Oyetebeekanisiize Okubonabona Kwingi?

1. Ahabw’enki n’eky’obwengye kwetebeekanisiza ebihikiirizi?

OKWETEBEEKANISA nikujuna amagara. Nk’eky’okureeberaho, ku harikubaho ekihikiirizi, abantu abarikuba bakyetebeekanisiize nibakira kuhonokaho kandi nibabaasa kuhwera abandi. Ekitongore ekirikuhwera abantu omuri Europe kikagira kiti: “Okwetebeekanisa gye nikubaasa kujuna amagara.”

2. Ahabw’enki twine kwetebeekanisiza okubonabona kwingi? (Matayo 24:44)

² “Okubonabona kwingi” nikuza kutandika kitaraariire. (Mat. 24:21) Okubonabona kwingi tikuraabe nk’ebihikiirizi ebindi, ahakuba nitumanya ngu nikuza kubaho. Emyaka nka 2,000 enyima, Yesu akarabura abakuratsi be kwetebeekanisiza obwire obwo. (Shoma Matayo 24:44.) Twaba twetebeekaniise, nikiija kutworobera kugumisiriza omu bwire bugumire obwo kandi tuhwere n’abandi kugumisiriza.​—Luk. 21:36.

3. Okugumisiriza, esaasi, na rukundo nibiija kutuhwera bita kwetebeekanisiza okubonabona kwingi?

³ Yetegyereze emitwarize eshatu erikubaasa kutuhwera kwetebeekanisiza okubonabona kwingi. Nitwija kutwaza tuta baatushaba kubuurira obutumwa bw’okucwa orubanja na twahiiganisibwa abatarikuheereza Yehova? (Kush. 16:21) Nikiija kutwetengyesa kugumisiriza kubaasa kworobera Yehova, twine obwesigye ngu naaza kuturinda. Nitwija kukora ki ab’eishe-emwe bagyenzi baitu baafeerwa bimwe aha bintu byabo nari byona? (Hab. 3:17, 18) Nikiija kutwetengyesa kubagirira esaasi kubaasa kubahwera. Nitwija kutwaza tuta amahanga ageegaitsire hamwe ku garaataahirire abantu ba Ruhanga, kandi kikatwetengyesa kutuura n’ab’eishe-emwe na banyaanyazi-itwe kumara akaire? (Ezk. 38:10-12) Okubagirira rukundo ehami nikiija kutuhwera kuraba omu bwire bugumire obwo.

4. Baibuli neeyoreka eta ngu twine kugumizamu nitugira omutwarize g’okugumisiriza, esaasi na rukundo?

⁴ Ekigambo kya Ruhanga nikituhiga kwongyera kugumisiriza, kugira esaasi, na rukundo. Luka 21:19 nihagira hati: “Omu kwehangaana nimwo murijunira amagara gaanyu.” Abakolosai 3:12 nihagira hati: “Mujware omutima gw’esaasi.” Kandi 1 Abatesalonika 4:9, 10 nihagira hati: “Ahabw’okuba imwe ahabwanyu mukeegyesibwa Ruhanga okukundana. . . . Kwonka nitubeehanangiriza, b’eishe-emwe, mugume mweyongyere kukundana.” Emishororongo egyo bakagihandiikira abeegi abaabaire baayorekire okugumisiriza, esaasi, na rukundo. Kwonka, bakaba baine kugumizamu nibateeraho kworeka emitwarize egyo. Naitwe nikyo twine kukora. Ka tureebe oku Abakristaayo omu kyasha ky’okubanza baayorekire buri mutwarize. Bwanyima tureebe oku turikubaasa kubatooreza turikwetebeekanisiza okubonabona kwingi.

YONGYERA KUGUMISIRIZA

5. Abakristaayo ab’omu kyasha ky’okubanza bakagumisiriza bata okugyezibwa?

⁵ Abakristaayo omu kyasha ky’okubanza bakaba baine kugumisiriza. (Heb. 10:36) Oyihireho okugumisiriza oburemeezi nk’abantu abandi, bakaba baine emirabanamu endiijo. Baingi omuribo bakaba nibahiiganisibwa abeebembezi b’ediini y’Ekiyudaaya, abategyeki b’Abarooma, n’ab’amaka gaabo. (Mat. 10:21) Kandi bakaba baine kuhamya ngu tibahabisibwa enyegyesa zigwire z’abeehagwire aha mazima abaabaire nibateeraho kubaganisamu ekibiina. (Byak. 20:29, 30) Kwonka nabwo, Abakristaayo abo bakagumisiriza. (Kush. 2:3) Bata shi? Bakateekateeka aha bantu abaagumisiriize abarikugambwaho omu Baibuli, nka Yobu. (Yak. 5:10, 11) Bakashaba kugira amaani. (Byak. 4:29-31) Kandi bakata omutima aha birungi ebirikuruga omu kugumisiriza.​—Byak. 5:41.

6. Eki Merita yaakozire kubaasa kugumisiriza okuhiiganisibwa nitukyegyeraho ki?

⁶ Naitwe nitubaasa kugumisiriza twayega aha bantu abaagumisiriize abarikugambwaho omu Baibuli n’omu bitabo by’ekibiina kandi tukabateekateekaho. Munyaanyazi-itwe Merita, kuruga Albania ahabw’okukora ekyo, akabaasa kugumisiriza okuhiiganisibwa kw’amaani okw’ab’eka ye. Naagira ati: “Ku naashomire ebiri omu Baibuli ebirikukwata ahari Yobu bikampuumuriza munonga. Akabonabona munonga atarikumanya owaabaire naamureetera kubonabona, kwonka nabwo akagira ati: ‘Okuhitsya obu ndifa, tindireka kuguma ndi omwesigwa!’ (Yob. 27:5) Nketegyereza ngu Yobu akahikwaho okugyezibwa kw’amaani waakugyeragyeranisa n’okwangye. Okutashushana nawe, nkaba niimanya owaabaire naakureetaho.”

7. N’obu turaabe tutarikugyezibwa munonga, twine kwega kukora ki?

⁷ Nitubaasa kuhamya okugumisiriza kwaitu turikushaba Yehova emirundi mingi tukamugambira oburemeezi bwaitu bwona. (Fil. 4:6; 1 Tes. 5:17) Noobaasa kuba otaine okugyezibwa kw’amaani hati. Kwonka shi ku orikushoberwa, nari waaba otarikumanya eky’okukora nooshaba Yehova obuhabuzi? Waaba nooshaba Yehova butoosha kukuhwera waatunga buremeezi, torikwija kugumirwa kumushaba waahikwaho oburemeezi bw’amaani omu biro by’omumaisho. Noija kuba noohamiza kimwe ngu naamanya gye obu araakuhwere n’eki araakore kukuhwera.​—Zab. 27:1, 3.

8. Eky’okureeberaho kya Mira nikyoreka kita ngu twagumisiriza okugyezibwa hati nikiija kutuhwera twahikwaho okugyezibwa omu biro by’omumaisho? (Yakobo 1:2-4) (Reeba n’ekishushani.)

⁸ Nitwija kubaasa kugumisiriza okubonabona kwingi omu biro by’omumaisho twagumisiriza okugyezibwa hati. (Rom. 5:3) Ahabw’enki nitugira tutyo? Ab’eishe-emwe baingi nibagira ngu buri murundi ogu barikugumisiriza embeera zigumire, nikibahwera kugumisiriza oburemeezi obundi obu barikutunga. Okugumisiriza nikubahwera kuhamya okwikiriza kwabo ngu Yehova naayenda kandi ayeteekateekire kubahwera. Okwikiriza okwo kubabaasise kwemera okugyezibwa okundi. (Shoma Yakobo 1:2-4.) Mira payoniya omuri Albania, ayetegyereize ngu ahabw’okugira ngu akaba yaagumisiriize kimuhweraire kugumizamu naagumisiriza. Naagira ngu obumwe naateekateeka ngu niwe wenka oine oburemeezi bwingi. Kwonka tarikwebwa oku Yehova amuhweraire omu myaka 20, kandi naayeyijutsya ati: ‘Guma ori omwesigwa. Otaikiriza emyaka egyo yoona n’ebi osingwire byona orikuhwerwa Yehova kufa busha.’ Naiwe noobaasa kwijuka oku Yehova akuhweraire kugumisiriza. Gira obwesigye ngu Yehova naareeba buri murundi ogu orikugumisiriza okugyezibwa kandi naija kukuha ebihembo. (Mat. 5:10-12) Okubonabona kwingi kukuraatandikye, noija kuba oyegire kugumisiriza kandi noija kuba omariirire kugumizamu noogumisiriza.

GIRIRA ABANDI ESAASI

9. Ekibiina omuri Antiokia eya Siria kikooreka kita abandi esaasi?

⁹ Yetegyereze ekyabaireho obu Abakristaayo omuri Buyudaaya baateerwa enjara y’amaani. Ab’ekibiina ky’omuri Antiokia eya Siria ku baamanyire enjara egyo, hatariho kubangaanisa bakagirira esaasi ab’eishe-emwe b’omuri Buyudaaya. Kandi bakooreka omu bikorwa esaasi ezi baabaire baine. Bakamariirira, “buri muntu nk’oku yaabaasize, kwohereza eby’okuhwera ab’eishe-emwe abaabaire batwire Buyudaaya.” (Byak. 11:27-30) N’obu ab’eishe-emwe abaateirwe enjara baabaire bari hare, Abakristaayo omuri Antiokia bakaba bamaririire kubahwera.​—1 Yoh. 3:17, 18.

10. Ni mu miringo ki oku turikubaasa kworeka esaasi ab’eishe-emwe bagyenzi baitu baahikwaho ekihikiirizi? (Reeba n’ekishushani.)

¹⁰ Naitwe nitubaasa kugira esaasi twahurira ngu hariho ab’eishe-emwe abahikirweho ekihikiirizi. Nitugira eki twakora ahonaaho, nitubaasa kubuuza abareeberezi yaaba nitubaasa kuhwera butunu, kuhayo kushagika omurimo ogurikukorwa omu nsi yoona, nari kushabira abahikirweho ekihikiirizi.b (Enf. 17:17) Nk’eky’okureeberaho, omu 2020, Obukiiko Oburikuhwera Abahikirweho Ekihikiirizi oburikurenga omu 950 bukateebwaho kureeberera abaahikirweho ekigwererezi kya COVID-19. Abarikukora aha bukiiko obu nitubasiima munonga. Esaasi ezi bainiire ab’eishe-emwe na banyaanyazi-itwe nizibahiga kubatwarira eby’okubahwera eby’omubiri n’eby’omwoyo, kandi obumwe nibahunduuza nari bombeka busya amaju gaabo n’emyanya y’okuramizamu.​—Gyeragyeranisa 2 Abakorinso 8:1-4.

11. Ebikorwa by’esaasi nibihimbisisa bita Tataitwe ow’omu iguru?

¹¹ Twagirira abahikirweho ekihikiirizi esaasi, abandi nibareeba okwefeerereza kwaitu. Nk’eky’okureeberaho, omu 2019, eihunga Dorian rikashiisha Ekyombeko ky’Obukama omuri Bahamas. Ab’eishe-emwe ku baizire kugaruka kukyombeka, bakabuuza omushaija omwombeki otari Mujurizi wa Yehova, esente ezirikwetengyesa kukora omurimo. Akabagira ati: “Nkaayenzire kuhayo . . . ebyoma, amaani n’ebikoreso. . . . Eki niinyenda kukikorera ekibiina kyanyu. Ninkwatwaho omuringo oku murikutwariza banywani baanyu.” Abantu baingi omu nsi tibarikumanya Yehova. Kwonka baingi nibareeba ebi Abajurizi ba Yehova barikukora. Ka n’omugisha kumanya ngu ebikorwa byaitu eby’esaasi nibireetera abantu kwirira haihi ogwo oine ‘embabazi’ nyingi!​—Efe. 2:4.

12. Okugirira abandi esaasi nikituhwera kita kwetebeekanisiza okubonabona kwingi? (Okushuuruurwa 13:16, 17)

¹² Ahabw’enki nikiija kutwetengyesa kugirira abandi esaasi omu kubonabona kwingi? Baibuli neeyoreka ngu abataraashagike ebibiina by’obutegyeki omu kubonabona kwingi nibaija kutunga oburemeezi. (Shoma Okushuuruurwa 13:16, 17.) Ab’eishe-emwe na banyaanyazi-itwe nibabaasa kugumirwa kutunga eby’okwebaisaho ebirikwetengyesa. Omugabe waitu Yesu Kristo, ku araije kucwa orubanja, ka atushangye turikugirira abandi esaasi reero atwete ‘kuhungura Obukama.’​—Mat. 25:34-40.

YONGYERA KUHAMYA RUKUNDO

13. Nk’oku kirikworekwa omu Abarooma 15:7, Abakristaayo aba ira bakahamya bata rukundo yaabo?

¹³ Abakristaayo aba ira bakaba nibamanyirwa ahari rukundo. Kwonka shi kikaba nikiboorobera kworeka rukundo? Yetegyereze abantu batarikushushana abaabaire bari omu kibiina kya Rooma. Bamwe bakaba bari Abayudaaya abaakuzire barikworobera ebiragiro bya Musa, kandi abandi bakaba bari abanyamahanga ab’embeera zitarikushushana. Abakristaayo abamwe nibabaasa kuba baabaire bari abahuuku kandi abandi batari bahuuku, obundi bari bakama b’abahuuku. Mbwenu shi bakaba nibabaasa kuhamya bata rukundo yaabo n’obu baabaire bari ab’embeera zitarikushushana? Entumwa Paulo akabehanangiriza ‘kwakiirana.’ (Shoma Abarooma 15:7.) Akaba naamanyisa ki? Ekigambo ekirikuvunuurwa ‘okwakiira’ nikimanyisa okweta omuntu nari okumukunira, orikumutaayaayisa nari orikumwanjurira banywani baawe. Nk’eky’okureeberaho, Paulo akagambira Filemooni ‘kwakiira’ omukozi we Onesimo. (Film. 17) Kandi Priskila na Akula bakaakiira Apollo, owaabaire naamanya bikye aha Bukristaayo, “baamutwara owaabo.” (Byak. 18:26) Omu mwanya gw’okwebaganisamu, Abakristaayo abo bakaguma nibakwatanisa kandi barikwakiirana.

14. Anna n’omushaija we bakooreka bata abandi rukundo?

¹⁴ Naitwe nitubaasa kworeka ab’eishe-emwe na banyaanyazi-itwe rukundo turikubaakiira kandi tukamara nabo obwire. Twakora tutyo, nabo nibaija kututwariza omu muringo gwa rukundo. (2 Kor. 6:11-13) Tekateekateeka aha ky’okureeberaho kya Anna n’omushaija we. Bwanyima y’obwire bukye batandikire obuheereza busya bw’obumiisani omuri West Africa, hakabaho ekigwererezi kya COVID-19. N’ahabw’ekyo bakaba batarikubaasa kureebana butunu n’ab’omu kibiina kyabo. Mbwenu shi bakaba nibabaasa kubooreka bata rukundo? Bakakoresa vidiyo kuhurizana n’ab’eishe-emwe na banyaanyazi-itwe n’okubagambira ngu baine ekihika ky’okwongyera kubamanya gye. Ab’ekibiina ekyo bakakwatwaho munonga baaguma nibabateerera esimu kandi nibaboherereza obutumwa. Ahabw’enki abamiisani bataireho kumanyana n’ab’ekibiina kyabo ekisya? Anna naagira ati: “Tindikubaasa kwebwa ebikorwa bya rukundo ebi ab’eishe-emwe baanyorekire n’eka yangye omu mbeera enungi n’ezigumire. Eky’okureeberaho kyabo nikimpiga kugirira abandi rukundo.”

15. Nooyegyera ki ahari Vanessa aha bikwatiraine n’okukunda ab’eishe-emwe na banyaanyazi-itwe boona? (Reeba n’ekishushani.)

¹⁵ Baingi omuriitwe turi omu bibiina ebirimu ab’eishe-emwe na banyaanyazi-itwe abarikuruga omu mbeera ezirikutaana n’ezaitu kandi abaine emitwarize etarikushushana. Nitubaasa kuhamya rukundo ei tubainiire turikuta omutima aha mitwarize yaabo mirungi. Munyaanyazi-itwe orikwetwa Vanessa, ori New Zealand, akaba naagumirwa kukwatanisa n’abari omu kibiina kye. Kwonka akacwamu ngu omu mwanya gw’okwetanisa aha baine emitwarize erikumugwisa kubi, naija kwongyera kumara obwire nabo. Okukora ekyo, kikamuhwera kureeba eki Yehova arikubakundaho. Naagira ati: “Kuruga obu ibanyi yaahinduka omureeberezi wa saketi, nitumara obwire n’ab’eishe-emwe na banyaanyazi-itwe abaine emitwarize etarikushushana, kandi nikinyorobera kukwatanisa nabo. Hati ninkunda abantu b’emiringo yoona. Yehova nawe nikyo arikukunda ahakuba atureetsire omu guruupu y’abantu batarikushushana.” Twayega kureeba abandi nk’oku Yehova arikubareeba nitworeka ngu buzima nitubakunda.​—2 Kor. 8:24.

16. Ahabw’enki nikiija kwetengyesa kugira rukundo omu kubonabona kwingi? (Reeba n’ekishushani.)

¹⁶ Nikiija kwetengyesa kugira rukundo omu kubonabona kwingi. Nitwija kwiha nkahi oburinzi okubonabona kwingi kukuraatandike? Yetegyereze eki Yehova yaagambiire abantu be kukora obu Babulooni yaataahirirwa. Akabagira ati: “Imwe bantu bangye ‘mwe, nimwije mutaahe omu bishengye byanyu, mube mwekingirainemu akaanya kakye, okuhitsya ahu ekiniga kiraahwere.” (Isa. 26:20) Nikireebeka ebigambo ebyo nibikwata ahariitwe abaraahikweho okubonabona kwingi. “Ebishengye” nibibaasa kumanyisa ebibiina byaitu. Omu kubonabona kwingi, nitwija kutunga oburinzi obu Yehova arikuraganisa twaguma nitumuheereza turi n’ab’eishe-emwe na banyaanyazi-itwe. N’ahabw’ekyo, twine kuteeraho kubakunda hati. Ekyo nikyo kiraatuhwere kuhonokaho.

YETEBEEKANISE HATI

17. Okwetebeekanisa hati nikiija kutubaasisa kukora ki omu kubonabona kwingi?

¹⁷ “Eizooba rya [Yehova] erikuru” niriija kureetera abantu amaganya. (Zef. 1:14, 15) N’abaheereza ba Yehova nibaija kutunga oburemeezi. Kwonka twayetebeekanisa hati, nitwija kubaasa kuguma twikaikaine kandi tuhwere n’abandi. Nitwija kugumisiriza oburemeezi bwona oburaabeho. Ab’eishe-emwe bagyenzi baitu baahikwaho oburemeezi, nitwija kukora eki turikubaasa kubahwera, turikubagirira esaasi turikubaha n’eby’okwebaisaho ebirikwetengyesa. Kandi nitwija kuhamira aha b’eishe-emwe na banyaanyazi-itwe boona abu turikukunda munonga. Twakora tutyo, Yehova naija kutushumbuusha amagara agatahwaho omu nsi eraabe etarimu bihikiirizi n’okubonabona.​—Isa. 65:17.