Emyaka nk’ebiri Abababulooni baherize kucwekyereza Yerusaalemu, Omugabe Nebukadeneeza owa Babulooni akagira okutiina ahabw’ekirooto ekyabaire nikikwata aha kishushani rutaaba. Akatiinatiinisa kwita abahi b’obwengye boona otwariiremu Danieli, baaremwa kumugambira ekirooto kye n’amakuru gaakyo. (Dan. 2:​3-5) Danieli akaba aine kugira eki yaakora ahonaaho, kitari ekyo bakaba nibaza kubaita. Akaza ow’omugabe “yaamushaba kumuha obunaku, obu araizireho kumushobororera amakuru g’ekyo kirooto.” (Dan. 2:16) Ekyo kikaba nikyetengyesa obumanzi n’okwikiriza. Tihariho ekirikworeka ngu Danieli akaba araashobooroireho ebirooto. Akagambira bagyenzi be “kushaba Ruhanga ow’omu iguru kubagirira embabazi akabashuuruurira ekyo kigambo.” (Dan. 2:18) Yehova akagarukamu okushaba kwabo. Ahabw’obuhwezi bwa Ruhanga, Danieli akashoboororera Nebukadeneeza amakuru g’ekirooto. Danieli n’abagyenzi be bakahonokaho. w23.08 3 ¶4

Teekateeka aha birungi ebirikuruga omu kugumisiriza. Twaba nitugumisiriza, nitushemererwa kandi nituguma twikaikaine. N’ahabw’ekyo okugumisiriza nikutuhwera kugira amagara marungi. Twagumisiririza abandi, nitugira enkoragana nungi nabo. Ekibiina kyaitu nikyongyera kugira obumwe. Omuntu yaatugwisa kubi, twaba tutarikurahuka kugira ekiniga nitureetera embeera kutongyera kusiisikara. (Zab. 37:8; Enf. 14:29) Ekikuru munonga, nituba nitutooreza Tataitwe ow’omu iguru, kandi nitwongyera kumwirira haihi. Okugumisiriza ka n’omutwarize murungi ogurikutugasira! N’obu kiraabe kitoorobi kugumisiriza obutoosha, nitubaasa kworeka omutwarize ogu ahabw’obuhwezi bwa Yehova. Twagumisiriza tutegyereize ensi ensya, nitubaasa kugira obwesigye ngu ‘eriisho rya [Yehova] niriguma aha barikumutiina’ abarikutegyereza ngu abagirire rukundo etarikuhinduka. (Zab. 33:18) Ka tumaririire kugumizamu nitujwara okugumisiriza. w23.08 22 ¶7; 25 ¶16-17

Yakobo akooreka ngu omushaija naabaasa kuteekateeka ngu aine okwikiriza, kwonka ebikorwa bye bitarikukyoreka. (Yak. 2:​1-5, 9) Yakobo akagamba n’aha muntu orikureeba ‘munyaanya nari mwene ishe ataine by’okujwara nari eby’okurya,’ akabura kugira eki yaakora kumuhwera. Omuntu nk’ogwo n’obu yaakugira ngu aine okwikiriza, ebikorwa bye nibyoreka ngu naaba atakwine. (Yak. 2:​14-16) Yakobo akagamba ahari Rahabu nk’eky’okureeberaho kirungi ky’owaayorekire okwikiriza omu bikorwa. (Yak. 2:​25, 26) Akahurira ebirikukwata ahari Yehova, kandi akamanya ngu Yehova akaba naashagika Abaisraeli. (Yos. 2:​9-11) Akooreka omu bikorwa ngu aine okwikiriza, arikushereka Abaisraeli babiri entatsi abu amagara gaabo gaabaire gari omu kabi. N’ekyarugiremu, omukazi ogwo owaabaire atari Mwisraeli kandi atahikiriire akeetwa ohikiriire nk’Abrahamu. Eky’okureeberaho kye nikihamya ngu ni kikuru kworeka ngu twine okwikiriza omu bikorwa. w23.12 5-6 ¶12-13