‘Rinda Obumwe bw’Omwoyo’
ENTUMWA PAULO akahiga Abakristaayo omuri Efeso arikubagira ngu mugume “nimugumisiririzana omuri rukundo, nimwezirika kurinda obumwe bw’omwoyo, muteerainwe omurunga gw’obusingye.”—Efe. 4:2, 3.
Omwoyo ogurikwera nigwo gurikutubaasisa kugira obumwe. Kwonka Paulo akagira ngu nikyetengyesa kurinda obumwe obwo. Ni baahi abaine kuburinda? Buri Mukristaayo aine kugira eki yaakoraho “kurinda obumwe bw’omwoyo.”
Nk’eky’okureeberaho, ka tugire ngu omuntu yaakugabira emotoka nsya. Mbwenu shi n’oha oine kuguma naagireeberera kugira ngu egume neekora gye? Hatariho okubangaanisa niiwe oine kukora ekyo. Kandi emotoka egyo yaafa ahabw’okugira ngu togireebeereire gye, torikubaasa kucwera orubanja owaagikuhaire.
Nikyo kimwe, n’obu Ruhanga araabe atuhaire ekiconco ky’obumwe bw’Ekikristaayo, buri omwe ahariitwe aine obujunaanizibwa bw’okuburinda. N’ahabw’ekyo twaba twine obutaikirizana n’ow’eishe-emwe nari munyaanyazi-itwe, twine kwebuuza tuti: ‘Ndiyo ninkora kyona eki ndikubaasa kurinda obumwe bw’omwoyo ndikuteeraho kugaruraho obusingye?’
‘YEZIRIKE KURINDA OBUMWE BW’OMWOYO’
Nk’oku Paulo yaagambire, obumwe nituba twine kuteeraho munonga kurinda obumwe bw’omwoyo. Ekyo ni kikuru na munonga ow’eishe-emwe nari munyaanyazi-itwe yaatugwisa kubi. Mbwenu shi kubaasa kurinda obumwe nikimanyisa ngu butoosha oine kugamba n’omuntu okugwisize kubi oku orikwehurira? Obumwe tikirikwetengyesa. Yebuuze oti, ‘Naakuriiriza enshonga egi, ninza kuba naareetaho obumwe, nari nimba naayongyera kugumisa embeera?’ Omu mbeera ezimwe, n’eky’obwengye kwehuzya enshonga, nari kusaasira okugwisize kubi.—Enf. 19:11; Mak. 11:25.
Yebuuze oti, ‘Naakuriiriza enshonga egi, ninza kuba naareetaho obumwe, nari nimba naayongyera kugumisa embeera?’
Entumwa Paulo akahandiika arikutuhiga kugumizamu ‘nitugumisiririzana omuri rukundo.’ (Efe. 4:2) Okucondooza kumwe nikworeka ngu ebigambo ebi nibibaasa kuvunuurwa nka “okubaakiira nk’oku bari.” Ekyo nikimanyisa ngu twine kwijuka ngu ab’eishe-emwe bagyenzi baitu tibahikiriire, nk’oku naitwe tutahikiriire. Amazima gari ngu, nituteeraho ‘kujwara omuntu omusya.’ (Efe. 4:23, 24) Kwonka, tihariho n’omwe ahariitwe orikubaasa kukora ekyo omu muringo oguhikiriire. (Rom. 3:23) Twaguma nitwijuka ekyo, nikitworobera kugumisiririza abandi, n’okubasaasira. N’ekirikurugamu ‘niturinda obumwe bw’omwoyo.’
Twasaasira abandi kandi tukehuzya enshobe zaabo, nitwija kugumizamu ‘tuteerainwe omurunga gw’obusingye.’ Ekigambo ky’Orugriika ekyavuunwirwe ‘nk’omurunga’ omu Abaefeso 4:3 nikigambwaho “nk’emitsi y’engingo” omu Abakolosai 2:19. Emitsi egi niyo erikukwatanisa eigufa aha rindi kukora engingo. Omu muringo nigwo gumwe, obusingye na rukundo ebi twiniire ab’eishe-emwe, nibituhwera kuguma nitukwatanisa n’obu twakugira obutaikirizana nabo.
N’ahabw’ekyo Omukristaayo mutaahi waawe yaakugwisa kubi nari yaakukora ekibi teeraho kumutwariza omu muringo gw’esaasi omu mwanya gw’okuta omutima aha nshobe ze. (Kol. 3:12) Twena tutahikiriire, n’ahabw’ekyo naiwe obumwe haine ou oragwisize kubi. Okwijuka ekyo nikiija kutuhwera kukora ekirikubaasika “kurinda obumwe bw’omwoyo.”