Ahabw’enki Yesu Naayetwa Omwana wa Ruhanga?

Eki Baibuli erikugarukamu

Baibuli neekira kweta Yesu “Omwana wa Ruhanga.” (Yohaana 1:49) Ebigambo “Omwana wa Ruhanga” nibyoreka ngu Ruhanga niwe Omuhangi, nari obukomooko bw’amagara goona, otwariiremu aga Yesu. (Zaaburi 36:9; Okushuuruurwa 4:11) Baibuli terikwegyesa ngu Ruhanga akazaara omwana nk’oku abantu barikuzaara.

Kandi Baibuli neeyeta baamaraika “abaana ba Ruhanga.” (Yobu 1:6) Na Baibuli neegira ngu omuntu w’okubanza Adamu akaba ari omwana ‘wa Ruhanga.’ (Luka 3:38) Kwonka, ahabw’okugira ngu Yesu niwe yaabandize kuhangwa kandi ou Ruhanga yaayehangiire butunu, nikyo Baibuli erikumwetera Omwana wa Ruhanga ow’omujigaijo.

• Yesu akaba naatuura omu iguru atakazairwe omu nsi?

• Yesu akaba naakora ki atakaizire omu nsi?

Yesu akaba naatuura omu iguru atakazairwe omu nsi?

Eego. Yesu akaba ari ow’omwoyo atakazairwe omu nsi nk’omuntu. Yesu wenyini akagira ngu ‘akaruga omu iguru.’—Yohaana 6:38; 8:23.

Ruhanga akahanga Yesu atakahangire ekindi kintu. Baibuli neegamba ahari Yesu eti:

• ‘N’omujigaijo omu byahangirwe byona.’—Abakolosai 1:15.

• ‘N’obukomooko bw’ebihangirwe bya Ruhanga.’—Okushuuruurwa 3:14.

Yesu akahikiiriza obunabi oburikukwata ahari ogwo “ou obukomooko bwe buri obwa iranaira.”—Miika 5:2; Matayo 2:4-6.

Yesu akaba naakora ki atakaizire omu nsi?

Akaba aine omwanya gw’ekitiinisa omu iguru. Yesu akagamba aha mwanya ogu obu yaashaba ati: “Taata, mpimbisa . . . n’ekitiinisa ekyo eki naabaire nyine naiwe, ensi etakahangirwe.”—Yohaana 17:5.

Akahwera Ishe omu kuhanga ebintu ebindi byona. Yesu akakora hamwe na Ruhanga ‘nk’omukozi mukuru.’ (Enfumu 8:30) Baibuli neegamba ahari Yesu eti: “Omuri ogwo nimwo ebintu byona byahangiirwe, eby’omu iguru n’eby’ahansi.”—Abakolosai 1:16.

Ruhanga akahanga ebintu ebindi byona ebiriho kurabira omuri Yesu. Ebi nibitwariramu ebihangirwe ebindi eby’omwoyo, n’ebindi byona ebirikureebwa n’amaisho. (Okushuuruurwa 5:11) Enkoragana ya Ruhanga na Yesu omu kuhanga neebaasa kugyeragyeranisibwa n’ey’omuntu orikuteera puraani y’okwombeka hamwe n’omwombeki. Orikuteera puraani yaaheza kugiteera, omwombeki niyo arikukuratira omu kwombeka ekyombeko.

Akaba ari Kigambo. Baibuli neegamba ahari Yesu ataizire mu nsi erikumweta “Kigambo.” (Yohaana 1:1) Buzima, eki nikimanyisa ngu Ruhanga akaba naakoresa Omwana kutwarira ebihangirwe by’omwoyo ebindi obutumwa n’obuhabuzi.

Kandi Yesu naabaasa kuba yaakozire nk’omugambirizi wa Ruhanga arikureetera abantu obutumwa omu nsi. Ruhanga naabaasa kuba yaagambire kurabira omuri Yesu nka Kigambo obu yaabaire naaha Adamu na Haawa eby’okukuratira omu kibanja Edeni. (Okutandika 2:16, 17) Yesu naabaasa kuba niwe maraika owaabaire naayebembera Abaisraeli kubarabya omu ihamba, kandi ou Abaisraeli baabaire baine kworobera eiraka rye.—Okuruga 23:20-23.a