Omuringo Murungi gw’Okwega Baibuli Okunzire Kandi Okagasirwa

Yoshua naashoma Ebiragiro; engo za Yeriko nizigwa kandi enju ya Rahabu yaaguma eyemereire; Yoshua naashaba arikureeba ahaiguru

YOSHUA akaba aine kwebembera Abaisraeli akabatwara omu Nsi Eyaaraganisiibwe. Eki kikaba kitarikwija kumworobera. Kwonka, Yehova akamuhwera kandi yaamugumya arikumugira ati: “Ba ow’amaani, ogumire kimwe omutima.” Akagambira Yoshua ngu ku araashome kandi akoorobera Ekitabo ky’Ebiragiro, naija kucwamu gye kandi naija n’okuba omusinguzi.—Yoshua 1:7, 8.

Turi omu ‘biro by’akabi kaingi,’ n’ahabw’ekyo embeera zigumire. (2 Timoseo 3:1) Twaba nitwenda kuba abasinguzi nka Yoshua, twine kworobera obuhabuzi obu Yehova yaamuhaire. Twine kushoma Baibuli buri izooba kandi ebi turikwega tukabikoresa kucwamu gye.

Kwonka bamwe ahariitwe nitubaasa kuba tutarikumanya kweyegyesa Baibuli, nari titurikukukunda. Beitu, okweyegyesa Baibuli ni kukuru munonga. Omu kabokisi “Gyendera aha Buhabuzi Obu,” noija kureeba ebirikubaasa kukuhwera omu kweyegyesa Baibuli n’okwongyera kukunda kugishoma.

Omuhandiiki wa zaaburi akeeshongora ati: ‘Ongyendese omu muhanda gw’ebiragiro byawe; ahakuba nigwo nshemerererwamu.’ (Zaaburi 119:35) Naiwe noobaasa kukunda kweyegyesa Ekigambo kya Ruhanga. Noija kushangamu eby’omuhendo bingi waagumizamu nooyeyegyesa Baibuli.

N’obu kitarikukwetengyesa kwebembera eihanga nk’oku Yoshua yaakozire, oine oburemeezi bwawe bw’omutaano. N’ahabw’ekyo nka Yoshua, yega Ekigambo kya Ruhanga kandi okyorobere. Waakora otyo, noija kucwamu gye kandi obe omusinguzi.

GYENDERA AHA BUHABUZI OBU

Okweyegyesa kutandikye n’okushaba. Baibuli erimu ebiteekateeko bya Yehova, ebyahandiikirwe kutuhwera. N’ahabw’ekyo waaza kushoma Baibuli, shaba Yehova kukuhwera kwetegyereza ebi orikushoma, kubiijuka n’okukoresa ebi waayega okucwamu gye.—Ezera 7:10.
Yebuuze ebibuuzo waaba nooshoma Baibuli nari ebitabo ebirikushoboorora ahari Baibuli. Nk’eky’okureeberaho: ‘Ekicweka eki nikinyegyesa ki ahari Yehova? Eki kiine kakwate ki n’omutwe gwa Baibuli? Nimbaasa kukoresa nta ebi naayega kuhwera abandi?’
Teekateeka aha bi orikwega. Oshome orikwemereramu kuteekateeka aha bi orikushoma. Yebuuze oti: ‘Eki nikindeetera kwehurira nta? Ahabw’enki ninyehurira nti? Eki kiine kakwate ki n’ebi naarabiremu enyima, ebi ndikurabamu hati, nari ebirikubaasa kumbaho omu biro by’omumaisho? Obuhabuzi obu nari emisingye egi ey’omu Baibuli nimbaasa kugigyenderaho nta?’ (Yobu 23:5; Zaaburi 49:3) Omu kuteekateeka kwawe teeraho kumanya ahabw’enki Yehova yaagambiire abantu be kwetantara ebikorwa bimwe. Nari teekateeka aha byabaire nibibaasa kurugamu ku ogire ngu omuntu ou orikushomaho akatwaza omu muringo gw’omutaano.—Eky’Ebiragiro 32:28, 29.
Teera akashushani waaba nooshoma. Nk’eky’okureeberaho, noobaasa kuteekateeka aha kyahikire ahari Yosefu obu beene ishe baamuguza Abaishimaeli? (Okutandika 37:18-28) Niki eki orikureeba nari kuhurira? Yete omu bigyere by’abu orikushomaho. Bakaba nibateekateeka ki nari nibeehurira bata? Waakoresa okubaasa kwawe kw’okuteera akashushani noija kwongyera kugasirwa omu kweyegyesa kwawe.
Koresa eby’okutuhwera omu kucondooza ebituhairwe ekibiina. Ebi nibibaasa kukuhwera kukunda kucondooza. Yega kukoresa ebyo ebiriho omu rurimi rwawe, ebiri aha mukura, n’ebitairwe. Otatiina kushaba abandi kukuhwera kwega kubikoresa gye. Nk’eky’okureeberaho, Watch Tower Publications Index nari Akatabo Akarikuhwera omu Kucondooza ak’Abajurizi ba Yehova, nibiija kukuhwera kutunga ebirikushoboorora enshonga zitari zimwe n’Ebyahandiikirwe. Koresa ebyongyeirweho omu New World Translation of the Holy Scriptures yaaba eriho omu rurimi oru orikubaasa kushoma. Noija kushangamu ebirikukwata aha myanya y’omu Baibuli, obwire, ebipimiso, n’ebindi.
Ta omutima aha nshonga enkuru. Eki nikiija kukuhwera kwijuka eki waayega. Kandi, okugambira abandi eki waayega nikuhwera kwijuka. Omu bi waashoma harimu ebi orikubaasa kukoresa omu kubuurira? Waakora otyo, torikwija kwebwa enshonga enkuru, kandi abandi nibaija kugasirwa omu kweyegyesa kwawe.