Gira Emiteekateekyere nk’Eya Yehova na Yesu

1-2. Okukunda Yehova nikitwariramu ki, kandi Yesu akakyoreka ata?

‘KUNDA Yehova Ruhanga waawe n’omutima gwawe gwona, n’amagara gaawe goona, n’amaani gaawe goona, n’obwengye bwawe bwona.’ (Luk. 10:27) Yesu akooreka ngu ekyo nikyo kiragiro ekyabaire nikikirayo omu biragiro bya Musa. Yetegyereze ngu rukundo ei twiniire Yehova neetwariramu omutima gwaitu, kandi ekyo nikitwariramu ebyetengo byaitu, n’enyehurira zaitu. Kandi nikitwariramu okwehayo oyihire aha mutima, n’okukoresa amaani gaitu. Kwonka okukunda Yehova nikitwariramu n’obwengye bwaitu ekirikutwariramu omuringo ogu turikuteekateekamu aha nshonga zitari zimwe. N’amazima titurikubaasa kwetegyereza omu bwijwire oku Yehova arikuteekateeka. Kwonka nitubaasa kwongyera kwetegyereza emiteekateekyere ye turikwega aha ‘kuteekateeka kwa Kristo’, ahakuba Yesu naatooreza Ishe omu ku arikuteekateeka.—1 Kor. 2:16.

² Yesu akaba naakunda Yehova n’obwengye bwe bwona. Akaba naamanya ekigyendererwa eki Ruhanga yaabaire amwiniire, kandi akaba ayeteekateekire kukora kyona ekirikuhikaana nakyo, n’obu ekyo kyabaire nikiija kutwariramu okubonabonesibwa ahabw’ekihikire. Yesu akata omutima aha kukora ebi Ishe akunda, kandi taraikiriize ekintu kyona kumuhuzya kuruga aha kigyendererwa ekyo.

3. Entumwa Petero akeegyera ki ahari Yesu, kandi akahiga Abakristaayo bagyenzi be kukora ki? (1 Petero 4:1)

³ Petero n’entumwa ezindi bakaba baine omugisha gw’okuba na Yesu n’okumwegyeraho butunu oku barikubaasa kugira emiteekateekyere nk’eye. Obu Petero yaahandiika ebaruha ye ey’okubanza, akahiga Abakristaayo kugira omutima nk’ogwa Kristo.a (Shoma 1 Petero 4:1.) Petero akakoresa ebigambo by’amahe obu yaagira ati: “Muhagatire eby’okurwanisa.” N’ahabw’ekyo Abakristaayo baagira emiteekateekyere nk’eya Kristo nari bakatooreza omuringo ogu arikuteekateekamu, nibaba baine eky’okurwanisa ky’amaani ky’okurwanisa ebyetengo bibi, n’ensi erikutegyekwa Sitaane.—2 Kor. 10:​3-5; Efe. 6:12.

4. Ekicweka eki nikibaasa kutuhwera kita kukuratira obuhabuzi bwa Petero?

⁴ Nituza kushwijuma omuringo ogu Yesu yaabaire naateekateekamu, n’oku turikubaasa kumutooreza. Nituza n’okureeba oku turikubaasa (1) kugira emiteekateekyere nk’eya Yehova, ekiraatuhwere twena kugira emiteekateekyere erikushushana, (2) kuba abacureezi, (3) n’okugira emiteekateekyere ehikire turikushaba Yehova.

GIRA EMITEEKATEEKYERE NK’EYA YEHOVA

5. Eizooba rimwe Petero akaremwa ata kworeka emiteekateekyere nk’eya Yehova?

⁵ Teekateeka aha mbeera emwe obu Petero yaaremwa kworeka emiteekateekyere nk’eya Yehova. Yesu akaba agambiire entumwa ze ngu akaba aine kuza Yerusaalemu, aheebweyo omu mikono y’abeebembezi b’ediini, abonabonesibwe, reero aitwe. (Mat. 16:21) Petero akagumirwa kwikiriza ngu Yehova akaba naija kureka Yesu kwitwa ahakuba Abaisraeli bakaba bamwinemu amatsiko, kandi akaba ari Mesia owaaraganisiibwe. (Mat. 16:16) N’ahabw’ekyo Petero akata Yesu aha rubaju yaamugira ati: “Nikikabure, Mukama wangye! Ekyo tikirikwija kukubaho na kakye.” (Mat. 16:22) Ahabw’okugira ngu Petero akaba ataine emiteekateekyere nk’eya Yehova, Yesu taraikiriziine nawe aha nshonga egyo.

6. Yesu akooreka ata ngu emiteekateekyere ye neehikaana n’eya Yehova?

⁶ Emiteekateekyere ya Yesu ekaba neehikaana gye n’eya Ishe ow’omu iguru. Yesu akagambira Petero ati: “Garuka enyima yangye Sitaane! Wambeera enkongi ahabw’okuba torikuteekateeka bya Ruhanga, kureka eby’abantu.” (Mat. 16:23) Petero naabaasa kuba yaabaire aine ebigyendererwa birungi, kwonka Yesu akanga obuhabuzi bwe. Ekyo nikitwegyesa eishomo rikuru. Kikaba kitari kigyendererwa kya Yehova ngu Yesu ayesaasibwe. Aha izooba eryo, Petero akeega eishomo rikuru ery’okugira emiteekateekyere nk’eya Ruhanga.

7. Petero akooreka ata bwanyima ngu naayenda emiteekateekyere ye ehikaane n’eya Yehova? (Reeba ekishushani .)

⁷ Bwanyima, Petero akooreka ngu akaba eyeteekateekire kuhikaanisa emiteekateekyere ye n’eya Yehova. Obwire bukahika Yehova yaatandika kwikiriza abanyamahanga abatashazirwe kuba abantu be. Petero akaheebwa obujunaanizibwa bw’okubuurira Koruneelio, owaabaire naija kuba omwe aha Banyamahanga b’okubanza kuhinduka Abakristaayo. Abayudaaya bakaba batarikukwatanisa gye n’Abanyamahanga, n’ahabw’ekyo Petero akaba naayetenga obuhwezi kubaasa kwetebeekanisiza obujunaanizibwa obwo. Ku yaayetegyereize ekigyendererwa kya Ruhanga aha nshonga egyo, akahindura emiteekateekyere ye. N’ekyarugiremu, ku yaayesirwe ‘tarayangire.’ (Byak. 10:​28, 29) Akabuurira Koruneelio n’eka ye, kandi bakabatizibwa.—Byak. 10:​21-23, 34, 35, 44-48.

8. Nitubaasa kworeka tuta ngu emiteekateekyere yaitu neehikaana n’eya Yehova? (1 Petero 3:8)

⁸ Bwanyima y’emyaka, Petero akahiga Abakristaayo bagyenzi be ‘kukwatanisa hamwe omu biteekateeko.’ (Shoma 1 Abakorinso 1:10) Nk’abaheereza ba Yehova, nitubaasa kukwatanisa hamwe omu biteekateeko turikugira emiteekateekyere nk’eya Yehova erikushangwa omu kigambo kye. Nk’eky’okureeberaho, Yesu akahiga abakuratsi be kwebembeza eby’obukama. (Mat. 6:33) Ahabw’enshonga egyo, omubuurizi omu kibiina kyanyu naabaasa kucwamu kuza omu buheereza bw’obutwire. Omu mwanya gw’okumuhiga kwesaasibwa, twine kugamba gye aha kigyendererwa kye kirungi, kandi tukamushagika.

BA OMUCUREEZI

9-10. Yesu akooreka ata obucureezi omu muringo gw’omutaano?

⁹ Harikuburayo ekiro kimwe Yesu akaitwa, akeegyesa Petero n’entumwa abandi eishomo rikuru ery’obucureezi. Eizooba eryo, Yesu akatuma Petero na Yohaana kutebeekanisa ekiihuro ky’aha muheru eki yaabaire naija kurya hamwe nabo atakafiire. Okutebeekanisa nikubaasa kuba kwabaire nikutwariramu okuhamya ngu ebaafu, n’eby’okwesiimuuza biriho kugira ngu abagyenyi banaabe ebigyere byabo batakariire. Kwonka shi n’oha owaabaire naija kukora omurimo ogwo ogw’ahansi ogw’okubanaabisa ebigyere?

¹⁰ Yesu atarikweziringa akooreka obucureezi bw’omutaano. Entumwa bakatangaara munonga ku baareebire naakora omurimo ogwabaire gukorwa omukozi. Yesu akajuura ekijwaro kye, yaayezirika ekitambaara omunda, yaashuka amaizi omu baafu, yaatandika kubanaabisa ebigyere. (Yoh. 13:​4, 5) Nikibaasa kuba kyamutwariire obwire kunaabisa ebigyere by’entumwa 12 boona, otwariiremu na Yuda owaabaire naaza kumureebya. Kwonka, Yesu akakora omurimo ogwo kandi yaaguheza. Reero akabashoboorora ati: “Nimumanya eki naabakorera? Muunyeta Omwegyesa kandi Mukama waanyu; kandi eki murikugamba nikyo, ahabw’okuba nikwo ndi. Mbwenu ku ndaabe naabanaabisa ebigyere, haza ndi Mukama waanyu kandi Omwegyesa waanyu, naimwe kibashemereire kunaabisana ebigyere.”—Yoh. 13:​12-14.

11. Petero akooreka ata ngu akaba ayegire kuba omucureezi? (1 Petero 5:5) (Reeba n’ekishushani.)

¹¹ Petero akeegyera ahari Yesu okuba omucureezi. Bwanyima ya Yesu kugaruka omu iguru, Petero akakora eky’okutangaaza arikukiza omushaija owaazairwe aremaire ebigyere. (Byak. 1:​8, 9; 3:​2, 6-8) Eky’okutangaaza eki kikareetera abantu baingi kwerundaana. (Byak. 3:11) Mbwenu shi Petero akaba naija kwetaho omutima omu kaire ako, ahabw’okugira ngu akaba akuriire omu kicweka ahu abantu baabaire nibata omutima aha kurangaanwa n’okugira omwanya gw’ahaiguru? Ngaaha, Petero omu bucureezi akaha Yehova na Yesu ekitiinisa ekibashemereire, arikugira ati: “Omushaija ogu, ou murikureeba, kandi ou murikumanya, ahabw’okwikiriza eiziina rya Yesu, eiziina eryo niryo ryamuha amaani.” (Byak. 3:​12-16) Ebigambo ebi Petero yaakoreise arikuhandiikira Abakristaayo aha bukuru bw’okugira obucureezi, nibibaasa kutwijutsya obu Yesu yaayezirikire ekitambaara akanaabisa entumwa ze ebigyere.—Shoma 1 Petero 5:5.

12. Nka Petero, nitubaasa kugumizamu tuta kuba abacureezi?

¹² Nitubaasa kutooreza Petero turikuteeraho kuba abacureezi. Ijuka ngu obucureezi obwabuzima tiburikugarukira aha kukoresa ebigambo ebihikire. Ekigambo obucureezi eki Petero yaakoreise nikitwariramu n’ebiteekateeko by’omuntu. Nituhwera abandi ahabw’okugira ngu nitukunda Yehova n’abantu, beitu tihabw’okugira ngu nitwenda ngu batukunde. Twaheereza ab’eishe-emwe na banyaanyazi-itwe tushemereirwe, n’obu okuteeraho kwaitu kwakuba kutareebirwe, nituba nitworeka ngu turi abacureezi.—Mat. 6:​1-4.

GIRA EMITEEKATEEKYERE EHIKIRE

13. Shoboorora ekirikutwarirwa omu kugira emiteekateekyere ehikire.

¹³ Okugira emiteekateekyere ehikire nikitwariramu ki? (1 Pet. 4:7) Omukristaayo oine emiteekateekyere ehikire naakora kyona eki arikubaasa kucwamu ebirikuhikaana n’emiteekateekyere ya Yehova. Omukristaayo nk’ogwo naamanya ngu omukago gwe na Yehova nigwo gurikukirayo kuba ogw’omuhendo. Naaba ayeyineho emiteekateekyere eringaniire, arikumanya ngu taine eby’okugarukamu byona. Kandi naayoreka ngu naayesiga Yehova arikumushaba omu bucureezi obutoosha.b

14. Eizooba rimwe Petero akaremwa ata kwesiga Yehova?

¹⁴ Aha kiro ekyahereerukireyo Yesu ari haihi kwitwa, akarabura abeegi be ati: “Imwe mwena, eki kiro nimwija kumpemukaho.” Petero akagarukamu n’obumanzi ati: “N’obu abandi boona baraagwe bakakuhemukaho, nyowe tindikwija kukuhemukaho na kakye.” Ekiro ekyo Yesu akeehanangiriza abeegi be kuguma nibareeba kandi barikushaba. (Mat. 26:​31, 33, 41) Kuri noogira ngu Petero akakuratira obuhabuzi obwo, akaba naabaasa kutunga obumanzi bw’okwikiriza ngu n’omwegi wa Yesu. Omu mwanya gw’ekyo, Petero akeehakana Mukama we, kandi ekyo ekakyefuuza munonga.—Mat. 26:​69-75.

15. Yesu akabaasa ata kuguma aine emiteekateekyere ehikire aha kiro ekyahereerukireyo arikuza kwitwa?

¹⁵ Yesu akaba naayesigira kimwe Yehova. N’obu araabe yaabaire ahikiriire, akashaba emirundi mingi. Ekyo kikamubaasisa kutunga obumanzi bw’okukora ebirikuhikaana n’ekigyendererwa kya Yehova. (Mat. 26:​39, 42, 44; Yoh. 18:​4, 5) Petero okureeba Yesu arikushaba emirundi mingi kiine kuba kyamukwatsireho munonga ebiro by’amagara ge byona.

16. Petero akooreka ata ngu akaba agizire emiteekateekyere ehikire? (1 Petero 4:7)

¹⁶ Bwanyima y’obwire, Petero nawe akeega kwesiga Yehova arikushaba. Yesu ku yaazookire akahamiza Petero n’entumwa abandi ngu nibaija kutunga omwoyo ogurikwera kubaasa kuhikiiriza obujunaanizibwa bw’okubuurira. Kwonka, Yesu akabagambira kutegyerereza omuri Yerusaalemu kuhitsya ekyo kyabaho. (Luk. 24:49; Byak. 1:​4, 5) Petero akakora ki obu yaabaire ateegyereize? We n’Abakristaayo bagyenzi be ‘bakeezirika kuguma nibashaba.’ (Byak. 1:​13, 14) Bwanyima omu baruha ye y’okubanza, akahiga Abakristaayo bagyenzi be kuba n’emiteekateekyere ehikire, n’okwesiga Yehova barikushaba. (Shoma 1 Petero 4:7.) Petero akeega kwesiga Yehova, kandi yaaba enyomyo omu kibiina.—Gal. 2:9.

17. Twine kugumizamu nitukora ki n’obu twakuba twine okubaasa kw’omutaano? (Reeba n’ekishushani.)

¹⁷ Kubaasa kugira emiteekateekyere ehikire, twine kushaba Yehova butoosha. Nitumanya ngu twine kugumizamu nitushaba Yehova n’obu twakuba twine okubaasa kw’omutaano. N’ahabw’ekyo, twaba twine kucwamu aha nshonga nkuru, nitushaba Yehova obuhabuzi, twine obwesigye ngu naamanya ekirikukirayo oburungi ahariitwe.

18. Nitubaasa kwongyera tuta kugira emiteekateekyere nk’eya Yehova?

¹⁸ Ka nitwesiima munonga kureeba ngu Yehova akatuhanga turikubaasa kugira emitwarize nk’eye! (Kut. 1:26) Amazima gari ngu titurikubaasa kutooreza Yehova omu muringo oguhikiriire. (Isa. 55:9) Kwonka nka Petero, nitubaasa kwongyera kugira emiteekateekyere nk’eye. Ka tumariirire kuguma nitugira emiteekateekyere nk’eya Ruhanga, tube abacureezi, kandi tugire emiteekateekyere ehikire.