Yehova tarikwija kukureeba nk’oremirwe waaba otahikire aha kigyendererwa eki ekikurengire. (2 Kor. 8:12) Okuremwa kwawe kureebe nk’eishomo eri oine kwegyeraho. Ta omutima aha ki waaherize kuhikiiriza. Baibuli neegira ngu “Ruhanga t’otahikiriire kwebwa emirimo yaanyu.” (Heb. 6:10) N’ahabw’ekyo naiwe toine kwebwa ebi waaherize kuhikiiriza. Teekateeka aha bigyendererwa ebi waahikireho, nk’okugira omukago murungi na Yehova, okugambira abandi ebirikumukwataho, n’okubatizibwa. Nk’oku waabaasize kuhika ahari ebyo, noobaasa kuhika n’aha bigyendererwa ebindi ebi otaireho. Ahabw’okuhwerwa Yehova, noobaasa kuhika aha kigyendererwa kyawe. Waateeraho kuhika aha kigyendererwa ky’eby’omwoyo, oteebwa kureeba oku Yehova arikukuhwera n’emigisha ei arikukuha omu rugyendo rwawe. (2 Kor. 4:7) Waaba otaruhire kugumizamu nootaho ebigyendererwa, noija kutunga emigisha mingi.—Gal. 6:9. w23.05 31 ¶16-18

Yehova naakunda kworeka ngu naasiima abu arikukunda. Ebyahandiikirwe nibyoreka emirundi ebiri obu Yehova yaagambira Yesu ngu niwe Mwana we ou arikukunda kandi ou arikusiima. (Mat. 3:17; 17:5) Okaayenzire kuhurira Yehova arikukuhamiza ngu naakusiima? Yehova tarikugamba naitwe butunu omu iraka ririkuhurirwa, kwonka naagamba naitwe kurabira omu Kigambo kye. Nitubaasa “kuhurira” eiraka rya Yehova ery’okusiima twashoma ebigambo bya Yesu ebiri omu bitabo by’Engiri. Yesu akooreka gye emitwarize nk’eya Ishe. N’ahabw’ekyo, twashoma aha ku yaayorekire ngu naasiima abakuratsi be abatahikiriire, nooba nooshusha ngu Yehova naatugambira ebigambo ebyo. Twagyezibwa, tikirikumanyisa ngu Yehova takitusiima. Kureka, embeera nk’ezo nizitubaasisa kworeka ngu nitukunda Ruhanga kandi nitumwesiga.—Yak. 1:12. w24.03 28 ¶10-11

Waaba ori omuzaire, hwera abaana baawe kutebeekanisa eby’okugarukamu ebirikuhikaana n’emyaka yaabo. Obumwe, ekicweka nikibaasa kuba kirimu enshonga z’amaani, nk’oburemeezi bw’omu bushwere nari eby’emicwe, kwonka nihaba harimu akacweka kamwe nari bubiri ahu omwana arikubaasa kugarukamu. Kandi hwera abaana baawe kwetegyereza ahabw’enki obumwe nibabaasa kutatooranwa baahanika omukono. Okubashoboororera ekyo nikibaasa kubahwera kutaguubwa kubi abandi baaba nibo batooranwa kugarukamu. (1 Tim. 6:18) Twena nitubaasa kutebeekanisa eby’okugarukamu ebirikuhimbisa Yehova kandi ebirikugumya Abakristaayo bagyenzi baitu. (Enf. 25:11) N’obu obumwe turikubaasa kugamba omu bugufu ebi turabiremu, twine kwetantara kwegambaho ekirenga. (Enf. 27:2; 2 Kor. 10:18) Kureka, twine kuteeraho kuta omutima ahari Yehova, Ekigambo kye, n’abaheereza be.—Kush. 4:11. w23.04 24-25 ¶17-18