Naitwe abaheereza ba Yehova niturwara, kandi tuhikwaho embeera zigumire ezirikuhika aha bantu boona. Nikibaasa n’okutwetengyesa kugumisiriza okuhakanisibwa nari okuhiiganisibwa abarikwanga abaheereza ba Ruhanga. N’obu Yehova atarikuzibira ebintu bibi ebyo kutuhikaho, naaraganisa kutuhwera. (Isa. 41:10) Ahabw’obuhwezi bwe, nitubaasa kuguma twine okushemererwa, tucwemu gye, kandi tugume tumuhamiireho n’omu mbeera ezigumire munonga. Yehova naaraganisa kutuha eki Baibuli erikweta “obusingye bwa Ruhanga.” (Fil. 4:​6, 7) Obusingye obu, n’okwikaikana kw’omu biteekateeko n’obunanukye bw’omu mutima ebi turikutunga ahabw’okugira omukago murungi nawe. Obusingye obwo ‘burengire okwetegyereza kw’omuntu weena,’ kandi ni burungi kukira oku turikuteekateeka. Orashabire Yehova, reero bwanyima okagira obusingye? Enyehurira egyo nibwo ‘busingye bwa Ruhanga.’ w24.01 20 ¶2; 21 ¶4

Abantu abeesigwa nibahimbisa eiziina rya Yehova n’omutima gwabo gwona ahabwa rukundo ei bamwiniire. Omugabe Daudi akeetegyereza ngu okuhimbisa eiziina rya Yehova nikyo kimwe n’okuhimbisa Yehova wenyini. Eiziina rya Yehova niritwariramu eki ari, ekirikumanyisa emitwarize ye mirungi, n’ebikorwa bye ebirikutangaaza. Daudi akaba naayenda kuhimbisa eiziina rya Ishe, n’okuritwara nk’eririkwera. Ekyo akaba naayenda kukikora “na byona ebiri” omuriwe, ekirikumanyisa omutima gwe gwona. Nikyo kimwe, Abaleevi bakaba nibeebembera abandi omu kuhimbisa Yehova. Omu bucureezi bakaikiriza ngu ebigambo byabo bikaba bitarikubaasa kuhimbisa gye eiziina rya Yehova eririkwera nk’oku kishemereire. (Neh. 9:5) Buzima, Yehova akashemererwa ahabw’obucureezi nk’obwo n’okumuhimbisa baihire aha mutima. w24.02 9 ¶6

Yehova tarikwija kukureeba nk’oremirwe waaba otahikire aha kigyendererwa eki ekikurengire. (2 Kor. 8:12) Okuremwa kwawe kureebe nk’eishomo eri oine kwegyeraho. Ta omutima aha ki waaherize kuhikiiriza. Baibuli neegira ngu “Ruhanga t’otahikiriire kwebwa emirimo yaanyu.” (Heb. 6:10) N’ahabw’ekyo naiwe toine kwebwa ebi waaherize kuhikiiriza. Teekateeka aha bigyendererwa ebi waahikireho, nk’okugira omukago murungi na Yehova, okugambira abandi ebirikumukwataho, n’okubatizibwa. Nk’oku waabaasize kuhika ahari ebyo, noobaasa kuhika n’aha bigyendererwa ebindi ebi otaireho. Ahabw’okuhwerwa Yehova, noobaasa kuhika aha kigyendererwa kyawe. Waateeraho kuhika aha kigyendererwa ky’eby’omwoyo, oteebwa kureeba oku Yehova arikukuhwera n’emigisha ei arikukuha omu rugyendo rwawe. (2 Kor. 4:7) Waaba otaruhire kugumizamu nootaho ebigyendererwa, noija kutunga emigisha mingi.—Gal. 6:9. w23.05 31 ¶16-18