Noobaasa kuhamya ota amatsiko gaawe? Waaba oine amatsiko g’okutuuraho ebiro byona omu nsi, teeraho kushoma ebi Baibuli erikugamba ahari Paradiso kandi obiteekateekaho. (Isa. 25:8; 32:​16-18) Teera akashushani oku embeera ziraabe ziri omu nsi ensya. Yereebe oriyo. Twaguma nituteekateeka aha nsi ensya, oburemeezi bwaitu nibwija kuba “bukye [kandi] obw’omwanya mukye.” (2 Kor. 4:17) Amatsiko agu Yehova akuhaire nigaija kukuhwera kuhama. Atuhaire ebirikwetengyesa kubaasa kutunga amaani ge. N’ahabw’ekyo waaba nooyenda obuhwezi kuhikiiriza obujunaanizibwa bwawe, kugumisiriza okugyezibwa nari kuguma oine okushemererwa, shaba Yehova kandi osherure obuhabuzi bwe orikweyegyesa. Ikiriza obuhwezi bw’ab’eishe-emwe na banyaanyazi-itwe. Guma oine amatsiko aha biro by’omumaisho. Waakora otyo noija ‘kugumibwa n’obushoboorozi bwona, nk’amaani g’ekitiinisa kya [Ruhanga] oku gari, obone kugumisiriza omuri byona n’okutaruha, oine okushemererwa.’—Kol. 1:11. w23.10 17 ¶19-20

Twine bingi ebi turikubaasa kusiimira Yehova omu kushaba. Nitubaasa kumusiima ahabw’ebintu birungi ebi twine, nangwa ebirungi byona nibiruga ahariwe. (Yak. 1:17) Nk’eky’okureeberaho, nitubaasa kumusiimira ensi nungi n’ebintu ebirikutangaaza ebi yaahangire. Nitubaasa n’okumusiima ahabw’amagara, eka yaitu, abanywani, n’amatsiko gaitu. Kandi nitwenda kusiima Yehova ahabw’okutwikiriza kugira omukago murungi nawe. Buri omwe nikibaasa kumwetengyesa kuteeraho kuteekateeka aha nshonga ezi aine kusiimira Yehova. Abantu baingi obunaku obu n’entasiima. Nibata omutima aha bi barikwenda, omu mwanya gw’okuguta aha ki bashemereire kukora kworeka ngu nibasiima ebi baine. Twatandika kugira emiteekateekyere nk’egyo, okushaba kwaitu nikubaasa kuba nk’okushabiiriza. Kubaasa kwetantara ekyo kubaho, twine kugumizamu nituteeraho kworeka ngu nitusiima Yehova ahabwa byona ebi atukoreire.—Luk. 6:45. w23.05 4 ¶8-9

Obu Yehova ari Tataitwe oine rukundo, tarikushemererwa kureeba twine obusaasi. (Isa. 63:9) N’obu kiraabe kiri kityo, tarikuzibira oburemeezi kutuhikaho, oburikugyeragyeranisibwa nk’emigyera n’omuriro. (Isa. 63:9) Kwonka, naaraganisa ngu naija kutuhwera ‘kuburabamu.’ Kandi ngu tarikwija kwikiriza oburemeezi obwo kutuhitsyaho akabi k’obutwire. Yehova naaraganisa n’okutuha omwoyo gwe ogurikwera kutuhwera kugumisiriza. (Luk. 11:13; Fil. 4:13) N’ekirikurugamu, nitubaasa kugira obwesigye ngu butoosha nitwija kuba twine kyenyini ekirikwetengyesa kugumisiriza n’okuguma turi abeesigwa. Yehova naayenda ngu tumwesigye. (Heb. 11:6) Obumwe, oburemeezi bwaitu nibubaasa kureebeka nk’obugumire kwemera. Nitubaasa n’okutandika kubangaanisa yaaba araatuhwere kubusingura. Kwonka Baibuli neetuhamiza ngu twaba twine amaani ga Ruhanga nitubaasa kuharabamba “orugo.” (Zab. 18:29) N’ahabw’ekyo omu mwanya gw’okubangaanisa, twine kushaba Yehova twine okwikiriza, kandi twine obwesigye ngu naaza kugarukamu okushaba kwaitu.—Yak. 1:​6, 7. w23.11 22 ¶8-9