Enshonga Ahabw’Enki Tutashemereire Kubeiha

KATUGIRE ngu omwishiki yaagambira nyina ati: “Ninyija kugaruka omuka ahonaaho baaheza kutusiibura ah’eishomero.” Kwonka bakiruga omu kibiina abanza kuzaana na banywani be reero bwanyima yaahika omuka agambira nyina ati: “Ku twaruga omu kibiina omushomesa wangye yaangira ngu ngume ah’eishomero.” Mbwenu nikiba kihikire kugamba ekintu nk’ekyo?—

Nari omwojo yaagambira ishe ati: “Ti naazaanira mupiira omu nju.” Kwonka shi ku yaakuba yaguzaaniramu? Nikiba kihikire kugira ngu tiyaguzaaniramu?—

Omwegyesa Mukuru akagamba ekihikire eki twine kukora. Akagira ati: ‘Kwonka ebigambo byanyu Eego ebe Eego nari Ngaaha ebe Ngaaha; ahakuba ebirikukira ahari ebyo biruga aha Mubi.’ (Matayo 5:37) Omuri ekyo Yesu akaba naamanyisa ki?— Akaba naamanyisa ngu twine kukora eki turikugamba.

Hariho ekitebyo ekiri omuri Baibuli ekirikworeka obukuru bw’okugamba amazima. Nikikwata aha bantu babiri abaabaire nibeetwara kuba abeegi ba Yesu. Ka tureebe ekyabaireho.

Hatakahingwireho ameezi abiri Yesu aherize kufa, abantu baingi kuruga omu bicweka bya hare bakaija omuri Yerusaalemu aha bugyenyi bukuru bw’Abayudaaya obwabaire nibwetwa Pentekoote. Entumwa Petero akaha orubazo rurungi omu yaagambiriire abantu ebirikukwata ahari Yesu, ou Yehova yaazoire kuruga omu bafu. Abantu baingi ahari abo abaabaire baizire Yerusaalemu gukaba guri omurundi gwabo gw’okubanza kwega ahari Yesu. Bakaba nibenda kumanya bingi ebirikumukwataho. Mbwenu, bakakora ki?

Bakagumayo baarenzya aha bwire obu baabaire baine kumarayo. Kwonka bwanyima, abamwe esente zikabahwaho kandi bakaba nibeetenga obuhwezi kugira ngu babaase kugura eby’okurya. Abeegi ab’omuri Yerusaalemu bakacwamu kuhwera abagyenyi abo. N’ahabw’ekyo, baingi aharibo bakaguza ebintu byabo ebi baabaire baine reero esente baazireetera entumwa za Yesu. Reero entumwa, esente ezo baaziha abo abaabaire nibeetenga obuhwezi.

Anania n’omukazi we Safira, ab’omu kibiina Ekikristaayo eky’omuri Yerusaalemu nabo bakaguza ekibanja kyabo. Tihaine owaabagyemire kukiguza. Nibo bayeecwereiremu kukiguza. Kwonka ekyo tibarakikozire ahabw’okugira ngu bakaba nibakunda abeegi ba Yesu abasya. Buzima, Anania na Safira bakaba nibenda ngu abantu bateekateekye ngu n’abantu barungi. N’ahabw’ekyo bakacwamu kweyoreka nk’abarikuza kuhayo esente zoona ezi baagurize omu kibanja kuhwera abandi. Buzima bakaba nibaza kuhayo ekicweka kyazo reero bagire ngu baazihayo zoona. Ekyo nookiteekateekaho ki?—

Anania akaija kureeba entumwa kandi yaabaha esente ezo. Hatariho kubangaanisa Ruhanga akaba naakimanya ngu Anania esente zoona tiyaazihayo. N’ahabw’ekyo Ruhanga akamanyisa entumwa Petero ngu Anania ebi yaakora ti by’amazima.

Reero Petero yaagira ati: ‘Anania, ahabw’enki waikiriza Sitaane kukukoresa ekyo? Ekibanja otakakigurize kibaire kiri ekyawe. Hoona na waaherize kukiguza, kibaire kiri ahariiwe kucwamu eki oraakorese sente ezo. Kwonka ahabw’enki nooyeshushaniriza nk’orikuhayo esente zoona kandi obwo orikuhayo ekicweka kyazo? Ahabw’okukora ekyo, tiwabeiha itwe kwonka waabeiha Ruhanga.’

Ekyo n’ekyakabi munonga. Anania akabeiha! Eki yaagambire tikyo yaakozire. Akeshushaniriza nk’owaakora eki yaagamba. Baibuli neetugambira ekyakuratsireho. Neegira eti: ‘Anania ku yaahuriire ebigambo bya Petero, yaagwa ahansi, yaafa.’ Ruhanga akareetera Anania kufa! Bwanyima, bakamushohoza baamuziika.

Bwanyima y’eshaaha nka ishatu, Safira nawe akaija. Akaba atarikumanya ekyaba ahari iba. N’ahabw’ekyo Petero akamubuuza ati: ‘Imwe mwembi esente ezi mwatuha nizo mugurize omu kibanja?’

Safira akagarukamu ati: ‘Eego, nizo ezo.’ Kwonka ekyo kikaba kiri ekishuba. Baketsigariza esente ezimwe aha zi baagurize omu kibanja. N’ahabw’ekyo Ruhanga akareetera na Safira kufa.​—Ebyakozirwe 5:1-11.

Niki eki tushemereire kwegyera aha kyabaire ahari Anania na Safira?— Nikitwegyesa ngu Ruhanga naayanga ababeihi. Butoosha naayenda ngu tugambe amazima. Kwonka abantu baingi nibagira ngu ti kibi kugamba ebishuba. Nooteekateeka ngu abantu abo bahikire?— Nookimanya ngu endwara zoona, obusaasi n’okufa ebiri omu nsi bikabaho ahabw’ekishuba?—

Ijuka, Omuregi akabeiha omukazi w’okubanza, Haawa. Omuregi akagambira Haawa ngu tarikwija kufa ku araagomere Ruhanga akarya ekijuma eki Ruhanga yaamugizire ngu atarirya. Haawa akaikiriza eki Omuregi yaamugambiire yarya ekijuma. Haawa akabeihabeiha Adamu nawe yaaryaho. Boona ku baaherize kukirya baahinduka abasiisi, kandi n’abaana baabo boona bakaazairwe bari abasiisi. Ahabw’okugira ngu abaana ba Adamu bakaba bari abasiisi, boona bakabonabona baafa. Kwonka shi okubonabona n’obusaasi bikatandika bita?— Bikatandikira aha kishuba.

Tikirikutangaaza okureeba ngu Yesu akagira ngu Omuregi ‘n’omubeihi kandi ishe w’ebishuba.’ Niwe yaabandize kugamba ebishuba. Omuntu weena ku arikubeiha, naaba yaakora eki Omuregi yaakozire omu kubanza. Tushemereire kuteekateeka ahari eki obwire bwona ku twakwohibwa kubeiha.​—Yohaana 8:44.

Ni ryari obu orikubaasa kwohibwa kubeiha?— Ti obu orikuba waaheza kukora ekitahikire?— Noobaasa kushiisha ekintu otagyendereire. Mbwenu baakubuuza noija kugira ngu ni murumuna waawe, mukuru waawe nari munyaanyoko owakishiisha? Nari noija kubeiha ngu torikumanya oku ekintu ekyo kyasiisikara?—

Kandi shi ku waakuba waaba nooza kukora ebi baakuha ah’eishomero kukorera omuka kwonka okakoraho ekicweka? Mbwenu shi oshemereire kubeiha ngu waabikora byona?— Tushemereire kwijuka Anania na Safira. Tibaragambire mazima. Kandi Ruhanga akooreka oku ekyo kiri kibi arikubareetera kufa.

N’ahabw’ekyo n’obu twakukora kintu ki, embeera niziija kweyongyera kuba mbi twateeraho kubeiha, kwonka nabwo titushemereire kugamba amazima g’ekicweka. Baibuli neegira eti: ‘Mugambe amazima.’ Kandi neegaruka egira eti: “Mutaribeihana.” Yehova butoosha naagamba amazima, kandi naayenda ngu naitwe tugambe amazima.​—Abaefeso 4:25; Abakolosai 3:9.