Baibuli ekagira ngu bwanyima y’okufa kwa Yesu, omu Bakristaayo aba ira hakaba nihaija kubamu abeegyesa b’ebishuba bashiishe amazima ga Baibuli. (Ebyakozirwe 20:29, 30) Kandi buzima ekyo nikyo kyabaireho. Enyegyesa za Yesu bakazijwanzya n’enyegyesa z’amadiini g’ebishuba, kyareetaho Abakristaayo ab’ebishuba. (2 Timoseo 4:3, 4) Nitubaasa kuhamya tuta ngu hati nitwetegyereza gye eki Baibuli buzima erikwegyesa?

Obwire bukahika Yehova yaashuuruura amazima.  Akagira ngu omu ‘bunaku bw’aha mperu okumanya kuryayeyongyera.’ (Danieli 12:4) Omuri 1870, abantu bakye abaabaire nibasherura amazima bakareeba ngu enyegyesa nyingi z’amadiini zikaba zitarikuhikaana n’Ebyahandiikirwe. N’ahabw’ekyo bakatandika kusherura amazima ga Baibuli kandi Yehova akabahwera kugetegyereza gye.

Abashaija ab’amazima bakashwijuma Baibuli. Omuringo ogu abeegi ba Baibuli baakoreise nigwo tukirikukoresa na hati. Bakaba bacondooza aha nshonga emwe-emwe aha z’omu Baibuli. Ku baabaire bashanga ekyahandiikirwe kigumire kwetegyereza, bakaba basherura ebyahandiikirwe ebindi ebiine akakwate nakyo. Ku baabaire bahamya ngu enshoboorora ei baatunga neehikaana n’Ebyahandiikirwe ebindi, bakaba bagihandiika. Ahabw’okureka Baibuli ekeshoboorora, bakagaruka baamanya amazima agarikukwata aha iziina rya Ruhanga, Obukama bwe, ekigyendererwa kye ahabw’abantu n’ensi, embeera y’abafu, n’aha matsiko g’okuzooka. Okucondooza kwabo kukabahwera kwetantara ebikorwa n’enyegyesa nyingi z’ebishuba.—Yohaana 8:31, 32.

Omuri 1879 abeegi ba Baibuli bakamanya ngu obwire buhikire kujanjaaza amazima omu nsi yoona. N’ahabw’ekyo omu mwaka ogwo, bakatandika kuteera magaziini erikwetwa The Watchtower Announcing Jehovah’s Kingdom ei turikuteera na hati. Hati nitubuurira abantu amazima ga Baibuli omu mahanga 240 omu ndimi nka 750. Buzima okumanya okuhikire kubugire hoona okukira ira!

• Bwanyima y’okufa kwa Yesu, niki ekyabaire aha mazima ga Baibuli?

• Niki ekitubaasiise kugaruka kumanya amazima agari omu Kigambo kya Ruhanga?

Okumara emyaka mingi, Abajurizi ba Yehova bakaba bakoresa, bateera kandi bagaba Baibuli ez’envunuura ezindi. Kwonka tukareeba ngu nihetengyesa kushohoza envunuura nsya ya Baibuli eyaakuhwereire gye abantu ‘kumanya amazima,’ ahakuba ekyo nikyo Ruhanga arikwendeza buri omwe. (1 Timoseo 2:3, 4) N’ahabw’ekyo omuri 1950 Baibuli eya New World Translation ekatandika kushohozibwa omu bicweka kandi omu rurimu rworobi. N’obwegyendesereza evunwirwe gye omu ndimi ezirikurenga 130.a

Baibuli eyorobi kwetegyereza ekaba neyetengyesa. Endimi niziguma nizihinduka, kandi envunuura za Baibuli enyingi nizikoresa ebigambo ebigumire munonga kwetegyereza. Kandi ebihandiiko bya Baibuli ebya ira ebirikuhikaana gye n’ebyahandiikirwe ebyabandize, bikazoorwa byahwera omu kwetegyereza gye endimi ezi Baibuli yaabandize kuhandiikwamu nka Oruheburaayo, Orusiria, na Orugriika.

Envunuura ya Baibuli etarikuhindura omu kigambo kya Ruhanga ekaba neyetengyesa. Omu mwanya gw’okuhindura ekigambo kya Ruhanga, abarikuvunuura Baibuli baine kuvunuura amakuru genyine agari omu byahandiikirwe ebyabandize. Kwonka omu nvunuura za Baibuli enyingi eiziina rya Ruhanga, Yehova, rikaihwamu.

Baibuli erikuhimbisisa Owaagihandiikiise ekaba neyetengyesa. (2 Samueli 23:2) Omu Baibuli eya New World Translation, eiziina rya Ruhanga, Yehova rikagarurwamu emirundi nka 7,000 nk’oku ryabaire riri omu byahandiikirwe ebyabandize, nk’oku kirikworekwa ahaifo. (Zaaburi 83:18) Ahabw’okugira ngu abaavunwire Baibuli egi bakamara obwire bwingi barikucondooza, ni nungi y’okushoma ahakuba neeyoreka gye emiteekateekyere ya Ruhanga. Yaaba Baibuli eya New World Translation eri omu rurimi rwawe nari etarimu, nitukuhiga kuguma noofayo kushoma Ekigambo kya Yehova butoosha.—Yoshua 1:8; Zaaburi 1:2, 3.

• Ahabw’enki envunuura ensya ya Baibuli yaabaire neyetengyesa?

• Orikwenda kumanya ebi Ruhanga akunda aine kuguma naakora ki butoosha?