Twine kukora ki kubaasa kugira obumanzi? Abazaire baitu nibabaasa kutuhiga kugira obumanzi, kwonka tibarikutuzaara twine omutwarize ogwo. Okugira obumanzi kiri nk’okwega omwoga musya. Noobaasa kwega omwoga waayetegyereza gye eki omwegyesa arikukora reero okamutooreza. Naitwe, nitugira obumanzi twayegyetereza oku abandi barikworeka omutwarize ogwo reero tukabatooreza. Nka Danieli, twine kumanya gye Ekigambo kya Ruhanga. Twine kugira omukago murungi na Yehova turikugamba nawe twihire aha mutima. Kandi twine kwesiga Yehova, turikuhamiza kimwe ngu ariho kutuhwera. Okwikiriza kwaitu kwagyezibwa, nitwija kuba twine obumanzi. Abantu emanzi nibakira kuheebwa abandi ekitiinisa. Kandi nibabaasa kureetera ab’emitima eshemereire kwenda kwega ahari Yehova. Buzima, hariho enshonga nungi ahabw’enki twine kuba emanzi. w23.08 2 ¶2; 4 ¶8-9

Ekigambo ky’Orugriika ekirikuvunuurwa nka “mugyeze byona” kikaba nikikoresibwa kworeka oku abantu baabaire nibagyeza ebyoma nk’ezaabu n’efeeza kuhamya byaba bihikire. N’ahabw’ekyo, twine kugyezesa ebi turikuhurira nari ebi turikushoma kuhamya ngu bihikire. Kandi eki nikiija kuba kikuru ahariitwe obu okubonabona kwingi kuri haihi. Omu mwanya gw’okwikiriza byona ebi abandi barikugamba, nitukoresa okubaasa kwaitu kw’okuteekateeka turikugyeragyeranisa ebi turikushoma nari ebi turikuhurira n’obuhabuzi bw’ekibiina kya Yehova n’ebi Baibuli erikwegyesa. Twakora tutyo, titurikwija kubeihwabeihwa pokopoko ya baadaimoni. (Enf. 14:15; 1 Tim. 4:1) Abaheereza ba Ruhanga nibaija kuhonokaho nka guruupu omu kubonabona kwingi. Kwonka buri omwe ahariitwe, tarikumanya ekirikwija kubaho. (Yak. 4:14) Yaaba tuhonokaho omu kubonabona kwingi nari tufa kutakabaireho, nitwija kutunga ekiconco ky’amagara agatahwaho twaguma turi abeesigwa. Twena ka tugume tutaire omutima aha matsiko g’omuhendo kandi tugume twetebeekanisiize ekiro kya Yehova! w23.06 13 ¶15-16

Titurikumanya oku obunabi bumwe bwa Baibuli buraahikiirire. (Dan. 12:​8, 9) Kwonka ahabw’okugira ngu titurikumanya gye oku obunabi buraahikiirire tikirikumanyisa ngu tiburaahikiirire. Buzima, twine obwesigye ngu Yehova naija kutushuuruurira ebi twine kumanya omu bwire obuhikire, nk’oku yaakikozire ira. Nihaija kubaho okurangirira ngu “n’obusingye tihariho kabi.” (1 Tes. 5:3) Reero obutegyeki kirimaani nibwija kwehindukana ediini z’ebishuba buzicwekyereze. (Kush. 17:​16, 17) Bwanyima nibwija kutaahirira abaheereza ba Ruhanga. (Ezk. 38:​18, 19) Egyo niyo eraabe entandikiro y’orutaro rw’aha muheru orwa Haramagedoni. (Kush. 16:​14, 16) Twine obwesigye ngu ebi byona biri haihi kubaho. Bitakabaireho, ka tugumizemu nitworeka ngu nitusiima Tataitwe ow’omu iguru owa rukundo, turikwega obunabi bwa Baibuli, kandi tuhwere n’abandi kukora nikyo kimwe. w23.08 13 ¶19-20