Edeni Ekaba Eri Eka Y’abantu Ab’okubanza?

TEERA akashushani ori omu musiri. Hatariyo ebirikuhuzya, n’endembo z’abantu ezirimu abantu baingi ezirimu akajagararo. Omusiri ogu ni muhango munonga, kandi tihaine ekirikubaasa kuteganisa obusingye bwawe. Kandi torikwerarikirira, omubiri gwawe tigurikubaasa kurwara, nk’efumbi, nari obusaasi. Ebikwetooroire byona tibirikutiinisa.

Nikikushemeza kureeba ebimuri birungi, amaizi marungi, ebimera birungi, n’ebibunda by’emiti. Noohurira akabeho aha mubiri kandi nookaga akahooho karungi. Noohurira amababi nigakubana, amaizi nigahimintika aha nkiri, ebinyonyi nibyeshongora n’okujunjuta kw’obukooko bwaba nibukora. Ku orikuteera akashushani, torikugira ekihika ky’okuba omu mwanya nk’ogwo?

Abantu baingi omu nsi yoona nibaikiriza ngu tukaba nitutuura omu mbeera nk’ezo. Kumara ebyasha bingi, ab’ediini y’Ekiyudaaya, Abaakristendomu, n’Abasiraamu batwire nibeegyesibwa aha musiri Edeni ogu Ruhanga yaatairemu Adamu na Haawa kutuuramu. Baibuli neegira ngu bakaba baine okushemererwa n’obusingye. Bakaba baine obumwe aha gati yaabo, enyamaishwa na Ruhanga owaabahaire amatsiko g’okutuuraho ebiro byona omu mwanya ogwo murungi.—Okutandika 2:15-24.

Abahindi nabo haine eki barikumanya aha paradiso eya ira. Ab’ediini ya Buddha nibaikiriza ngu abeebembezi baabo, nibazoora batuura omu mwanya ogwo oguri nka paradiso. Kandi ediini nyingi z’Africa nizeegyesa enshonga eziine akakwate n’okubaho kw’Adamu na Haawa.

Nangwa, ebirikukwata aha paradiso ey’okubanza nibimanywa munonga amadiini. Omuhandiiki omwe akagira ati: “Abantu baingi nibaikiriza ngu hakaba hariho paradiso eyaabaire erimu abantu bahikiriire, abaine obugabe, obusingye, okushemererwa, etarimu ebirikutiinisa nari obutabanguko. . . . Eki kikabareetaire kuteekateeka aha paradiso ei bafeereirwe kwonka n’okugira ekihika ky’okugigaruraho.”

Tugire ngu shi ebitebyo ebi byona n’emigyenzo biine obukomooko burikushushana? Nikibaasika abantu kuteekateeka kandi bakaijuka kyenyini ekyabaireho? Mbwenu shi buzima omusiri Edeni gukaba guriho nari Adamu na Haawa bakabaho?

Abahakanisa ekyo tibarikukiikiriza. Omu bwire obu obw’entunguuka ya saayansi, baingi nibateekateeka ngu ebi n’ebitebyo butebyo. Ekirikutangaaza, n’abeebembezi b’ediini baingi, nibagira ngu omusiri Edeni tigurabaireho. Nibagira ngu hakaba hatariho omwanya nk’ogwo. Nibagira ngu paradiso n’omwanya gw’akamanyiso, nari n’ekitebyo butebyo.

Amazima gari ngu, Baibuli erimu enfumu. Yesu akagamba enfumu zimwe ezirikumanywa gye. Kwonka, Baibuli yaaba neegamba aha musiri Edeni, terikugugambaho nk’ekitebyo, kureka nk’ekyafaayo, omuringo ogworobi kwetegyereza. Mbwenu shi, ebirikugambwaho ku biraabe bitarabaireho, nitubaasa kwesiga ebindi ebiri omu Baibuli? Ka tureebe ahabw’enki abamwe batarikwikiriza ngu omusiri Edeni gukabaho kandi tureebe yaaba enshonga zaabo zihikire. Kandi nituza kureeba ahabw’enki buri omwe aine kumanya enshonga egi.

Buzima Omusiri Edeni Gukabaho?

NOOMANYA ebirikukwata ahari Adamu na Haawa n’omusiri Edeni? Abantu omu nsi yoona ekyo nibakimanya. Naiwe noobaasa kushoma aha nshonga ezi? Ziri omu Okutandika 1:26–3:24. Aha hariho endozo:

Yehova Ruhangaa akahanga omushaija kuruga omu mucuucu, yaamweta Adamu yaamuta omu musiri ogurikwetwa Edeni. Ruhanga niwe yaataireho omusiri ogu. Gukaba gwine amaizi garikumara n’emiti y’ebijuma ebirikuriibwa. Aha gati y’ekibanja hakaba hariho “omuti gw’amagara, n’omuti ogw’okumanya oburungi n’obubi.” Ruhanga akaragiira abantu kutarya aha bijuma by’omuti gwo, kandi yaabagira ngu baaguryaho nibaija kufa. Ku haahingwireho obwire, Yehova akahangira Adamu omuhwezi, omukazi orikwetwa Haawa, yaamukora kuruga omu rubaju rw’Adamu. Ruhanga akabaha omurimo gw’okureeberera omusiri ogwo, kandi yaabaragiira ngu bazaare, bakanye baijure ensi.

Haawa ku yaabaire ari wenka, enjoka ekagamba nawe, yaamushendashenda kurya aha omuti ogu baabaire bazibiirwe kurya arikugira ngu Ruhanga akababeiha, kandi ngu haine ekintu kirungi eki yaabaire abasherekire, eky’okuba nkawe. Haawa akaikiriza yaarya aha muti ogwo. Bwanyima, Adamu akamwegaitaho omu kugomera Ruhanga. Yehova akataaha omu nshonga yaacwera rubanja Adamu, Haawa n’enjoka. Bwanyima akabinga abantu abo omu musiri murungi, yaataho baamaraika kurinda omuhanda ogurikuzayo.

Abacondooza, abanyabwengye, n’abanyabyafaayo, nibagira ngu ebihandiikirwe omu kitabo ky’Okutandika bihikire kandi ngu bikabaho. Ebiro ebi, hariho baingi abarikubangaanisa aha nshonga egi. Kwonka nibeegamira ahari ki kubangaanisa ebiri omu kitabo ky’Okutandika ebirikugamba ahari Adamu, Haawa, n’omusiri Edeni? Ka tureebe enshonga ishatu.

1. Omusiri Edeni gukaba guri omwanya ogwaabuzima?

Ahabw’enki eki nibakibanganisaho? Abanyabwengye omu by’ebigunjano nibo bahakani bakuru. Kumara ebyasha bingi, abarikucondooza aha by’ediini bakaba nibateebereza ngu omusiri gwa Ruhanga guikiriho omu nsi. Kwonka, bakabeihabeihwa abahangu Abagriika nka Plato na Aristotle, abaabaire nibagira ngu omu nsi tiharikubaasa kubamu ekintu ekihikirire. Ngu okuhikiirira kuri omu iguru honka. N’ahabw’ekyo, abashaija aba, baahendera barikugira ngu Paradiso ey’okubanza eshemereire kuba eri haihi n’eiguru.b Abandi bakagira ngu omusiri ogwo guri aha mutwe gw’orushozi ruraingwa munonga ahu gutarikubaasa kushiishwa abantu, abandi ngu guri omuri bukiizi bwa bumosho bw’ensi nari bukiizi bwa buryo, kandi abandi ngu guri haihi n’okwezi. Eki nikyo kirikureetera bamwe kuteekateeka ngu omusiri Edeni n’ekitebyo butebyo. Abacondooza ab’ebiro ebi nibagira ngu omwanya ogu omusiri Edeni gwabaire gurimu tiguhikire, ahakuba ngu tihakabahoga omwanya nk’ogu.

Kwonka Baibuli tikwo erikugamba etyo aha musiri ogwo. Okutandika 2:8-14, nihagamba aha birikukwata aha mwanya ogwo. Gukaba guri omu burugwa izooba omu mwanya ogurikwetwa Edeni. Gukaba gurimu emigyera ena erikushuka omuri gumwe. Buri mugyera gukaba gwine eiziina, kandi ahu gwabaire nigutoora nihashoboororwaho omu bugufu. Obushonshorekye obwo butangaarize abacondooza, kandi baingi babaasize kukoresa ebi Baibuli erikugamba aha mwanya ogu, kubahwera kuteeraho kumanya ahu omusiri ogwo gwabaire guri. Kwonka, eki kibareetaire, kutunga ebiteekateeko bitarikushushana. Mbwenu shi tugire ngu enshoboorora y’okubaho kw’omusiri Edeni, n’emigyera yagwo n’ebitebyo butebyo?

Eky’okuteekateekaho: Ebirikukwata aha musiri Edeni bikahaho nk’emyaka 6,000 enyima. Musa akabita omu buhandiikye, obundi arikukoresa ebi yaagambiirwe, nari ebihandiiko ebi yaashangireho. Kwonka nabwo, Musa akahandiika hahingwireho emyaka nka 2,500. Edeni ekaba yaabaireho ira. Mbwenu shi nikibaasika ebintu nk’emigyera kuhinduka bwanyima y’ebyasha bikye? Embeera y’ensi neeguma neehinduka. Omwanya ogwabaire gurimu Edeni nigukira kubamu emitsisa erikuhika ebicweka nka 17 ahari igana. Emyanya nk’egyo neebaasa kuhinduka. Kandi, Omwegyemure gwa Noa nigubaasa kuba gwahinduriire kimwe omwanya ogwo omu muringo ogu tutarikubaasa kwetegyereza hati.c

Kwonka aha hariho obuhame obu turikumanya: Ekitabo ky’Okutandika nikigira ngu buzima omusiri gukaba guriho. Emigyera ebiri ahari ena erikugambwaho omu kitabo ekyo Furaati na Tigris nari, Hidekeeli ekiriho obunaku obu kandi obukomooko gwayo nibumanywa. Nangwa ekitabo ekyo nikigamba n’aha maziina g’emyanya ahu emigyera egyo yaabaire neeshenenekyera n’amabaare g’obuguzi bwingi agaabaire gari omu mwanya ogwo. Abantu ba Israeli eya ira, abaabaire nibashoma aha bintu ebi, bakaba nibamanya obushonshorekye obwo.

Mbwenu shi ebitebyo n’ebigunjano nibituha obuhame? Nari nibiteeraho kwihamu enshonga nkuru eziine obuhame kandi ezitarikubaasa kubangaanisibwaho? “Ira munonga, omu mwanya gwa hare,” abantu nikwo barikukira kutandika batyo ebitebyo byabo. Kwonka, abanyabyafaayo obumwe nibatamu ebitarikwetengyesa, baaba nibagamba ahari Edeni.

2. N’eky’amazima Ruhanga akahanga Adamu omu mucuucu kandi yaakora Haawa omu rubaju rw’Adamu?

Saayansi ey’ebiro ebi neeyoreka ngu omubiri gwaitu gukozirwe omu bintu bingi, nk’emyoya ogu turikwitsya, ogu turikushohoza, na hydrogen, kandi yoona eri omu itaka. Kwonka shi ebi byona bikateebwa bita omu muntu ohurire?

Abanyasaayansi baingi nibagira ngu amagara gakabaho bubaho, garikutandikira omu buntu bworobi reero bwanyima y’obukaikuru bw’emyaka haarugamu ebigumire eiyetegyereza. Kwonka, ekigambo bworobi nikibaasa kuhabisa, ahakuba ebiine amagara byona, nangwa otwariremu n’obukooko bukye bugumire eiyetegyereza. N’ahabw’ekyo tihariho buhame oburikworeka ngu amagara gakabaho bubaho, kandi ekyo tikirikubaasika. Kureka, haine owaabikozire oine obwengye oburikukirira kimwe okwaitu.d—Abarooma 1:20.

Ka tugire oriyo noohurikiza ekyeshongoro nari waareeba ekishushani kihugirwe ekiboneire nari ekintu ky’amaani ekikozirwe abanyasaayansi, noija kugira ngu tihaine owaabikozire? Ngaaha buzima! Kwonka ebintu ebyo tibirikubaasa kuhika aha burungi bw’omubiri gw’omuntu, n’enkora yagwo egumire eiyetegyereza. Mbwenu shi nitubaasa kugira ngu tihaine owaahangire omubiri? Okwongyera ahari ekyo, ebiri omu kitabo ky’Okutandika nibigira ngu omu bintu byona ebiri omu nsi, abantu nibo bonka abakozirwe omu kishushani kya Ruhanga. (Okutandika 1:26) N’ahabw’ekyo kihikire kugira ngu abantu nibo barikubaasa kuteeraho kukora ebintu nk’ebya Ruhanga, kandi bakamutooreza barikukora ebyeshongoro, kuhuuga ebishushani n’okukora ebintu ebindi eby’obwengye. Mbwenu shi twine kutangaara kumanya ngu Ruhanga naakora ebintu ebirikukirira ebyaitu?

Okuhanga omukazi omu eigufa ry’orubaju rw’omushaija, nikibaasa kumugumira?e Ruhanga akaba naabaasa kuhanga omukazi omu muringo ogundi, kwonka okumuhanga omu muringo ogu kikakakwata ahari rukundo ye n’eya iba. Akaba naayenda ngu omushaija n’omukazi bataahe omu bushwere bagire omukago guhami, babe ‘nk’omubiri gumwe.’ (Okutandika 2:24) Oku omushaija n’omukazi barikuhwerahwerana, bakahika aha kugira enkoragana nungi, tikirikworeka ngu hariho Omuhangi omunyabwengye kandi oine rukundo?

Ekindi, abashaho abarikwetegyereza enkora y’obutafaari nibagira ngu abantu boona nibabaasa kuba baakomookire aha mushaija omwe n’omukazi omwe. Mbwenu shi buzima, ebiri omu kitabo ky’Okutandika tibirikukora amakuru?

3. Omutima gw’okumanya n’omuti gw’amagara nikireebeka n’ekitebyo.

Amazima gari ngu, ebiri omu Okutandika tibirikwegyesa ngu emiti egyo ekaba eine amaani g’omutaano. Kureka, emiti egyo haine eki yaabaire neejwekyera.

Abantu obumwe tibarikukora ekintu nk’ekyo? Nk’eky’okureeberaho, omuramuzi naabaasa kurabura enkozi y’ebibi ahabw’okutaha kooti ekitiinisa. Omuramuzi naaba atariyo naagambira emeeza, ebisiika bya kooti ngu nibyo ataaha kitiinisa kureka abari aha kakiiko nk’okucwa emanja. Abeebembezi baingi nabo nibakoresa enkoni n’ekirunga kujwekyera obushoboorozi bwabo.

Mbwenu shi emiti ebiri ekaba neejwekyera ki? Habaireho enyegyesa nyingi aha bikwatiraine n’enshonga egyo. Eky’okugarukamu kyorobi kandi nikishemeza. Omuti gw’okumanya oburungi n’obubi gukaba nigworeka ngu Ruhanga niwe aine obushoboorozi bw’okututeeraho omutindo gw’ekihikire n’ekigwire. (Yeremia 10:23) Gukaba guri omushango okurya aha mutima ogwo! Kandi omuti gw’amagara, gukaba nigworeka ngu Ruhanga niwe arikubaasa kutuha amagara agatahwaho.—Abarooma 6:23.

4. Enjoka okugamba nikireebeka nk’ekitebyo.

Ekicweka ky’ekitabo ky’Okutandika eki nikibaasa kuguma kwetegyereza na munonga waaba otashomire emishororongo endiijo. Kwonka, Ebyahandiikirwe nibishoboorora gye enshonga egi.

N’oha owaareeteire enjoka kugamba? Abaisraeli bakaba nibamanya gye enshonga ezindi ezaabaire nizishoboorora gye omurimo gw’enjoka egyo. Nk’eky’okureeberaho enyamaishwa tizirikugamba, ekihangirwe eky’omwoyo nikibaasa kureetera enyamaishwa kureebeka nk’ezirikugamba. Musa akahandiika n’ebirikukwata ahari Balamu, obu Ruhanga yaayohereza maraika akareetera endogoya ya Balamu kugamba nk’omuntu.—Okubara 22:26-31; 2 Petero 2:15, 16.

Mbwenu shi ebihangirwe ebindi, otwariremu n’abazigu ba Ruhanga nabo nibabaasa kukora eby’okutangaaza? Musa akaba yaareebire abafumu ba Misri nabo nibateeraho kukora eby’okutangaaza nk’ebya Ruhanga, nk’okureetera enkoni kuhinduka enjoka. Amaani g’okukora ebintu nk’ebi, nigabaasa kuba gaabaire nigaruga aha baamaraika ababi, abazigu ba Ruhanga.—Okuruga 7:8-12.

Kandi Musa akahwerwa kuhandiika ekitabo kya Yobu. Ekitabo ekyo nikitwegyesa bingi ahari Sitaane, omuzigu mukuru wa Ruhanga, owaagizire ngu abantu baagyezibwa tibarikubaasa kuguma bahamiire ahari Yehova. (Yobu 1:6-11; 2:4, 5) Abaisraeli aba ira shi bakaba nibamanya ngu Sitaane niwe yaareeteire enjoka omuri Edeni kureebeka nk’erikugamba na Haawa ekamureetera kuremwa kuguma ahamiire ahari Ruhanga? Nikibaasa kuba nikwo kiri.

Sitaane niwe yaakoreise enjoka kugamba ekishuba? Bwanyima Yesu akagira ngu Sitaane “n’omubeihi, ishe w’ebishuba.” (Yohaana 8:44) “Ishe w’ebishuba” niwe yaagambire ekishuba ky’okubanza. Ekishuba ky’okubanza kiri omu bigambo ebi enjoka yaagambiire Haawa. Enjoka erikuhakanisa okurabura kya Ruhanga owaagizire ngu haagira owaarya aha muti ogwabaire guzibiirwe naija kufa, ekagira eti ngu ‘okufa kwo, buzima timurikwija kufa.’ (Okutandika 3:4) Buzima, Yesu akaba naamanya gye owaagambiise enjoka. Ebi Yesu yaashuuruuriire entumwa Yohaana nibyoreka gye ngu Sitaane niwe ‘kijoka ekyo ekihango ekya ira.’—Okushuuruurwa 1:1; 12:9.

Mbwenu shi kigumire kwikiriza ngu ekihangirwe ky’omwoyo kiine amaani g’okureetera enjoka kweshushaniriza nk’erikugamba? N’obu abantu, baraabe bataine maani nk’ag’ebihangirwe eby’omwoyo, nibabaasa kukora obukoryo, kandi bahindure ebintu bireebeke nk’eby’omutaano.

Obuhame Obutarikubangaanisibwaho

Noikiriza ngu abarikuhakanisa ebiri omu kitabo ky’Okutandika tibaine buhame burikwesigwa? Kwonka, hariho obwamushinja bw’amaani ngu ebirikugambwaho omu kitabo ekyo bihikire.

Nk’eky’okureeberaho, Yesu naayetwa “kareebi omwesigwa kandi ow’amazima.” (Okushuuruurwa 3:14) Ahabw’okugira ngu Yesu akaba ahikiriire, tarahindwire omu mazima omu muringo gwona. Ekindi, akagira ngu akaba ariho ira atakaizire omu nsi, nangwa akaba naatuura na Ishe, Yehova, “ensi etakahangirwe.” (Yohaana 17:5) N’ahabw’ekyo akaba ariho obu bantu baahangwa bakatandika kutuura omu nsi. Kareebi omwesigwa ogu orikukira abandi boona akagamba ki?

Yesu akagira ngu Adamu na Haawa bakaba bari abantu abaabuzima. Akagamba aha bushwere bwabo obu yaabaire naashoboorora aha mutindo gwa Yehova ogw’okugira omukazi omwe. (Matayo 19:3-6) Ku baraabe baabaire batariho kandi n’omusiri ogu baabaire nibatuuramu kiri ekitebyo, biri na Yesu akabeiha. Yesu akaba ari omu iguru arikureeba oku akagwe kaatandikire kubaho omu musiri Edeni. Mbwenu shi hariho obuhame obundi oburikukira obwo?

Buzima, okwehuzya ebiri omu kitabo ky’Okutandika nikikuremesa kutaikiririza omuri Yesu. Kandi emiteekateekyere egi neebaasa kukureetera kugumirwa kwetegyereza enshonga ezimwe ezirikugambwaho omu Baibuli n’ebiraganiso ebirimu. Ka tureebe oku ekyo kirikubaasa kubaho.

[Obugambo obw’Ahansi]

Omusiri Edeni Nigukukwataho

ABACONDOOZA abamwe nibagira ebirikukwata ahari Edeni tibiine bushagiki omu byahandiikirwe ebindi omu Baibuli. Nk’eky’okureeberaho, Omuhangu w’eby’ediini Paul Morris akahandiika ati: “Tihariho mishororongo endiijo erikugamba ahari Edeni.” Nangwa n’abahangu abandi bakashagika okucondooza kwe.

Amazima agari ngu, Baibuli erimu emishororongo mingi erikugamba ahari Edeni, Adamu, Haawa n’ekijoka.a Kwonka enshobe z’abacondooza abamwe nizihumya amaisho ga baingi. Abeebembezi b’ediini n’abahakanisa okwanga kwikiriza ngu ebiri omu kitabo ky’Okutandika bikabaho nibaba nibahakanisa Baibuli yoona. Bata shi?

Okumanya ebyabaireho omuri Edeni ni kikuru ahakuba nikikuhwera kwetegyereza ebindi ebiri omu Baibuli. Nk’eky’okureeberaho, Ekigambo kya Ruhanga etebeekanisiibwe kuhwera kutunga eby’okugarukamu by’ebibuuzo ebi abantu barikukira kwebuuza. Kaingi, oku Baibuli erikugarukamu ebibuuzo ebyo kwine akakwate n’ebyabaireho omu musiri Edeni. Yetegyereze eby’okureeberaho ebimwe.

● Ahabw’enki nitukura kandi tukafa? Adamu na Haawa bakaba nibaija kugumaho ebiro byona ku ogire bakorobera Yehova. Kwonka bakaba nibaija kufa baamugomera. Bakatandika kufa aha izooba ryenyini obu baamugomera. (Okutandika 2:16, 17; 3:19) Bakafeerwa okuhikiirira, baahunguza baijukuru baabo ekibi n’obutahikiirira. Baibuli neeshoboorora eti: ‘Ekibi kikaija omu nsi ahabw’okushiisha kw’omuntu omwe, kandi kyarugamu okufa, nikwo n’okufa kwabugire omu bantu boona, ahakuba boona bakashiisha.’—Abarooma 5:12.

● Ahabw’enki Ruhanga naikiriza ebikorwa bibi kubaho? Omu musiri Edeni, Sitaane akeeta Ruhanga omubeihi orikwima ebihangirwe bye ebirungi. (Okutandika 3:3-5) Akahakanisa omuringo ogu Ruhanga arikutegyekamu. Adamu na Haawa bakacwamu kukuratira Sitaane, n’ahabw’ekyo bakanga kweta ahansi y’obutegyeki bwa Yehova, barikworeka ngu omuntu aine obugabe bw’okukora ekirungi nari ekibi. Ahabw’okugira ngu Yehova n’omuringaaniza kandi omunyabwengye, akaba naamanya kushoboorora gye oburemeezi obwo, akabaasa kwikiriza abantu kwetegyeka nk’oku barikwenda kumara akaire. N’ekirugiremu, ebikorwa bibi byeyongyeire kandi Sitaane okugumizamu naashagika obutegyeki bw’abantu kyorekire amazima makuru, ngu omuntu tarikubaasa kwetegyeka yaaba ataine Ruhanga.—Yeremia 10:23.

● Ruhanga ainiire ensi kigyendererwa ki? Omu musiri Edeni, Yehova akataho omutindo gw’okuboneza ensi. Akagambira Adamu na Haawa kuzaara kandi ‘bakaijuza,’ ensi na baijukuru baabo, kandi yoona bakagireetera kuba nungi. (Okutandika 1:28) N’ahabw’ekyo Ruhanga akaba agyendereire ngu ensi ebe paradiso etuurwemu abantu abahikiriire, eka y’abaijukuru b’Adamu na Haawa abaine obumwe. Bingi ebiri omu Baibuli nibigamba aha ku Ruhanga araahikiirize ekigyendererwa ekyo eky’okubanza.

● Ahabw’enki Yesu Kristo yaazaire omu nsi? Obugomi obwabaireho omu musiri Edeni bukareetera Adamu, Haawa n’abaijukuru baabo kufa, kwonka Ruhanga akataho entebeekanisa y’okubacungura. Akoohereza Omwana we kwija omu nsi kwehayo akaba ekitambo. (Matayo 20:28) Eki nikimanyisa ki? Yesu akaba, “Adamu owa bwanyima” yaakora eki Adamu yaaremirwe kuhikiiriza. Yesu akaguma ahikiriire obu yaabaire ari omu nsi, arikukuguma naayorobera Yehova. Bwanyima akeehayo nk’ekitambo, kubaasisa abantu boona abeesigwa kusaasirwa ebibi byabo, n’okwija kutuura omu mbeera nungi nk’ezi Adamu na Haawa baabaire barimu omuri Edeni. (1 Abakorinso 15:22, 45; Yohaana 3:16) N’ahabw’ekyo Yesu n’ohame ngu ekigyendererwa kya Yehova eky’okuhindura ensi akagaruka ekaba nka Edeni nikiija kuhikiirira.b

Ekigyendererwa kya Ruhanga nikiija kuhikiirira, kandi ti nyegyesa ya bantu buntu. N’okuragaanisa okwabuzima. Nk’oku omusiri Edeni gwabaire guri omwanya ogwabuzima omu nsi, gurimu abantu n’enyamaishwa ebyabuzima, nikyo kimwe n’okuragaanisa kwa Ruhanga buzima nikwija kuhikiirira. Noija kubayo, n’ekyabuzima ahariiwe? Kiri ahariwe. Ruhanga naayendeza abantu boona nyentsya egyo nangwa n’abasiisi.—1 Timoseo 2:3, 4.

Yesu ari haihi kufa, akagambira omushaija owaabaire ari omusiisi. Omushaija ogwo omushuma owaabaire ashemereire kwitwa. Kwonka akeesiga Yesu kumuhuumuriza n’okumuha amatsiko. Yesu akamutwariza ata? ‘Noija kuba naanye omuri Paradiso.’ (Luka 23:43) Yesu ku araabe naayenda kureeba omushuma ogwo arikuzooka kutuura omu mwanywa oguri nk’omusiri gwa Edeni, naiwe tarikukwendeza omugisha ogwo? Buzima naayenda! Na Ishe nikyo arikwenda! Naiwe ku oraabe nooyenda kugira nyentsya nk’egyo, kora kyona ekirikubaasika kwega ahari Ruhanga owaakozire omusiri Edeni.

[Obugambo obw’Ahansi]

[Akabokusi/​Ekishushani]

OBUNABI OBUBUGIRE OMU BAIBULI YOONA

‘Ninyija kuta obuzigu aha gati yaawe [enjoka] n’ogu mukazi, n’aha gati y’oruzaaro rwawe n’orwe, orwe nirwija kukuteera omutwe, naiwe noija kuruteera ekitsintsiino.’—Okutandika 3:15.

Obu nibwo bunabi bw’okubanza omu Baibuli obwagambirwe Ruhanga omuri Edeni. Omukazi, oruzaaro rwe, enjoka, n’oruzaaro rwe abarikugambwaho ni baahi? Bakaba nibaija kuharangatana muringo ki?

ENJOKA

Sitaane, Omuregi.—Okushuuruurwa 12:9.

OMUKAZI

Ekibiina kya Yehova eky’ebihangirwe eby’omu iguru. (Abagalatia 4:26, 27) Isaaya akagamba aha “mukazi” ogwo ngu akaba naija kuzaara eihanga ry’omwoyo omu biro by’omumaisho.—Isaaya 54:1; 66:8.

ORUZAARO RW’ENJOKA

Abo abaabaire nibaija kucwamu kushagika Sitaane.—Yohaana 8:44.

ORUZAARO RW’OMUKAZI

Yesu Kristo, oruzaaro rukuru orw’ekicweka ky’ekibiina kya Yehova eky’omu iguru. Kandi nihatwariramu beene ishe Yesu abashukirweho omwoyo gurikwera, abarikutegyekyera omu iguru. Abashukirweho omwoyo gurikwera nibo barikukora eihanga ry’omwoyo, ‘Israeli ya Ruhanga.’—Abagalatia 3:16, 29; 6:16; Okutandika 22:18.

OKUTEERA EKITSINTSIINO

Mesia akaba naija kutunga obuhuta bw’amaani kwonka butari bw’obutwire. Sitaane akasingura Yesu obu yaitwa ari omu nsi. Kwonka Yesu akazoorwa.

KUKUTEERA OMUTWE

Sitaane akaba naija kuteerwa omu muringo gw’akabi. Yesu naija kucwekyereza Sitaane obutagaruka kubaho. Ekyo kitakabaireho, Yesu naija kwihaho ebireetsirweho Sitaane kuruga obu yaatandika kubaho omu musiri Edeni.—1 Yohaana 3:8; Okushuuruurwa 20:10.

Kubaasa kumanya obutumwa bukuru bwa Baibuli, reeba akatabo The Bible—What Is Its Message? akaateirwe abajurizi ba Yehova.

[Ekishushani]

Adamu na Haawa bakabonabona ahabw’okushiisha kwabo