-
Nooyetegyereza Ota Abajurizi ba Yehova?Omunaara gw’Omurinzi—2015 | Seputemba 1
-
-
OMUTWE OGURI AHA MUNAARA
Noomanya Abajurizi ba Yehova?
“Ntwire nimmanya Mike kumara emyaka mingi. N’omwe aha Bajurizi ba Yehova. Kwonka nkaba ntarikwetegyereza ediini ye. Yehova n’oha? Ahabw’enki Abajurizi Ba Yehova batarikukuza ebiro bikuru? Mike shi akaba ari omu kadiini katarikwetegyerezibwa?”—Becky, California, U.S.A.
“Bataahi baitu ku baatandikire kwega Baibuli n’Abajurizi ba Yehova, nkebuuza nti: ‘Eiziina Abajurizi ba Yehova nirimanyisa ki? Ediini egi ka eine eiziina ritarikwetegyerezibwa!’”—Zenon, Ontario, Canada.
“Nyowe n’omukazi wangye tukaba nitugira ngu Abajurizi ba Yehova baizire kwongyera kutureetera kweshinja ahabw’okugira ngu tukaba tutarikuza mu kanisa. Kandi tukaba nituteekateeka ngu obu amadiini agarikumanywa gataine eki twabaire nitusherura, akadiini katarikwetegyerezibwa ak’Abajurizi ba Yehova tikarikubaasa kuba kakiine.”—Kent, Washington, U.S.A.
“Okuba ow’amazima, nkaba ntarikubetegyereza gye hamwe n’ebi barikwikiriza.”—Cecilie, Esbjerg, Denmark.
Obundi noobaasa kuba orabareebire nibabuurira enju aha nju nari omu myanya erimu abantu baingi, barikugaba ebitabo ebirikushoboorora ahari Baibuli, nari barikwegyesa abantu Baibuli. Omwe aharibo naabaasa kuba arakuhaireho magaziini egi. Kwonka, noobaasa kuba nookyebuuza, Abajurizi ba Yehova buzima nibo baahi? Obundi emiteekateekyere yaawe neebaasa kuba eri nk’eya bamwe abaagambwaho aharuguru.
Ku oraabe oine ebibuuzo, noobaasa kwiha nkahi eby’okugarukamu? Noobaasa kumanya ota ebi Abajurizi ba Yehova barikwikiriza, oku obuheereza bwabo n’emyanya yaabo y’okuramizamu birikwemerezibwaho, n’enshonga ahabw’enki nibaza omu maka g’abantu n’omu myanya erimu abantu bingi?
“Nkashoma munonga aha birikukwata aha Bajurizi ba Yehova kurabira aha Intaneeti,” Cecilie owaaba yaagambirweho nikwo ari kugira. “Nkahurira orugambo, kandi naahurikiza n’ebi abantu baabaire nibabagambaho ebirikworeka okushoroora. Ekyarugiremu, nkangira kimwe Abajurizi ba Yehova.” Bwanyima, akabaasa kugamba butunu n’Abajurizi ba Yehova yaatunga eby’okugaruka by’ebibuuzo bye.
Naiwe nooyenda kutunga eby’okugarukamu ebihikire eby’ebibuuzo byawe ebirikukwata aha Bajurizi ba Yehova? Nitukuhiga kubuuza Abajurizi ba Yehova benyine abaateire magaziini egi. (Enfumu 14:15) Twine amatsiko ngu ebicweka ebirikukurataho nibiija kukuhwera kutumanya, kumanya ebi turikwikiriza n’obuheereza bwaitu.
-
-
Abajurizi ba Yehova ni Bantu ba Muringo Ki?Omunaara gw’Omurinzi—2015 | Seputemba 1
-
-
OMUTWE OGURI AHA MUNAARA | NOOMANYA ABAJURIZI BA YEHOVA?
Abajurizi ba Yehova ni bantu ba muringo ki?
Ekibiina kyaitu kirimu abantu kuruga omu nsi yoona kandi tikiine kakwate n’ebibiina by’amadiini agandi. N’obu ofiisi yaitu enkuru eraabe eri omuri United States, Abajurizi ba Yehova bingi nibatuura omu mahanga agandi. Nangwa, obukaikuru nka munana ahariitwe nitwegyesa abantu Baibuli omu mahanga garikurenga 230. Nitukikora turikworobera ebigambo bya Yesu ebi: “Engiri egi ey’Obukama eryagambwa omu nsi zoona okuba eky’okuhamya aha mahanga goona.”—Matayo 24:14.
Hoona ahu turikutuura, nitworobera ebiragiro by’eihanga. Kwonka nituteeraho kutejwanzya omu by’obutegyeki. Ahabw’okuba nitworobera obuhabuzi bwa Yesu obw’okutaba “ab’ensi.” N’ahabw’ekyo, titurikwejumba omu by’obutegyeki nari emirimo erikushagika entaro. (Yohaana 15:19; 17:16) Nangwa n’omu rutaro rw’ensi yoona orwa II, Abajurizi ba Yehova bakakomwa, baabonabonesibwa, n’abamwe baitwa ahabw’okutejwanzya omu by’obutegyeki. Owaabaireho bishopu omuri German akahandiika ati: “Nibateekateeka ngu nibo barikukirayo kukuratira omuntu waabo w’omunda bakanga kuza omu mahe omu butware bwa Nazi.”
“[Abajurizi ba Yehova] baine emicwe mirungi. Tukaabaire nitukoresa abantu nk’abo abatarikweyendeza omu myanya mikuru y’eby’obutegyeki, kwonka titurikubaasa kubatunga omu myanya nk’egyo. . . . Niboorobera ab’obushoboorozi omu gavumenti kwonka nibaikiriza ngu obukama bwa Ruhanga nibwo bwonka burikubaasa kuhezaho oburemeezi bw’abantu.”—Nová Svoboda orupapura rw’amakuru omuri Czech Republic.
Kwonka, titurikwetaanisa aha bandi. Yesu arikushabira abakuratsi be, akashaba Ishe ati: “Tindikukushaba ngu obaihe omu nsi.” (Yohaana 17:15) N’ahabw’ekyo, noobaasa kutureeba turikukora, turikugura ebintu, nari turikuza aha ishomero.
-
-
Abajurizi ba Yehova Nibaikiriza Ki?Omunaara gw’Omurinzi—2015 | Seputemba 1
-
-
OMUTWE OGURI AHA MUNAARA | NOOMANYA ABAJURIZI BA YEHOVA?
Abajurizi ba Yehova nibaikiriza ki?
Abajurizi ba Yehova nibaikiriza ngu Ebyahandiikirwe byona, bihandiikisiibwe omwoyo gwa Ruhanga, kandi biine omugasho. (2 Timoseo 3:16) Nitukoresa Baibuli kutuhwera kwega aha Muhangi n’okugira ekigyendererwa.
Baibuli neeshoboorora eti: “Bamanye ngu niiwe wenka orikwetwa Yehova, okira boona, kandi otegyeka ensi yoona.” (Zaaburi 83:18) N’ahabw’ekyo, nituramya Yehova Ruhanga wenka, kandi ahabw’okugira ngu turi Abajurizi ba Yehova nituteeraho kumanyisa abandi eiziina rye.—Isaaya 43:10-12.
Nitwikiriza ngu Yesu, “Omwana wa Ruhanga,”a akaija omu nsi yaaba Mesia. (Yohaana 1:34, 41; 4:25, 26) Bwanyima ya Yesu kufa kandi akazooka, akatemba omu iguru. (1 Abakorinso 15:3, 4) Yaaba Omukama w’Obukama bwa Ruhanga. (Okushuuruurwa 11:15) Obukama obwo ni gavumenti eyaabuzima erikwija kugaruraho Paradiso omu nsi. (Danieli 2:44) Baibuli neegira ngu “abacureezi baryahungura ensi, beesiime ahabw’okugira obusingye bwingi.”—Zaaburi 37:11, 29.
“Baaba nibashoma Baibuli, nibaikiriza ngu Ruhanga naaba naagamba nabo. Ku barikutunga oburemeezi, nibasherura obuhabuzi omu Kigambo kya Ruhanga. . . . Aharibo, Ekigambo kya Ruhanga kikihuriire.”—Omukuru omu diini y’Abanyakaturiki Benjamin Cherayath, Münsterländische Volkszeitung orupapura rw’amakuru omuri Germany
Abajurizi ba Yehova nibaikiriza ngu emisingye ya Baibuli neebaasa kuhwera abantu na hati. (Isaaya 48:17, 18) N’ahabw’ekyo, nituteeraho munonga kugyendera aha misingye egyo. Nk’eky’okureeberaho, ahabw’okugira ngu Baibuli neeturabura kwetantara ebikorwa ebirikubaasa kushiisha ebiteekateeko n’emibiri yaitu, titurikureetsa nari kukoresa emibazi y’ekitabura bwongo. (2 Abakorinso 7:1) Nitwetantarira kimwe ebikorwa bibi ebi Baibuli etarikwikiriza nk’obusinzi, obushambani, n’okwiba.—1 Abakorinso 6:9-11.
a Baibuli neegamba ahari Yesu ‘nk’Omwana wa Ruhanga omwe nyamunegyere’ ah’abw’okuba niwe ou Ruhanga yaabandize kuhanga kandi ou yaayehangiire butunu.—Yohaana 3:18; Abakolosai 1:13-15.
-
-
Obuheereza Bwaitu Nibwemerezibwaho Buta?Omunaara gw’Omurinzi—2015 | Seputemba 1
-
-
OMUTWE OGURI AHA MUNAARA | NOOMANYA ABAJURIZI BA YEHOVA?
Obuheereza bwaitu nibwemerezibwaho buta?
Buri mwaka, nituteera kandi tugaba Baibuli n’ebitabo ebirikushoboorora aha Baibuli bingi munonga. Omu nsi yoona nitwombeka ofiisi z’amataagi n’ahu turikuteerera ebitabo. Ebibiina bingi nibiteeranira omu myanya mirungi y’okuramizamu erikwetwa Ebyombeko by’Obukama. Ni baahi abarikuhayo sente z’okukora ebi byona?
Omurimo gwaitu nigushagikwa abarikuhayo beekundiire. (2 Abakorinso 9:7) Omuri 1879, omunaara gwa kabiri gukagira ngu, “‘Zion’s Watch Tower’ [nk’oku magaziini egi yaabaire neeyetwa], neeshagikwa YEHOVA, kandi titurikubaasa kushabiiriza nari kweshengyereza abantu kutushagika.” Na hati titukahinduraga emiteekateekyere yaitu.
Esente niziheebwayo aha ofiisi z’amataagi nari omu kabokisi akari omu Kyombeko ky’Obukama. Kwonka titurikuhayo kimwe kya ikumi, kushorooza sente nari kushaba abantu kushashurira obuheereza bwaitu nari ebitabo byaitu. Titurikushashurwa ahabw’okubuurira, okwegyesa omu kibiina, nari twaba nituhwera omu kwombeka emyanya y’okuramizamu. Kandi, Yesu akagira ati: “Mukaheerwa busha, naimwe muheere busha.” (Matayo 10:8) Abarikuheereza aha ofiisi z’amataagi nari aha ofiisi enkuru, otwariiremu n’abari aha Kakiiko Akareeberezi ak’Abajurizi ba Yehova tibarikushashurwa mushaara.
“Nk’oku kiri aha mirimo y’Abajurizi ba Yehova yoona, esente ezirikukora emirimo yaabo niziheebwayo abantu buri omwe okwe, buri muntu niwe arikucwamu ezi araaheyo n’obu arikwenda kuhayo.”—Kooti ya Buraaya ey’Obugabe bw’Abantu, 2011
Esente ezi turikuhayo nizikoresibwa n’omu kuhwera abahikirweho ebihikiirizi. Abakristaayo ba ira kikaba nikibashemeza kwejumba omu kuhwera abahikirweho ebihikiirizi. (Abarooma 15:26) Naitwe nituhwera abahikirweho ebihikiirizi turikugaruka kwombeka amaka gaabo n’emyanya y’okuramizamu, turikubaha eby’okurya, eby’okujwara, n’obujanjabi.
-
-
Ahabw’Enki Nitubuurira?Omunaara gw’Omurinzi—2015 | Seputemba 1
-
-
OMUTWE OGURI AHA MUNAARA | NOOMANYA ABAJURIZI BA YEHOVA?
Ahabw’enki nitubuurira?
Omurimo gw’okubuurira enju aha nju, omu myanya erimu abantu baingi, na hoona ahu turikushanga abantu nigwo gurikukirayo kutumanyisa munonga. Ahabw’enki nitubuurira?
Abajurizi ba Yehova nibabuurira kuhimbisisa Ruhanga n’okumanyisa abantu eiziina rye. (Abaheburaayo 13:15) Kandi nitukikora kworobera Kristo Yesu, owaaragiire ati: “Mugyende omu mahanga goona, muhindure abantu abeegi, . . . nimubeegyesa kworobera byona ebi naabaragiire.”—Matayo 28:19, 20.
Kandi, nitubuurira ahabw’okukunda bataahi baitu. (Matayo 22:39) Kwonka, nitumanya ngu abantu baingi baine ediini zaabo kandi ti buri omwe ngu naakunda obutumwa bwaitu. Beitu nabwo, nitwikiriza ngu enyegyesa za Baibuli nizikiza amagara. Niyo nshonga ahabw’enki nitugumizamu kubuurira amakuru marungi agarikukwata ahari Kristo, nk’oku Abakristaayo omu kyasha ky’okubanza baakozire.—Ebyakozirwe 5:41, 42.
Omuhangu w’emituurire y’abantu Antonio Cova Maduro akahandiika aha “kuteeraho kw’Abajurizi ba Yehova n’oburemeezi obu barikutunga ngu, nibahika n’aha kuruha . . . , kugira ngu ebihandiiko ebirikwera bihikye omu kashonda k’ensi aka hare munonga.”—El Universal, orupapura rw’amakuru omuri Venezuela
Baingi abarikushoma ebitabo byaitu ti Bajurizi ba Yehova. Kandi baingi abu turikwegyesa Baibuli baine amadiini gaabo. Kwonka nibashemererwa kureeba ngu Abajurizi ba Yehova nibabataayaayira kubeegyesa.
Obundi noobaasa kuba oine ebindi bibuuzo ebirikukwata aha Bajurizi ba Yehova. Nitukushaba kutunga eby’okugarukamu
Orikubuuza omwe aha Bajurizi ba Yehova.
Orikuza aha mukura gwaitu, www.jw.org.
Orikuza omu nteerane zaitu, ezitarimu kushorooza sente kandi ezirikugiibwamu abantu boona.
-