Kurugiirira ahari kashoboorozi emwe, sayansi nikimanyisa “okucondooza ebirikukwata aha biine amagara n’ebitaine magara.” Okukora ekyo n’omurimo gugumire kandi obumwe ogurikureeta amaganya. Abanyasayansi nibamara saabiiti nyingi, ameezi, nari obundi emyaka barikucondooza kandi barikugyeza ebi bacondoorize. Obumwe okucondooza kwabo tikurikurugamu karungi koona, kwonka obundi nikurugamu ebirikugasira abantu. Teekateeka aha by’okureeberaho ebi bikye.

Ekitongore kimwe kuruga Buraaya kikagaita pulasitika egumire n’obugyegyena kukora eky’okugyegyenesa amaizi kugira ngu abantu batarwara ahabw’okunywa amaizi garimu oburofa. Eby’okugyegyenesa amaizi nk’ebi nibikoresibwa habaho ekihikiirizi, nk’ekyabaireho omu 2010 omuri Haiti.

Ahaiguru omu mwanya, babaasize kutayo ebitangaazo ebirikutangaaza omu nsi yoona. Entebeekanisa egi neeyetwa Global Positioning System (GPS). Omu kubanza entebeekanisa egi ekaba eteereirweho amahe, kwonka hati neehwera abavugi b’emotoka, ab’enyonyi, ab’amaato, abahiigi n’abarambuzi kubaasa kumanya ei barikuza. Nitusiima abanyasayansi abaajumbwire entebeekanisa egi, erikubaasisa omuntu kuhika ei arikwenda kuza.

Nookoresa esimu, kompyuta, nari Intaneeti? Mbwenu shi obaasize kubaho gye nari kutambirwa ahabw’okutunguuka omu by’emibazi? Noogyendera omu nyonyi? Ku kiraabe nikwo kiri, nooba noogasirwa omu bintu ebi sayansi ekozire kuhwera abantu. Sayansi ekuhwereire omu miringo mingi.

OBUGARUKIRO BWA SAYANSI

Kubaasa kwongyera aha kumanya kwabo, abanyasayansi ab’obunaku obu nibacondooza munonga aha buhangwa bw’ebintu. Abarikucondooza aha butafaari bw’ebihangirwe nibeeyongyera kucondooza aha katafaari akarikukirayo obukye, kandi abarikucondooza aha by’omu iguru omu mwanya nibateeraho kumanya ebyabaireho obuhumbi bw’emyaka enyima kubaasa kumanya obukomooko bw’eiguru n’ensi. Abanyasayansi abamwe ku barikuba nibacondooza, nangwa n’omu bizinga ebitarikureebwa n’amaisho, nibateekateeka ngu Ruhanga orikugambwaho omu Baibuli ku araabe ahariho, bashemereire kumubona.

Abanyasayansi abarikumanywa munonga n’abanyabwengye nibakora ekirikukira ahari ekyo. Nibakora eki omuhandiiki wa sayansi orikwetwa Amir D. Aczel yaayetsire “okuhanuura kwa sayansi aha kubaho kwa Ruhanga.” Nk’eky’okureeberaho, omunyasayansi orikumanywa gye omu nsi yoona akagira ngu “okutabaho obuhame ngu Ruhanga aine eki arikukoraho omu nshonga z’ebihangirwe byona hatariho kubanganisa kwona nikyoreka gye ngu ruhanga nk’ogwo tariho.” Abamwe nibagira ngu ebi Ruhanga orikugambwaho omu Baibuli yaakozire, “n’emiguruko” nari “bikakorwa omu maani agatarikwetegyerezibwa.”a

Kwonka, ekibuuzo ekiine kubuuzibwa n’eki: Mbwenu shi abanyasayansi beegire bingi ebirikukwata aha bihangirwe kubaasa kuha obuhame obuhikire? Nitubaasa kugira ngu ngaaha. Sayansi ereetsireho entunguuka y’amaani, kwonka abanyasayansi baingi nibamanya ngu hakiriyo bingi ebi batarikumanya obundi ebi bataribaasa kumanya. “Titurikubaasa kwetegyereza obuhangwa,” nikwo Omunyasayansi orikwetwa Steven Weinberg yaagizire. Omuhangu Martin Rees ow’omuri Britain, akahandiika ati: “Nihabaasa kuba hariho ebintu ebi abantu bataribaasa kwetegyereza.” Amazima gari ngu, bingi ebirikukwata aha bihangirwe, kuruga aha katafaari akakye kuhika aha nsi yoona n’eiguru, abanyasayansi ab’obunaku obu tibarikubyetegyereza. Yetegyereze eby’okureeberaho ebi:

• 

  Abanyasayansi tibarikwetegyereza gye byona ebirikuba nibikorwa omunda y’akatafaari. Oku obutafaari burikwakiira amaani g’eizooba, oku burikukora ebiriisa, n’oku burikwebaganisamu ebi n’ebibuuzo ebi sayansi etakagarukiremu.

• 

  Amaani agarikukurura ebintu kubigarura ahansi nigatukwataho akiire koona. Kwonka abanyasayansi tibarikwetegyereza gye oku garikukora. Tibarikumanya gye oku amaani ago garikukurura omuntu kumugarura ahansi yaaheza kuguruka nari oku garikuhwera okwezi kuguma nikwetoororera aha nsi.

• 

  Abarikucondooza aha buhangwa bw’ebintu nibatebeereza ngu ebicweka 95 ahari 100 eby’ebintu ebiri omu nsi n’omu mwanya tibirikureebwa kandi n’abanyasayansi tibarikubaasa kubireeba barikukoresa ebyoma byabo. Eki nibakita omu bicweka bibiri ebi: Ekintu eki batakareebaga n’amaani agu batakareebaga. Omuringo gw’ebintu ebi byombi tigurikumanywa.

Hariho ebintu bingi ebitarikumanywa ebirikuteganisa abanyasayansi. Ahabw’enki eki ni kikuru? Omuhandiiki wa sayansi orikumanywa naagira ati: “Ebintu ebi tutarikumanya nibikira ebi turikumanya. Ahabwangye, sayansi eshemereire kureetera omuntu kutangaara kandi akeenda kwega bingi omu mwanya gw’okutafayo kucondooza.

N’ahabw’ekyo, ku oraabe nooteekateeka ngu sayansi eihire Baibuli aha murembe kandi okarekyera aho kwikiririza omuri Ruhanga, yebuuze oti: Abanyasayansi abanyabwengye abaine ebyoma by’amaani ku baraabe batarikumanya bingi ebirikukwata aha bihangirwe, nikiba kiri eky’obwengye kwanga kwikiriza kucondooza aha bintu ebi sayansi etarikubaasa kucondoozaho? Bwanyima y’okuhandiika bingi ebirikukwata aha byafaayo n’okwetegyereza ebiri omu mwanya, ekitabo Encyclopedia Britannica kikahendera kiti: “Bwanyima y’emyaka 4000 y’okucondooza aha by’omu mwanya, ebihangirwe tibirikwetegyerezibwa nk’oku Ababulooni baabaire batarikubyetegyereza gye.”

Abajurizi ba Yehova nibaha ekitiinisa obugabe bwa buri muntu obw’okucwamu omu nshonga egi. Nituteeraho kugyendera aha buhabuzi bwa Baibuli obu: “Okworoberana kwanyu kumanywe abantu boona.” (Abafilipi 4:5) Twine ekyo omu biteekateeko, nitukushaba kushwijuma oku sayansi erikuhikaana n’ebiri omu Baibuli.

Omu myaka egi, ebitabo bingi ebirikushoboorora aha miteekateekyere y’abo abatarikwikiririza omuri Ruhanga bikanyire. Ebitabo ebi bishemeize abantu baingi baatandika n’okubihaajanaho. Aha bikwatiraine n’enshonga egi, omuhangu omwe orikwetwa David Eagleman akahandiika ati: “Abashomi abamwe nibateekateeka ngu . . . abanyasayansi nibamanya buri kimwe.” Kandi akongyeraho ati: “Kwonka abanyasayansi abarungi n’abo abarikwikiriza ebiteekateeko ebindi, kandi omurimo gwabo nigutwariramu okujumbura ebisya.”

Emyaka mingi enyima, abanyasayansi abaine etalanta bakozire eby’okutangaaza barikuteeraho kusherura eby’okugarukamu by’ebibuuzo ebigumire ebirikukwata aha buhangwa. Kwonka abamwe, bakozire enshobe nyingi omu kucondooza kwabo. Isaac Newton akaba ari omwe aha banyasayansi ab’amaani. Akooreka oku amaani agarikukurura ebintu kubigarura ahansi garikuhwera ensi, enyonyoozi, n’ebizinga kwetoorora. Akajumbura gumwe aha muringo gw’ebibaro ogwaizire kuhwera munonga omu kujumbura kompyuta. Kwonka, Newton akeega n’eby’okuheesha okurimu emiguruko omu kuteeraho kuhindura rusasi n’ebindi byoma kubiihamu ezaabu.

Emyaka erikurenga 1,500 Newton atakabaireho, Ptolemy Omugriika orikwega eby’omu mwanya akajumbura eby’omu mwanya arikukoresa amaisho ge gonka. Akaba ayetegyereza eby’omu mwanya omu bwire bwa nyekiro kandi akaba ari omuhangu aha kuteera maapu. Kwonka akaba naikiriza ngu ensi niyo yaabaire eri entima y’ebintu byona. Omushaija orikwetwa Carl Sagan nawe orikwega aha ntwaza y’eby’omu mwanya akahandiika ahari Ptolemy ati: “Abo boona abaabaire nibamwikiririzamu bakaba bahabisiibwe kumara emyaka 1,500, ekirikworeka ngu tihariho buhame ngu abanyabwengye tibarikubaasa kwikiriza ebigwire.”

N’obunaku obu abanyasayansi nibatunga oburemeezi nibwo bumwe omu kuteeraho kwabo. Mbwenu shi hariho obu baribaasa kushoboorora gye ebirikukwata aha nsi n’eiguru? N’obu turaabe twine kumanya okutunguuka oku sayansi ekozire n’oku erikutugasira, twine n’okumanya obugarukiro bwayo. Omuhangu Paul Davies akeetegyereza ati: “Okuteeraho kusherura entebeekanisa nungi erikushoboorora omu bwijwire ahari buri kintu, tikurumu matsiko goona.” Ebigambo ebyo birimu amazima agatarikubanganisibwa ngu: Abantu tibarikubaasa kwetegyereza gye ebihangirwe. N’ahabw’ekyo abanyasayansi baaba nibaikiriza ngu nibabaasa kushoboorora buri kimwe ekiriho, nikiba kiri eky’obwengye kubeegyendesereza.

Baibuli neegamba aha kutangaaza kw’ebyahangirwe eti: “Reeba, ebyo nibyo, kwonka n’otw’aha rubaju omu mitwarize ye, kandi n’ebi tumuhuriraho ni bikye munonga nk’okugambirana omu kutu.” (Yobu 26:14) Hakiriyo bingi ebi abantu batarikubaasa kumanya kandi bakeetegyereza. Ebigambo by’Entumwa Paulo, ebyahandiikirwe emyaka nka 2,000 enyima, na hati bihikire: “Yeimwe! obutungi bwa Ruhanga, obwengye bwe n’okumanya kwe ka bitaine bugarukiro! Emicwere ye n’emitwarize ye tibirikubaasa kumanywa.”​—Abarooma 11:33.