Nkaba Ninkunda Omuzaano gwa Baseball Kukira Ebindi Byona!

EBI NAARABIREMU

Nkakurira omuri Puerto Limón, orurembo rw’aha mwaro burengyerwa-izooba bwa Costa Rica. Abazaire bangye bakaba baine abaana munaana, kandi nkaba ndi owa mushanju. Tata akafa nyine emyaka munaana. Bwanyima, maawe akatworora wenka.

Nkaba ninkundira kimwe omuzaano gwa Baseball. Nkiri muto nkaba ninkunda kuguzaana. Omu bunyeeto bwangye, nkeegaita aha kibiina erimu tiimu z’abarikwega kuzaana omuzaano ogwo. Ku naabaire ninkizaanira omu kibiina ekyo nyine emyaka nka 20, haine owaanshabire kuzaanira tiimu erikushashura abazaani omuri Nicaragua. Kwonka, ahabw’okugira ngu maawe akaba arwaire kandi niinye naabaire nimureeberera, nkaba ntarikwenda kuza Nicaragua. N’ahabw’ekyo nkanga kuzayo. Bwanyima, nkeetwa kuzaanira tiimu y’eihanga eya Costa Rica, eyabaire erimu abazaani abatoorainwe kuruga omu bibiina ebindi. Aha murundi ogu, nkaikiriza. Nkazaanira tiimu y’eihanga kuruga 1949 kuhitsya 1952, kandi nkazaana emizaano mingi omuri Cuba, Mexico, na Nicaragua. Nkaba ndi omubaki murungi, rimwe nkazaana emizaano 17 ntakozire nshobe n’emwe. Kikaba nikinshemeza kuhurira abahagizi nibeeshongora eiziina ryangye!

Eky’obusaasi, nkeejumba omu bikorwa by’obushambani. N’obu naabaire ninkunda omwishiki omwe, nkaba nshambana n’abakazi abandi kandi nywa amaarwa ekirenga. Eizooba rimwe nkasinda munonga, ku naimukire omu kasheeshe nkaba ntarikumanya oku ntaahire omuka! Kandi nkaba ninzaana zaara.

Obu naabaire ninkitwaza ntyo, maawe akahinduka omwe aha Bajurizi ba Yehova. Akateeraho kunkundisa enyikiriza ye, kwonka akabanza yaaremwa ahabw’okuba nkaba nyemariire aha muzaano gwangye. N’obu eshaaha z’okurya zaabaire zihika ndikuteedekwa, nkaba mpurira ntaine njara! Ahakuba ebiteekateeko byangye nkaba mbimariire aha muzaano. Nkaba ninkunda omuzaano gwa Baseball kukira ebindi byona!

Kwonka, obu naabaire nyine emyaka 29, nkatunga obuhuta ndikuteeraho kukwata omupiira turikuzaana. Ku naakizire, nkarekyera aho kuzaanira esente. kwonka, nkagumizamu ninshagika omuzaano gwa Baseball ndikutendeka abazaani ba tiimu eri haihi n’owaitu.

OKU BAIBULI YAAHINDWIRE EMITWARIZE YANGYE

Omuri 1957, nkeetwa aha ruteerane oruhango orw’Abajurizi ba Yehova orwabaire ruri omu kishaayi eki naabaire ninzaaniramu baseball. Ku naabaire nshutami, nkareeba omuringo gw’ekitiinisa ogu Abajurizi ba Yehova baabaire nibatwarizanamu, n’oku gwabaire nigutaana aha ntwaza y’ekigweiraro ey’abahagizi ba baseball. Eki naareebire aha ruteerane orwo kikampiga kutandika kwega Baibuli n’Abajurizi ba Yehova n’okuza omu nteerane zaabo ez’ekibiina.

Nkatangaara kumanya ebintu bingi ebi Baibuli erikwegyesa. Nk’eky’okureeberaho, Yesu akagira ngu omu biro by’aha mperu, abeegi be bakaba nibaija kubuurira amakuru marungi g’Obukama bwa Ruhanga omu nsi yoona. (Matayo 24:14) Kandi nkeega ngu Abakristaayo ab’amazima tibarikubuurira ahabw’okwenda kutunga esente. Yesu akagira ati: “Mukaheerwa busha, naimwe muheere busha.”—Matayo 10:8.

Ku naabaire niinyega Baibuli, nkaba ningyeragyeranisa ebi naayega n’ebi Abajurizi ba Yehova baabaire nibakora. Nkasiima okuteeraho kwabo kubuurira amakuru marungi g’Obukama omu nsi yoona. Nkareeba nibagyendera aha obuhabuzi bwa Yesu obw’okuha abandi. N’ahabw’ekyo ku naashomire Mako 10:21 nkareeba okweta kwa Yesu ngu, ‘ija onkuratire,’ nkagira ekihika ky’okuba omwe aha Bajurizi ba Yehova.

Kwonka, kikaantwarira obwire kugyendera aha kucwamu kwangye. Nk’eky’okureeberaho, kumara emyaka mingi nkaba ninzaana zaara buri saabiiti. Kwonka, nkeega ngu Ruhanga naayanga abarikuramya ‘ruhanga w’engisha,’ n’abarikwetenga. (Isaaya 65:11; Abakolosai 3:5) N’ahabw’ekyo nkarekyera aho kuzaana zaara. Sande y’okubanza ndeekyeire aho okuzaana zaara enamba yangye ey’omugisha ekasinga! Abantu bakanshekyerera ahabw’okugira ngu saabiiti egyo tindazaanire, kandi bakateeraho kungyemesereza kugaruka kuzaana zaara, kwonka nkanga.

Aha izooba obu naabatizibwa nkaba omwe aha Bajurizi ba Yehova “omuntu wangye omusya” akahikwaho okugyezibwa okundi. (Abaefeso 4:24) Omwabazyo ogwo, ku naagarukire omu hoteeri ahu naabaire nindaara nkashanga omwishiki ou naakunzireho enyima antegyereize aha rwigi. Akangira ati: “Omukundwa Sammy, ka tushemererwe!” kwonka ahonaaho nkamugarukamu nti: “Ngaaha!” Nkamwijutsya ngu hati nkaba ninkuratira emitindo ya Baibuli ey’emicwe. (1 Abakorinso 6:18) “Akagamba n’eiraka rihango ati: “Otenki?” Akateeraho kugaya eki Baibuli erikugamba aha bushambani kandi akagira ngu naayenda tugarukane. Kwonka, nkataaha omu kishengye kyangye naakinga orwigi. Hati, nyine okushemererwa ahabw’okugira ngu kwiha obu naahinduka Omujurizi wa Yehova omuri 1958, mpamiire aha mpinduka ezi naakozire.

OKU NGASIIRWE

Ngasiirwe munonga ahabw’okugyendera aha buhabuzi bwa Baibuli! Emiringo emwe ei ngasiirwemu n’okugira ngu hati nyine abanywani abaabuzima, ekigyendererwa ky’okubaho, n’okushemererwa okwabuzima.

Ninkikunda omuzaano gwa baseball, kwonka hati tigwo gurikukirayo obukuru. Omuzaano gwa baseball gukampwera kurangaanwa n’okutunga esente, kwonka ebyo bikamara akaire kakye. Kwonka omukago gwangye na Yehova n’ab’eishe-emwe niguza kugumaho ebiro byona. Baibuli neegira eti: ’Kandi ensi egi neehwaho n’okwetenga kwayo, kwonka orikukora ebi Ruhanga arikukukunda, naagumaho ebiro byona.’ (1 Yohaana 2:17) Hati ninkunda Yehova Ruhanga n’abantu be okukira ekintu ekindi kyona!