“Bakaba Nibenda ngu Nyemanyire Amazima”

EBI NAARABIREMU:

Nkazaarirwa Santo Domingo, Dominican Republic, niinye bucura aha baana bana. Abazaire bangye bakaba beegire gye, kandi bakaba nibenda abaana baabo bakuriire omu mbeera nungi. Abazaire bangye bakabugana abamiisani b’ediini ya Mamoni, emyaka ena ntakazairwe. Bakakunda emireebekyere n’emijwarire y’abatsigazi abo, juba baacwamu ngu eka yaitu niyo erikwija kuba ey’okubanza kwegaita aha kanisa ya Mamoni.

Nkakura ninkunda kwejumba omu mirimo y’ekanisa kandi nkaba nimpa Abaamamoni ekitiinisa, ahakuba bakaba nibeegyesa ebirikukwata aha maka n’aha mitindo y’emicwe. Kikaba nikinyesiimisa kuba omwe aha Baamamoni kandi nkataho ekigyendererwa ky’okuba omumiisani.

Obu naabaire nyine emyaka 18, eka yaitu ekafurukira omuri United States kugira ngu mbaase kuza aha yunivasite. Bwanyima y’omwaka nka gumwe, maawento na iba, Abajurizi ba Yehova, bakaija kututaayaayira omuri Florida. Bakatweta aha ruteerane rwabo oruhango. Kikanshemeza kureeba ngu buri omwe akaba naashoma omu Baibuli kandi akagira ahu yaahandiika ebi yaayega. N’ahabw’ekyo naanye nkatunga orupapura n’akacumu naatandika kuhandiika.

Bwanyima y’oruteerane maawento na iba bakangira ngu obu nyine ekyetengo ky’okuba omumiisani, nibabaasa kumpwera kugira eki baayegyesa omu Baibuli. Nkareeba ngu n’ekitenso kirungi omu kaire ako, ahakuba nkaba mmazire obwire ninshoma Ekitabo ky’Abaamamoni emirundi mingi okukira Baibuli.

OKU BAIBULI YAAHINDWIRE EMITWARIZE YANGYE:

Obu maawento na iba baabaire nibanyegyeseza Baibuli aha simu butoosha bakaba nibaampiga kugyeragyeranisa enyikiriza zangye n’enyegyesa za Baibuli. Bakaba nibenda ngu nyemanyire amazima.

Hariho ebintu bingi ebi naabaire niinyikiriza omu diini ya Mamoni, kwonka nkaba ntarikumanya yaaba nibihikaana n’ebi Baibuli erikwegyesa. Maawento akayoherereza Awake! ey’Okwaikumi-na-kumwe 8, 1995, eyaateirwe Abajurizi ba Yehova eyaabaire neekukwata aha Baamamoni. Kikaantangaaza kureeba ngu nkaba ntarikumanya gye enyegyesa z’ediini ya Mamoni. Ekyo kikampiga kusherura aha mukura gw’Abaamamoni ogutongoziibwe kuhamya yaaba ebyabaire biri omu Awake! bihikire. Gakaba gari amazima, eki nkakihamya obu naaza omu biijukiro by’ebya ira by’Abaamamoni omuri Utah.

Nkaba ntwire niinyikiriza ngu Ekitabo ky’Abaamamoni na Baibuli nibiikirizana. Kwonka ku naashwijumire gye Baibuli, nketegyereza ngu enyegyesa za Mamoni nizitaanira kimwe n’ebiri omu Baibuli. Nk’eky’okureeberaho, omuri Ezekieli 18:4, nihagira ngu omwoyo nigufa. Kwonka, Ekitabo ky’Abaamamoni, ahari Alma 42:9, nihagira hati: “Omwoyo tigurikubaasa kufa.”

Oyihireho okuteganisibwa enyegyesa z’Abaamamoni ezirimu ebigwire, nkaba ninteganisibwa n’emiteekateekyere yaabo erimu okuhimbisiriza amahanga agamwe. Nk’eky’okureeberaho, Abaamamoni nibeegyesa ngu omusiri Edeni gukaba guri omu ishaza rya Jackson, omuri Missouri, U.S.A. Kandi baanabi baabo ab’ekanisa nibagira ngu “Ruhanga naija kutegyeka ensi yoona arikukoresa gavumenti ya United States.”

Nkaba niinyebuuza oku eki kirikwija kukwata aha ihanga ryangye nari erindi ryona. Eki nkakigaaniiraho n’omunyeeto w’ediini ya Mamoni aha simu owaabaire naatendekwa kuba omumiisani. Nkamubuuza butunu yaaba naija kuba ayeteekateekire kurwanisa Abaamamoni bagyenzi be eihanga erindi ryarwana n’erye. Kikaantangaaza ku yaangizire ngu, eego! Nkongyera kucondooza aha bi ndikwikiriza kandi naayebuuza aha beebembezi b’ekanisa ya Mamoni. Baakangira ngu eby’okugarukamu by’ebibuuzo byangye hati tibiriho, kwonka ngu nibiija kumanywa gye mporampora, ekyererezi kyayeyongyera kwaka gye.

Enshoboorora yaabo ekammaramu amaani, naatandika n’okubangaanisa aha kigyendererwa kyangye ky’okuba omumiisani wa Mamoni. Nketegyereza ngu nkaba niinyenda kuba omumiisani ahabw’okwenda kuhwera abantu kyona. Ekindi, nkaba niimanya ngu naakora omurimo ogwo, abantu nibaija kumpa ekitiinisa. Kwonka kyahika aha bya Ruhanga, buzima nkaba ntarikumanya bingi. N’obu ndaabe naabaire naashomireho Baibuli emirundi mingi, buzima nkaba ntarikugitwara nk’ey’omugasho. Nkaba ntarikumanya ekigyendererwa eki Ruhanga ainiire ensi n’abantu.

OKU NGASIIRWE:

Omu bintu ebi naayetegyereize obu Abajurizi ba Yehova baabaire nibanyegyesa Baibuli, nihatwariramu, amakuru g’eiziina rya Ruhanga, ekirikubaho omuntu yaafa, n’omwanya gwa Yesu omu kuhikiiriza ekigyendererwa kya Ruhanga. Nkarugaho naayetegyereza ekitabo eki, kandi nkaba ninkunda kugambira abandi amazima agu naabaire niinyega. Nkaba ntwire niimanya ngu Ruhanga ariho, kwonka hati nkaba nimbaasa kugamba nawe omu kushaba nka munywani wangye orikukirayo. Nkabatizibwa naaba Omujurizi wa Yehova omu Kwamushanju 12, 2004, kandi bwanyima y’ameezi mukaaga nkataaha omu buheereza bw’obutwire.

Kumara emyaka etaano, nkaheereza aha ofiisi enkuru ey’Abajurizi ba Yehova omuri Brooklyn, New York. Nkejumbira kimwe omu teera Baibuli n’ebitabo ebirikugishoboorora ebirikugasira obukaikuru bw’abantu omu nsi yoona, kandi ninkigumizamu kuhwera abandi kwega ebirikukwata ahari Ruhanga.