Sande, Novemba 2
Turekye kugwejegyera nk’abandi kureka tugume nitureeba, [tugume nitwetegyereza].—1 Tes. 5:6.
Okugira rukundo ni kikuru twaba nitwenda kuguma nitureeba kandi tweteekateekire. (Mat. 22:37-39) Rukundo ei twiniire Ruhanga neetuhwera kugumisiriza oburemeezi obu turikutunga omu kubuurira. (2 Tim. 1:7, 8) Ahabw’okugira ngu nitukunda abantu, nitugumizamu nitubuurira, turikukoresa esimu n’amabaruha. Nituguma twine amatsiko ngu eizooba rimwe bataahi baitu nibaija kuhinduka batandikye kukora ebirungi. (Ezk. 18:27, 28) Nitukunda abataahi n’Abakristaayo bagyenzi baitu. Nitworeka ngu nitukundana ‘turikugumyana, kandi tukombekana.’ (1 Tes. 5:11) Nk’oku abaserukare barikuhwerahwerana omu rutaro, naitwe nitugumyana. N’eky’amazima, omuserukare naabaasa kuhutaaza mugyenzi we omu rutaro, kwonka ekyo tarikukikora akigyendereire. Nikyo kimwe, titurikugwisa kubi ab’eishe-emwe na banyaanyazi-itwe tukigyendereire nari kubaihura ekibi ahabw’ekibi. (1 Tes. 5:13, 15) Kandi nitworeka rukundo turikuha ekitiinisa ab’eishe-emwe abarikureeberera ekibiina.—1 Tes. 5:12. w23.06 10 ¶6; 11 ¶10-11
Orwokubanza, Novemba 3
[Yehova yaagamba ekintu,] tarikwija kukikora?—Kub. 23:19.
Omuringo gumwe oku turikubaasa kuhamya okwikiriza kwaitu n’okuteekateeka aha kitambo. Ekitambo nikituhamiza ngu ebi Ruhanga arikuraganisa nibiija kuhikiirira. Twateekateeka ahabw’enki Ruhanga yaahaireyo ekitambo n’oku yaayefeerereize, nituhamya okwikiriza kwaitu ngu ekiraganiso kya Ruhanga eky’amagara agatahwaho omu nsi nungi nikiija kuhikiirira. Ahabw’enki nitugira tutyo? Ekitambo kikaba nikitwariramu ki? Yehova akoohereza Omwana we omukundwa ow’omujigaijo, kandi munywani we, kuruga omu iguru kuzaarwa omu nsi nk’omuntu ahikiriire. Obu Yesu yaabaire ari omu nsi, akeemera oburemeezi bw’emiringo yoona. Akabonabonesibwa kandi yaafeera omu busaasi bwingi. Yehova ka yaayefeerereize kihango! Ruhanga waitu owa rukundo akaba atarikwija kwikiriza Omwana we kubonabona kandi akafa, kugira ngu tutungye amagara marungi kumara obwire bukye. (Yoh. 3:16; 1 Pet. 1:18, 19) Ahabw’okugira ngu Yehova akahayo Omwana we omukundwa, naija kuhamya ngu twatunga amagara agatahwaho omu nsi ensya. w23.04 27 ¶8-9
Orwakabiri, Novemba 4
Iwe Rufu ‘we, ebibonaboneso byawe birahi?—Hos. 13:14.
Mbwenu shi Yehova aine ekihika ky’okuzoora abafu? Eego buzima. Akahwera abahandiiki baingi ba Baibuli kuhandiika ngu naija kuzoora abantu omu biro by’omumaisho. (Isa. 26:19; Kush. 20:11-13) Kandi Yehova ku arikugira eki yaaraganisa, naakihikiiriza. (Yos. 23:14) Yehova naayendera kimwe kuzoora abafu. Teekateeka aha bigambo bya Yobu owaabaire ari omwesigwa. Akaba naahamiza kimwe ngu n’obu yaakufa, Yehova aine ekihika ky’okugaruka kumureeba. (Yob. 14:14, 15) Yehova aine ekihika nikyo kimwe eky’okugaruka kureeba abaheereza be abaafiire. Naayenda kuzoora abaafiire bakagira amagara marungi n’okushemererwa. Kandi shi obuhumbi bw’abantu abaafiire batakeegire amazima agarikukwata ahari Yehova? Ruhanga waitu oine rukundo nabo naija kubazoora. (Byak. 24:15) Naayenda ngu batungye omugisha gw’okuba banywani be, kandi batuure omu nsi ebiro byona.—Yoh. 3:16. w23.04 9 ¶5-6