Baibuli Neegamba ki Ahari Tatu?

Eki Baibuli erikugarukamu

● Baibuli neegamba ahari tatu nari engondo omurundi gumwe gwonka omu Abaleevi 19:28, ahari kugira: “Mutaricwa engondo.” Ruhanga akaha ekiragiro eki eihanga rya Israeli kubataanisa aha bantu abandi abaabaire nibaramba emibiri yaabo n’amaziina n’obumanyiso bwa baruhanga baabo. (Eky’Ebiragiro 14:2) N’obu Abakristaayo batakari ahansi y’ekiragiro eki ekyahairwe Abaisraeli, ni kikuru okushwijuma omusingye oguri omu kiragiro ekyo.

Omukristaayo ashemereire kwetaho tatu nari kuramba omubiri gwe?

Emishoroongo egi neebaasa kutuhwera kushwijuma gye enshoga egi:

• “Abakazi bo bagume beecume . . . baine obucureezi.” (1 Timoseo 2:9, Baibuli ya New American) Omusingye ogu nigukwata aha bashaija n’abakazi. Twine kuha ekitiinisa enyehurira z’abandi kandi tukeetantara okwetaho omutima.

• Abamwe nibaba nibenda kworeka eki buzima bari nari kutunga obugabe, abandi nibaramba emibiri yaabo kworeka ngu nibagitegyeka. Kwonka, Baibuli neyehanangiriza Abakristaayo eti: ‘Muheyo embiri yaanyu kuba ebitambo ebihuriire, ebirikwera, kandi ebirikusiimwa Ruhanga, nikwo kuheereza kwanyu oku mushemereire kumuha.’ (Abarooma 12:1) Koresa okubaasa kw’okwetegyereza kushwijuma enshonga ahabw’enki nooyenda kuramba omubiri gwawe. Enshonga yaawe yaaba eri ey’okwegaita aha kigombe nanka, ijuka ngu enyehurira ezi oiniire ekigombe ekyo nizibaasa kuhinduka bwanyima y’obwire kwonka tatu neeza kugumaho. Okushwijuma ekigyendererwa kyawe nikiza kukuhwera kucwamu gye.—Enfumu 4:7.

• ‘Ebi omweziriki ateekateeka kukora [nibirugamu obusinguzi], kwonka weena orahukiiriza, naayereetera obukyene.’ (Enfumu 21:5) Abarikuramba emibiri yaabo nibakira kucwamu barikurahukiriza, kwonka okucwamu kwabo n’okw’obutwire, nikukwata aha mikago ei baraagire n’emirimo ei baratunge. Kandi okwihaho tatu egyo aha mubiri gwawe nikishaasha munonga, kandi nikitwara n’esente nyingi. Okucondooza, abo abarikukora aha by’okwihaho tatu nibooreka ngu baingi abarikwetaho tatu bwanyima nibahika beefuuza ngu nangwa kuri batarazitaireho.