Nkasingura Bwanyima y’Okugwa Emirundi Mingi

EBI NAARABIREMU:

Tata akafurukira omuri Australia arikuruga Germany omuri 1949. Akaija arikusherura omurimo omu by’amashanyarazi kandi akatuura omu kyaro kya Victoria. Okwo niyo yaashweraire maawe, kandi nkazaarwa omuri 1953.

Bwanyima y’emyaka mikye, maawe akatandika kwega Baibuli n’Abajurizi ba Yehova, n’ahabw’ekyo nkeegyesibwa enyegyesa za Baibuli nkiri muto. Kwonka, taata akaba atarikwenda diini yoona. Akeeyongyera kuba enshaarizi, kyareetera maawe kumutiina. Kwonka maawe akagumizamu naayega Baibuli bwesherekye kandi yaakunda ebi erikwegyesa. Tata ku yaabaire aba atari muka, maawe akaba ayegyesa munyaanyazi naanye ebi yaayega. Akatugambira ahari paradiso eraabeho omu nsi n’oku turikubaasa kutunga okushemererwa twakuratira emitindo ya Baibuli.—Zaaburi 37:10, 29; Isaaya 48:17.

Ku naahikize emyaka 18 nkaruga omuka ahabw’obushaarizi bwa tata. N’obu ndaabe naabaire ninyikiriza ebi maawe yanyegyeise kuruga omu Baibuli, nkaba ntarikubitwara nka bikuru. N’ahabw’ekyo tindabigyendereiho. Nkatandika kukora omu kitongore kimwe ky’amashanyarazi. Aha myaka 20, nkashwera. Bwanyima y’emyaka eshatu tukazaara muhara waitu w’okubanza, kandi nibwo naagaruka kuteekateeka aha bintu bikuru. Nkaba nimmanya ngu Baibuli neebaasa kuhwera eka yaitu, n’ahabw’ekyo nkatandika kwega Baibuli n’Abajurizi ba Yehova. Kwonka omukazi wangye akaba naahakanisa Abajurizi ba Yehova. Ku naagiire omu nteerane zaabo, akangira ngu ncwemu kimwe, yaaba okurekyera aho kwega Baibuli nari okutsigaho eka. Ahabw’okushoberwa, nkaikiriza naarekyera aho kukwatanisa n’Abajurizi ba Yehova. Nkeefuza ahabw’enki ntaraakozire eki naabaire nimmanya ngu kihikire.

Eizooba rimwe, abu ndikukora nabo bakanyoreka ebishushani ebirikwitsa enshoni. Bikaba nibishemeza kwonka birikuhemurana, okubireeba kikandeteera kweshinja. Ku naijukire ebi naayegire omu Baibuli, nkaba nimmanya ngu Ruhanga naija kunfubira. Kwonka ku naayongeire kureeba ebishushani bibi, emiteekateekyere ei naabaire nyine aha birikwitsa enshoni ekahinduka. Mporampora, gukahinduka omuze.

Emyaka 20 eyaakuratsireho, nkeeyongyera kuteishuka aha mitindo ei maawe yaabaire anyegyeise. Emitwarize yangye ekaba neeyoreka ekyabaire kiri omu biteekateeko byangye. Nkaba ningamba ebigambo ebirikuhemurana, kandi ndikutwaza kubi. Nkagira emiteekateekyere mibi aha kuteerana. N’obu ndaabe naabaire ninkituura n’omukazi wangye, nkaba niinshambana n’abakazi abandi. Eizooba rimwe nkereeba omu ndeeberwamu naagira nti: ‘Tindikukukunda.’ Nkaba ntakyeha kitiniisa kandi nyetamirwe.

Obushwere bwangye bukashenyuka kandi tihaine eki naatsigaize. N’ahabw’ekyo, nkashaba Yehova n’omutima gwangye gwona. Nkagarukamu kwega Baibuli, n’obu haabaire hahingwireho emyaka 20. Omu bwire obwo, tata akaba yaafiire kandi maawe akaba yaabatiziibwe nk’omwe aha Bajurizi ba Yehova.

OKU BAIBULI YAAHINDWIRE EMITWARIZE YANGYE:

Hakaba hariho entaaniso mpango aha gati y’omuringo ogu naabaire nintwazamu n’emitindo ya Baibuli. Aha murundi ogu nkaba mmaririira kutunga obusingye bw’omu biteekateeko obu Baibuli erikuraganisa. Nkamariirira kuboneza emigambire yangye n’okwikaikanisa ekiniga kyangye kibi. Nkaba nyehaireyo kureka obushambani, okuzaana zaara, okunywa amaarwa ekirenga, n’okwiba bakama bangye.

Abu ndikukora nabo bakaba batarikubaasa kwetegyereza ahabw’enki naabaire niinyenda kukora empinduka z’amaani nk’ezo. Kumara emyaka nk’eshatu bakaguma nibateeraho kundeetera kugaruka kutwaza nka ira. Ku naabaire nkora ekintu kibi kyona, nk’okugambisa ekiniga nari kugamba ekigambo kibi, bakaba bashemererwa bagira bati: “Eego! Joe owa ira niwe ogu.” Ebigambo ebyo bikaba nibinshaasha munonga! Nkaba ninyehurira nk’oremirwe.

Ahu naabaire ninkorera hakaba haijwireho ebishushani ebirikwitsa enshoni, ebitairwe n’eby’aha mukura. Abu ndikukora nabo bakaba nibabagana ebishushani bibi kurabira aha kompyuta zaabo z’omurimo, nk’oku naanye naabaire ninkora enyimaho. Nkaba ninteeraho kusingura omuze gwangye kwonka bakaba bamaririire kundemesa. Nkashaba obuhwezi owaabaire naanyegyesa Baibuli. Akampurikiza n’obugumisiriza ku naabaire niimugambira ekiri aha mutima gwangye. Akakoresa emishororongo ya Baibuli emwe, kunyoreka oku ndikubaasa kucwa omuze gwangye, kandi yaampiga kushaba Yehova obuhwezi obutoosha.—Zaaburi 119:37

Eizooba rimwe nkateeranira hamwe abakozi bagyenzi bangye. Ku bayeteeraniire hamwe, nkabagambira kuha amaarwa bamwe aha baabaire nibacwa omuze gw’obusinzi. Boona bakanga baagira bati: “Torikubaasa kukora ekyo! Abashaija aba nibateeraho kucwa omuze gw’okunywa amaarwa!” nkabagarukamu nti: “Eego, kandi naanye nikyo ndiyo ninkora.” Kuruga obwo, abashaija abo bakasiima okuteeraho kwangye kucwa omuze gw’okureeba ebirikwitsa enshoni, kandi tibaragarukire kungyemesereza kutwaza nk’oku naabaire nintwaza enyima.

Bwanyima y’obwire, n’obuhwezi kuruga ahari Yehova, nkasingura omuze gw’okureeba ebirikwitsa enshoni. Omuri 1999, nkabatizibwa nk’omwe aha Bajurizi ba Yehova, ndikusiima omugisha gw’okugaruka kwesiimira omu mbeera nungi.

Hati ninyetegyereza gye ahabw’enki Yehova naayanga ebintu ebi naabaire nkunzire kumara obwire buraingwa. Nka Tataitwe owa rukundo, akaba naayenda kundinda akabi akarikuruga omu kureeba ebishushani ebirikwitsa enshoni. Buzima ebigambo ebiri omu Enfumu 3:5, 6 ka bihikire! Nibigira biti: ‘Yesigye [Yehova] n’omutima gwawe gwona, orekye kwegamira okwetegyereza kwawe ahabwawe. Omwemere omu mitwarize yaawe yoona, nawe naija kuguma naatebeekanisa emihanda yaawe yoona.’ Emitindo ya Baibuli tikugira ngu neekurinda kyonka, kureka neekuhamiza ngu noobaasa kusingura.—Zaaburi 1:1-3

OKU NGASIIRWE:

Enyima, nkaba ntamirwe amagara gangye, kwonka hati niinyeha ekitiinisa kandi nyine obusingye obw’omu biteekateeko. Hati nintwaza omu muringo ogushemeire kandi nindeeba okusaasira kwa Yehova n’obushagiki bwe. Omu 2000, nkashwera Karolin, omukazi Omukristaayo murungi orikukunda Yehova nkaanye. Eka yaitu erimu obusingye. N’omugisha gw’amaani okuba omu ka y’ab’eishe-emwe Abakristaayo abari omu nsi yoona, eka eshemeire kandi erimu rukundo.