Abamwe nikibagumira kukunda Ruhanga. Nibamureeba nk’otarikwetegyerezibwa, ori hare munonga kandi orikubonabonesa abantu. Yetegyereze oku bamwe barikugira:

• “Nkaba ninshaba Ruhanga, kwonka nkaba nimureeba nk’ori hare kandi otarikubaasa kuhikwa. Akaba ari nk’otarikufayo aha nyehurira z’abantu.”​—Marco kuruga Italy.

• “N’obu ndaabe naabaire niinyenda kuheereza Ruhanga, nkaba nimureeba nk’ori hare munonga. Nkaba ninteekateeka ngu Ruhanga naabonabonesa abantu kandi ngu tarikusaasira. Nkaba ntarikukiikiriza ngu aine embabazi.”​—Rosa kuruga Guatemala.

• “Obu naabaire nkiri omwana, nkaba niinyikiriza ngu Ruhanga naatusheruramu enshobe zonka arikwenda kutufubira. Bwanyima nkamureeba nk’otarikufayo aha bantu. Nkaba nindeeba Ruhanga nk’omwebembezi orikwebembera abantu kwonka otarikubafaho.”​—Raymonde kuruga Canada.

Iwe nooteekateeka ki? Mbwenu shi Ruhanga taine rukundo? Abantu batwire nibeebuuza ekibuuzo ekyo kumara emyaka mingi. Okuruga omu mwaka gwa 500 kuhika 1500, abantu b’amadiini g’ebishuba abaingi bakaba batarikushaba Ruhanga ow’Obushoboorozi Bwona. Ahabw’enki? Abantu bakaba nibatiina kumushaba. Omunyabyafaayo Will Durant akagira ati: “Omusiisi naabaasa ata kushaba Ruhanga orikutiinisa kandi ori hare n’abantu?”

Abantu bakatandika bata kureeba Ruhanga nk’orikutiinisa kandi ori hare? Baibuli buzima neeyegyesa ki ahari Ruhanga? Mbwenu shi okwega ebirikukwata ahari Ruhanga nikubaasa kukuhwera kumukunda?

EKI BAINGI BARIKWIKIRIZA

“Titukaikirizaine yaaba Ruhanga aine eiziina, kandi ku araabe ariine titurikurimanya.”​—Omuhangu w’eby’ediini orikwetwa David Cunningham,Theological Studies.

AMAZIMA KURUGA OMU BAIBULI

Ruhanga akagira ngu eiziina rye ni Yehova. (Okuruga 33:19) Eiziina “Yehova” nirimanyisa ngu naahikiiriza kyona eki arikwenda.

Yehova naayenda ngu tukorese eiziina rye. Baibuli neegira ngu: “Mutakire eiziina rye, mubuzye omu mahanga ebi yaakozire, murangye eiziina rye ku ririkuhimbisibwa.”​—Isaaya 12:4.

Yesu akakoresa eiziina rya Ruhanga. Omu kushaba akagambira Yehova ati: “Nkabamanyisa eiziina ryawe, kandi ndyarimanyisa.” Ahabw’enki Yesu yaamanyiise abakuratsi be eiziina rya Ruhanga? Akoongyera yaagira ati: “Okukunda oku waankunzire, kube omuribo, naanye mbe omuribo.”​—Yohaana 17:26.

ENSHONGA AHABW’ENKI NI KIKURU

Walter Lowrie orikwega eby’ediini akahandiika ati: “Omuntu otarikumanya eiziina rya Ruhanga tarikubaasa kumumanya, kandi tarikubaasa kumukunda yaaba naamureeba nk’otaine saasi.”

Victor akaba aza omu kanisa buri sande, kwonka akaba atarikumanya Ruhanga. Naagira ati: “Bwanyima nkamanya ngu eiziina rya Ruhanga ni Yehova, kandi okaba nooshusha oti obwo nibwo naamweyanjurira omu butongore. Nkashusha nk’owaareeba ogwo ou ntuura nimpuriraho bingi. Nkamureeba nk’owaabuzima kandi naagira omukago murungi nawe.”

Yehova nairira haihi abo abarikukoresa eiziina rye. Abo ‘abarikuteekateeka aha iziina rye,’ naabaraganisa ati: “Ndyabasaasira, nk’oku omuntu asaasira omwana we orikumukorera.” (Malaki 3:16, 17) Kandi Ruhanga naaha omugisha abo abarikutakira eiziina rye. Baibuli neegira ngu: “Omuntu weena oritakira eiziina rya Mukama aryajunwa.”​—Abarooma 10:13.

EKI BAINGI BARIKWIKIRIZA

Amadiini ashatu agarikweyeta Amakristaayo “Abakaturiki, Abaporotesitanti, na Orthodoxy nigaikiriza ngu Ruhanga n’obushatu. Nigagira ngu hariho Ruhanga Tataitwe, Ruhanga Omwana na Ruhanga Omwoyo Orikwera. Kurugiirira aha nyegyesa egyo, neeyoreka ngu Ruhanga omwe arimu bashatu.”​—The New Encyclopædia Britannica.

AMAZIMA KURUGA OMU BAIBULI

Yesu, omwana wa Ruhanga, taragizire ngu naingana na Ishe. Omu mwanya gw’ekyo akagira ati: “Ninza ahari Tata; kandi Tata nankira.” (Yohaana 14:28) Akagambira omwe aha bakuratsi be ngu akaba naaza “omu iguru ahari Ishe kandi Shoimwe, ahari Ruhanga we, kandi Ruhanga waanyu.”​—Yohaana 20:17.

Omwoyo ogurikwera ti muntu. Abakristaayo aba ira ‘bakaijura omwoyo ogurikwera,’ na Yehova akagira ati: ‘Ndyashuka omwoyo gwangye aha bantu boona.’ (Ebyakozirwe 2:1-4, 17) Omwoyo ogurikwera ti kicweka ky’obushatu. N’amaani ga Ruhanga.

ENSHONGA AHABW’ENKI NI KIKURU

Abahangu aha diini y’ekikaturiki, Karl Rahner na Herbert Vorgrimler bakashoboorora aha nyegyesa y’obushatu bati: “Terikubaasa kwetegyerezibwa hatabaireho kushuuruurwa, kandi na bwanyima y’okushuuruurwa terikubaasa kwetegyerezibwa gye.” Mbwenu shi noobaasa kukunda omuntu ou otarikubaasa kumanya gye nari kwetegyereza? Hatariho kubanganisa, enyegyesa y’obushatu, neeremesa abantu kumanya Ruhanga n’okumukunda.

Marco, owaaba yaagambirweho omu munaara ogu, akareeba enyegyesa egyo nk’ekirikuremesa abantu kwetegyereza Ruhanga. Akagira ati: “Nkaba ninteekateeka ngu Ruhanga naanshereka ebirikumukwataho, kandi ekyo kikamureebekyesa nk’ori hare, otarikwetegyerezibwa, kandi otarikubaasa kuhikwa.” Kwonka, “Ruhanga ti Ruhanga w’okujagarara” nari orikubuzabuza. (1 Abakorinso 14:33) Tarikutushereka ebirikumukwataho. Naayenda ngu tumumanye. Yesu akagira ati: “Itwe turamya eki turikumanya.”​—Yohaana 4:22.

Marco naagira ati: “Ku naayegire ngu Ruhanga tari kicweka ky’obushatu, nkabaasa kugira omukago murungi nawe.” Waamanya ngu nikibaasika kwetegyereza Yehova, nikikworobera kumukunda. Baibuli neegira eti: “Otagira rukundo tamanya Ruhanga; ahakuba Ruhanga aba rukundo.”​—1 Yohaana 4:8.

EKI BAINGI BARIKWIKIRIZA

Ekitabo ekirikwetwa Catechism of the Catholic Church nikigira kiti: “Omuntu ku arikufa aine ekibi, naaza omu muriro ogutaraara ahu arikuguma naabonabona ebiro byona.” Abeebembezi b’ediini abamwe nibagira ngu hariho omwanya ogurimu omuriro ogutaraara ogu Ruhanga arikwokyezamu abantu abu atarikusiima.

AMAZIMA KURUGA OMU BAIBULI

“Abafiire tibagira ki bamanya.” (Omubuurizi 9:5) Obu abafu bataine eki barikumanya, tibarikubaasa kubonabonesibwa ebiro byona n’obu baakuba batarikusiimwa Ruhanga.

Omu Baibuli, ekigambo ky’Oruheburaayo ekirikuvunuurwa nka “gehena,” nikijwekyera okucwekyerereza kimwe hatariho matsiko g’okuzooka, beitu ti mwanya ogurimu omuriro gw’okubonabonesezamu abantu ebiro byona.

ENSHONGA AHABW’ENKI NI KIKURU

Okugira ngu Ruhanga naabonabonesa abantu nikitureetera kumwetantara. Rocío orikutuura omuri Mexico naagira ati: “Kuruga omu buto bwangye nkegyesibwa ngu hariho omuriro ogutaraara. Nkatiina munonga ndikugira ngu Ruhanga taine mutwarize murungi gwona. Nkaba ninteekateeka ngu aine ekiniga kingi kandi tarikusaasira.”

Eki Baibuli erikugamba aha ku Ruhanga arikucwa emanja n’okumanya ngu abafu tibaine eki barikumanya, kikahwera Rocío kuhindura emiteekateekyere ye ahari Ruhanga. Naagira ati: “Nkahurira naatunga oburuhuuko, nk’ou baiha omugugu gw’amaani aha mutwe. Nkatandika kwesiga Ruhanga orikutwendeza ebirungi, ndikumanya ngu naatukunda, kandi ngu naanye nimbaasa kumukunda. Ari nka ishe abaana orikukwata abaana be aha mukono kandi orikubendeza ebirungi.”​—Isaaya 41:13.

Abantu baingi nibateeraho kutwaza gye ahabw’okutiina omuriro ogutaraara, kwonka Ruhanga tarikwenda ngu tumuheereze ahabw’obwoba. Yesu akagira ati: ‘Okunde Mukama Ruhanga waawe.’ (Mako 12:29, 30) Twamanya ngu Ruhanga aine oburingaaniza, nitwija kwesiga omuringo ogu araacwemu emanja omu biro by’omumaisho. Nka munywani wa Yobu, orikwetwa Elihu, naitwe nitubaasa kugamba n’obuhame tuti: “Nikikabure Ruhanga okukora ebitahikire, ow’Obushoboorozi Bwona okukora kubi.”​—Yobu 34:10.

Eizooba rimwe, Yesu akaba ari Yerusaalemu arikwegyesa ebirikukwata ahari Ishe kandi arikusheeshuura n’enyegyesa z’ebishuba ez’abeebembezi b’ediini. (Yohaana 8:12-30) Ebi yaagambire nibibaasa kutuhwera kumanya oku turikubaasa kushwijuma enyikiriza ezirikukwata ahari Ruhanga obunaku obu. Yesu akagira ati: “Ku muraahamire aha kigambo kyangye, nimuba muri abeegi bangye buzima. Kandi muryamanya amazima, n’amazima garyabahindura ab’obusingye.”​—Yohaana 8:31, 32.

Yesu okugira ngu “ku muraahamire aha kigambo kyangye,” akaba naataho omutindo gw’okushwijuma enyegyesa z’ediini kureeba yaaba gari “amazima.” Ku oraahurire ebigambo ebirikukwata ahari Ruhanga yebuuze oti: ‘Ebigambo ebi nibihikaana n’ebigambo bya Yesu hamwe n’Ebyahandiikirwe Ebirikwera?’ Tooreza abo abaabaire bahurira entumwa Paulo naayegyesa, reero bakaguma “nibashwijuma omu Byahandiikirwe obutoosha kureeba ebigambo ebyo ku biraabe nikwo biri.”​—Ebyakozirwe 17:11.

Marco, Rosa, na Raymonde, abaaba baagambirweho omu munaara ogu, bakashwijuma ebi baabaire begyesiibwe barikuhwerwa Abajurizi ba Yehova kwega Baibuli. Bakeega ki?

Marco naagira ati: “Nyowe n’omukazi wangye buri kibuuzo eki twabaire twine, owaabaire naatwegyesa Baibuli akaba akigarukamu arikukoresa Ebyahandiikirwe. Tukatandika kukunda Yehova kandi nyowe n’omukazi wangye tukeeyongyera kukundana!”

Rosa naagira ati: “Omu kubanza, nkaba ningira ngu Baibuli n’ekitabo ekirimu ebiteekateeko by’abantu abanyabwengye ekirikuteeraho kushoboorora ahari Ruhanga. Kwonka, mporampora, nkatunga eby’okugarukamu by’ebibuuzo byangye. Hati, Yehova n’owaabuzima ahariinye. Niimwesiga.”

Raymonde naagira ati: “Nkashaba Ruhanga kumpwera kumwegaho. Bwanyima y’ekyo, nyowe na ibanyi tukatandika kwega Baibuli. Tukarugaho twayega amazima agarikukwata ahari Yehova! Tukashemererwa munonga kumanya amazima agarikumukwataho.”

Baibuli neesheeshuura ebishuba ebirikukwata ahari Ruhanga kandi eyoreka n’emitwarize ye mirungi. Ehandiikisiibwe Ruhanga, kandi neetuhwera “kwetegyereza ebi Ruhanga atuheera busha.” (1 Abakorinso 2:12) Yetegyereze oku Baibuli erikuha eby’okugarukamu by’ebibuuzo ebirikukwata ahari Ruhanga, ekigyendererwa kye, n’aha biro by’omumaisho. Reeba eby’okugarukamu by’ebibuuzo nk’ebyo orikuza “Bible Teachings > Bible Questions Answered” aha www.pr2711.com ahansi y’omutwe “Enyegyesa za Baibuli >Ebibuuzo aha By’omu Baibuli Nibigarukwamu.” Noobaasa kushaba kwegyesibwa Baibuli kurabira aha Mukura ogwo nari orikugamba n’omwe aha Bajurizi ba Yehova. Twine amatsiko ngu ku oraakikore, noija kushanga ngu kyorobi kukunda Ruhanga kukira oku waabaire nooteekateeka.