Okubonabona Kwingi Niki?

Eki Baibuli erikugarukamu

Omu kubonabona kwingi abantu nibaija kutunga oburemeezi bwingi obutakabahoga. Kurugiirira aha bunabi bwa Baibuli, nikwija kubaho ‘omu biro by’emperu,’ nari ‘omu bunaku bw’emperu.’ (2 Timoseo 3:1; Danieli 12:4) Nikwija kuba “okubonabona kwingi okutakabahoga okwiha aha kuhangwa kw’ensi okuhitsya hati, kandi” tikurikwija kugaruka kubaho bundi.—Mako 13:19; Danieli 12:1; Matayo 24:21, 22.

Ebiraabeho omu kubonabona kwingi

• Okucwekyerera kw’ediini y’ebishuba. Ediini y’ebishuba neija kucwekyerera aha bwira burikutangaaza. (Okushuuruurwa 17:1, 5; 18:9, 10, 21) Ekibiina ky’eby’obutegyeki eky’Amahanga Ageeteeraine nikyo kiraacwekyereze ediini y’ebishuba.—Okushuuruurwa 17:3, 15-18.a

• Okutaahirira okuramya okuhikire. Amahanga ageegaitsire hamwe agu Ezekieli yaareebire omu kworekwa agarikugambwaho nka “Googi omu nsi ya Magoogi,” nigaija kugyezaho kwenda kumaraho abari omu diini ehikire. Kwonka, Ruhanga naija kurinda abaheereza be kutacwekyerezibwa.—Ezekieli 38:1, 2, 9-12, 18-23.

• Okuramura abantu omu nsi. Yesu naija kuramura abantu boona omu nsi, kandi naija ‘kushoroora [abantu aha bandi], nk’oku omuriisa arikushoroora entaama omu mbuzi.’ (Matayo 25:31-33) Abantu nibaija kuramurwa kurugiirira aha ku buri omwe yaashagikire beene-ishe Yesu abarikuza kutegyeka omu iguru, nari oku yaayangire kubashagika.—Matayo 25:34-46.

• Okurundaana abaraategyeke omu Bukama. Abeesigwa abatoorainwe kutegyeka na Kristo abaraabe bakiriho, nibaija kuhendera obuheereza bwabo omu nsi bazoorwe baze omu iguru.—Matayo 24:31; 1 Abakorinso 15:50-53; 1 Abatesalonika 4:15-17.

• Haramagedoni. Orutaro oru “orw’ekiro kikuru kya Ruhanga ow’Obushoboorozi Bwona,” kandi nirwetwa “ekiro kya” Yehova. (Okushuuruurwa 16:14, 16; Isaaya 13:9; 2 Petero 3:12) Abo abarasingwe orubanja, Kristo naija kubacwekyereza. (Zefania 1:18; 2 Abatesalonika 1:6-10) Eki nikiija kutwariramu entebeekanisa y’eby’obutegyeki omu nsi yoona, erikworekwa omu Baibuli nk’enyamaishwa y’emitwe mushanju.—Okushuuruurwa 19:19-21.

Ebiraabeho bwanyima y’okubonabona kwingi

• Okukomwa kwa Sitaane na baadaimoni. Maraika omukuru naija kunaga Sitaane na baadaimoni “omu kiina ekitaine bugarukiro,” omu muringo gw’akamanyiso ekirikumanyisa okutagira eki baagaruka kukora bari nk’abafiire. (Okushuuruurwa 20:1-3) Sitaane omu kiina ekyo naija kuba ari nk’ori omu kihome, atarikubaasa kuhabisa omuntu weena.—Okushuuruurwa 20:7.

• Obutegyeki bw’Emyaka Rukumi kutandika. Emyaka 1,000 ey’okutegyeka kw’Obukama bwa Ruhanga neija kutandika, reero abantu omu nsi batungye emigisha nyamwingi. (Okushuuruurwa 5:9, 10; 20:4, 6) Abantu nyamwingi abatarikubaasa kubarwa nibaija kuruga “omu kubonabona kwingi,” bagume bahuriire, reero bareebe okutandika kw’obutegyeki bw’emyaka rukumi omu nsi.—Okushuuruurwa 7:9, 14; Zaaburi 37:9-11.