Ebibuuzo Kuruga omu Bashomi
Ni ‘naama’ ki ei Yehova araate omu mitima y’amahanga omu biro by’omumaisho?
Okushuuruurwa 17:16, 17 nihagamba aha kutandika kw’okubonabona okwingi harikugira hati: ‘Kandi amahembe ikumi agu waareeba hamwe n’enyamaishwa nibaija kwanga maraaya ogwo atsigare wenka ajwaire busha, nibaija kurya enyama ye, bamwokyeze kimwe n’omuriro, ahakuba Ruhanga akakita omu mitima yaabo ngu bahikiirize enaama ye [nari ekiteekateeko kye], ahabw’okugira omutima gumwe okuha enyamaishwa egyo obushoboorozi bw’okutegyeka obugabe bwabo.” Enyimaho, ebitabo byaitu bitwire nibigira ngu Yehova naaza kuta omu mahanga ‘ekiteekateeko’ ky’okucwekyereza ediini z’ebishuba.
Kwonka, nitwetenga kukoramu empinduka. Ekiteekateeko eki Yehova araate omu mitima y’amahanga ‘n’okuha enyamaishwa obushoboorozi bw’okutegyeka obugabe bwabo.’ Kubaasa kwetegyereza oku obunabi obu buraahikiirire ka tushwijume ebibuuzo ebi.
Ni baahi abarikugambwaho omu bunabi obu? “Maraaya” orikwetwa “Babulooni Orukuru” naajwekyera amadiini g’ebishuba goona omu nsi. Kandi “enyamaishwa erikutukura” n’akamanyiso k’ekibiina ekyatandikirweho omuri 1919 nk’Ekigombe ky’Amahanga Agakwataniise kandi hati nikimanywa nk’eky’Amahanga Ageeteeraine. (Kush. 17:3-5) “Amahembe ikumi” nigajwekyera gavumenti zoona ezirikushagika enyamaishwa.
Maraaya aine kakwate ki n’enyamaishwa erikutukura? Maraaya ogwo atwire “ashutami” aha nyamaishwa, arikugishagika, kandi arikuteeraho kugireetera kukora ebi arikwenda n’okugitegyeka.
Niki ekiraahike ahari maraaya? Enyamaishwa hamwe n’amahembe ikumi agarikugishagika ‘nibaija kwanga maraaya ogwo.’ Nibaija kumugirira rwango, banyage eby’obugaiga bye, kandi basheeshuure obubi bwe. Nibaija kuhikiiriza ekigyendererwa kya Ruhanga barikumucwekyerereza kimwe. (Kush. 17:1; 18:8) Egyo niyo eraabe muheru y’amadiini g’ebishuba. Kwonka ekyo kitakabaireho, Yehova naaza kureetera amahanga kukora ekintu ekitakabahoga omu byafaayo by’obutegyeki bw’abantu.
Yehova naaza kureetera amahanga kukora ki? Naaza kuta ‘enaama’ ye nari ekiteekateeko kye omu mitima y’amahembe ikumi “kuha egyo nyamaishwa [erikutukura] amaani gaabo n’obushoboorozi bwabo.” (Kush. 17:13) Mbwenu shi ekyo nikimanyisa ngu gavumenti z’abantu niziija kucwamu zeekundiire kuha enyamaishwa erikutukura amaani gaazo n’obushoboorozi? Ngaaha! Obunabi nibworeka ngu Ruhanga niwe araazireetere kukora ekyo. (Enf. 21:1; gyeragyeranisa Isaaya 44:28.) Mbwenu shi gavumenti niziija kuhayo amaani gaazo mporampora? Ngaaha! Hatariho kubangaanisa, empinduka egi neija kubaho kitaraariire kandi ahonaaho. Reero, enyamaishwa neeza kuhikiiriza orubanja oru Ruhanga acwereire amadiini g’ebishuba egacwekyerereze kimwe.
Mbwenu shi niki eki twine kuguma nitwijuka? Titwine kusherura amakuru agarikugamba aha ku gavumenti zirikushagika Ekibiina ky’Amahanga Ageeteeraine mporampora. Twine kwijuka ngu Yehova naija kuta ekiteekateeko omu mitima y’amahanga kuha enyamaishwa amaani. Ekyo ku kiraabeho, nitwija kumanya ngu okubonabona okwingi kuri haihi kutandika. Kwonka ekyo kitakabaireho ka “turekye kugwejegyera nk’abandi kureka tugume nitureeba” ahabw’okuba empinduka ezi ziri haihi kubaho kitaraariire!—1 Tes. 5:6.