kut. 39:21-23.
YEHOVA NAATUHUUMURIZA ARIKUKORESA ABAKRISTAAYO BAGYENZI BAITU
15. Ni baahi abarikubaasa kutuhuumuriza, kandi nibakikora bata? (Reeba n’ekishushani.)
15 Twaba twine oburemeezi, Abakristaayo bagyenzi baitu ‘nibatuhuumuriza.’ (Kol. 4:11) Yehova naakoresa ab’eishe-emwe na banyaanyazi-itwe kworeka ngu naatukunda. Nibabaasa kutuhuumuriza barikutuhurikiiza, nari bakaba naitwe. Nibabaasa kutushomera ekyahandiikirwe ekirikutugumya nari bashabe naitwe.d (Rom. 15:4) Obumwe, ow’eishe-emwe nari munyaanyazi-itwe naabaasa kutwijutsya emiteekateekyere ya Yehova, kandi ekyo nikituhwera kwikaikana. Kandi nibabaasa n’okutuhwera omu miringo erikureebwa butunu, nk’okutuha eby’okurya twaba twine obusaasi.
Abanywani abarikwesigwa, abakuzire nibatuhuumuriza, kandi batushangika (Reeba akacweka 15)
16. Nitubaasa kukora ki kutunga obuhwezi kuruga aha bandi?
16 Kubaasa kutunga obuhwezi kuruga aha bandi, obumwe nikyetengyesa kubushaba. Ab’eishe-emwe bagyenzi baitu nibatukunda. (Enf. 17:17) Kwonka nibabaasa kutamanya oku turikwehurira, n’ebyetengo byaitu. (Enf. 14:10) Waaba oine obusaasi omu nyehurira, noobaasa kugambiraho banywani baawe abakuzire. Bamanyise ekirikubaasa kukuhwera. Noobaasa kucwamu kugambira abareeberezi abu orikworoberwa kugamba nabo. Banyaanyazi-itwe abamwe bashangire nikihuumuriza kugamba na banyaanyazi-itwe abakuzire.
17. Ni buremeezi ki obumwe oburikubaasa kuturemesa kutunga okuhuumurizibwa, kandi nitubaasa kubusingura tuta?
17 Yangira okwenda kwetaanisa aha bandi. Ahabw’enyehurira z’obusaasi, noobaasa kuba otarikwenda kuba n’abandi. Obumwe, ab’eishe-emwe na banyaanyazi-itwe nibabaasa kutakwetegyereza nari bakorese ebigambo bitahikire. (Yak. 3:2) Otaikiriza oburemeezi nk’obwo kukuremesa kutunga okuhuumurizibwa. Gavin omureeberezi, aine endwara y’amaganya, naagira ati: “Obwire obwingi nimba ntarikwenda kugamba na banywani bangye.” Kwonka, tarikwikiriza enyehurira ze kumutegyeka, kandi naagasirwa ku arikuba na banywani be. Munyaanyazi-itwe Amy naagira ati: “Ahabw’ebyampikireho, ningumirwa kwesiga abantu. Kwonka niingumizamu kwega kukunda n’okwesiga ab’eishe-emwe na banyaanyazi-itwe. Niimanya ngu ekyo nikishemeza Yehova, kandi naanye nikindeetera kugira okushemererwa.”
EBIRAGANISO BYA YEHOVA EBYA NYENTSYA NIBITUHUUMURIZA
18. Nitubaasa kugirira ki ekihika, kandi twine kukora ki hati?
18 Nitubaasa kworekyera nyentsya n’obumanzi, twine obwesigye ngu Yehova ari hakye kwihaho byona ebirikutureetera obusaasi aha mubiri n’omu nyehurira. (Kush. 21:3, 4) Eizooba rimwe, ebi twarabiremu ebirikutureetera obusaasi tibiraije ‘kuteebwaho omutima.’ (Isa. 65:17) Nk’oku twareeba, hati Yehova naashemba obuhuta’ bw’ab’emitima ehendekire. Gasirwa omu bwijwire omuri byona ebi Yehova arikukoresa kukuhuumuriza n’okukuhwera. Hamiza kimwe ngu Yehova ‘naakutaho omutima.’—1 Pet. 5:7.
EKYESHONGORO 7 Yehova, Niiwe Maani Gaitu
a Amaziina gahindwiirwe
b Reeba akabokusi “Yehova Naakureeba nk’ow’Omuhendo.”
c Kubaasa ‘kuhanuura’ nari kutereeza enshonga na Yehova, twine kworeka ngu tweteisiize kimwe turikumushaba okusaasirwa ahabw’ebibi byaitu, kandi tukakora empinduka. Kandi, twakora ekibi ky’amaani, twine kusherura obuhwezi bw’abareeberezi.—Yak. 5:14, 15.