Omurinzi w’Ekihome Okwega Amazima

Omuri Filipi, hakaba hariyo omwishiki omuzaana owaabaire ariho daimoni. Daimoni egyo ekaba ekoresa omwishiki ogwo kuragura, kandi omu muringo ogwo akaba akorera bakama be esente nyingi. Paulo na Siila ku baagire Filipi, omwishiki akabakuratira kumara ebiro bingi. Daimoni ekamugambisa eti: “Abashaija aba n’abahuuku ba Ruhanga Rukira-Boona.” Kwonka, Paulo akaragiira daimoni ati: ‘Ninkuragiira omu iziina rya Yesu Kristo, murugyeho.’ Daimoni yaamurugaho.

Bakama b’omwishiki ku baareebire batarikubaasa kumukoresa kutunga sente, bakagira ekiniga kingi. Bakakwata Paulo na Siila baabatwara omu maisho g’abategyeki, baabagira bati: ‘Abashaija aba tibarikworobera ebiragiro kandi nibahabisa ab’omu rurembo boona.’ Abategyeki bakaragiira ngu Paulo na Siila baateerwe kandi babate omu kihome. Omurinzi w’ekihome akabata omu kishengye eky’ahagati y’ekihome kandi yaata amaguru gaabo omu nkomo.

Abandi basibe omu kihome, bakaba bahurira Paulo na Siila nibeeshongora eby’okuhimbisa Yehova. Ahonaaho, nyekiro nka shaaha mukaaga, omutsitsa gw’amaani gukatetemesa munonga ekihome. Enyigi zoona zikiguka, kandi enjegyere n’enkomo z’abasibe zaakomoroka. Omurinzi w’ekihome akairuka yaaza omu kishengye eky’ahagati omu kihome kandi yaareeba enyigi ziigwire. Akaba naamanya ngu abasibe baagyenda, yaihayo rurara kweita.

Kwonka Paulo akagamba n’eiraka rihango ati: ‘Oteekora kubi, twena turi aha.’ Omurinzi w’ekihome akainama omu maisho ga Paulo na Siila. Akababuuza ati: “Nshemereire kukora ki, nkajunwa?” Bakamugarukamu bati: ‘Iwe n’eka yaawe, mwikirize Yesu.’ Bwanyima Paulo na Siila bakabeegyesa ekigambo kya Yehova, kandi omurinzi w’ekihome n’ab’omuka ye bakabatizibwa.