Kubaasa kubuurira amakuru marungi ‘omu mahanga goona n’enganda zoona n’endimi n’abantu,’ nitushohoza ebitabo omu ndimi ezirikurenga 750. (Okushuuruurwa 14:6) Mbwenu omurimo ogu nitugukora tuta? Nituhwerwa abahandiiki n’abavunuuzi abeehaireyo beekundiire kandi boona n’Abajurizi ba Yehova.

Nibibanza kuhandiikwa omu Rungyereza. Akakiiko Akareeberezi nikareeberera omurimo gw’abo abarikukora aha by’okuhandiika abari aha ofiisi enkuru ey’Abajurizi ba Yehova. Abarikukora aha by’okuhandiika nibareeberera omurimo gw’abo abahairwe obujunaanizibwa bw’okuhandiika ebitabo abari aha ofiisi enkuru n’aha ofiisi z’amataagi ezimwe. Ahabw’okugira ngu abahandiiki nibaba bari ab’amahanga gatari gamwe, nikibabaasisa kuhandiika ebirikuhwera abantu b’amahanga goona.

Nibyohererezibwa abavunuuzi. Ku birikuheza kushwijumwa kandi bikahamibwa ngu biri gye, nibakoresa kompyuta kubyoherereza abavunuuzi omu nsi yoona abarikubivunuura, bakabishwijuma kandi bakabishoma kuhamya ngu tibirimu nshobe. Abavunuuzi nibateeraho kusherura ebigambo ebihikire ebiine amakuru nk’ag’eby’Orungyereza.­—Omubuurizi 12:10.

Kompyuta nizirahutsya omurimo ogu. Kompyuta tizo zirikukora omurimo gw’okuhandiika n’okuvunuura. Kwonka omurimo ogwo nigurahuka ahabw’okukoresa zaakashoboorozi n’ebindi ebiri aha kompyuta ebirikukoresibwa omu kucondooza. Abajurizi ba Yehova bakakora puroguramu ya kompyuta erikwetwa MEPS. Neebaasa kukora aha ndimi nyingi n’okuta ebishushani n’ebigambo ahu bishemereire kuba biri omu bitabo, reero ebitabo ebyo byoherezibwe ahu birikuteererwa.

Ahabw’enki nitufayo munonga n’aha ndimi ezirikugambwa enkumi nkye z’abantu? N’ahabw’okuba Yehova naayenda ngu “abantu boona bajunwe, bamanyire kimwe amazima.”—1 Timoseo 2:3, 4.

• Niki ekirikutwarirwa omu kuhandiika ebitabo byaitu?

• Ahabw’enki nituvunuura ebitabo byaitu omu ndimi nyingi munonga?

Buri mwaka nituteera obukaikuru n’obukaikuru bwa Baibuli n’ebindi bitabo kandi tubiha abantu abarikwenda kubishoma tutarikubibaguza. Nitwombeka kandi tureeberera Ebyombeko by’Obukama na ofiisi z’amataagi. Nitureeberera Ababeseeli n’abamiisani baingi kandi tuha n’obuhwezi abo abarikuba baahikwaho ekihikiirizi. Kwonka noobaasa kwebuuza, ‘esente ezirikukora ebyo byona niziruga nkahi?’

Titurikushaba ebicwero. N’obu omurimo gwaitu gw’okubuurira guraabe nigutwara esente nyingi, titurikushorooza sente. Emyaka erikurenga omuri igana ehingwire, Watchtower ya kabiri ekagira ngu nitwikiriza ngu Yehova niwe arikutushagika kandi ngu “titurikubaasa kushabiiriza nari kweshengyereza abantu kutushagika” kandi kwo buzima titukashabiirizahoga.—Matayo 10:8.

Omurimo gwaitu nigwemerezibwaho ebi abantu barikuhayo beekundiire. Abantu baingi nibasiima omurimo gwaitu gw’okwegyesa abantu Baibuli kandi bahayo beekundiire kugushagika. Abajurizi ba Yehova beekundiire nibahayo obwire bwabo, amaani gaabo, esente zaabo n’ebindi bintu, kibaasisa omurimo gwa Ruhanga kukorwa omu nsi yoona. (1 Obusingye 29:9) Buri Kyombeko ky’Obukama hamwe n’omu myanya erikubamu enteerane zaitu empango nihaba harimu obubokisi ahabw’abo abarikwenda kuhayo. Kandi abo abarikwenda kuhayo nibabaasa kuhayo kurabira aha mukura jw.org. Esente niziheebwayo abo abataine sente nyingi abari nk’omufaakazi omworo ou Yesu yaagambireho gye ahabw’okuhayo otunushu tubiri omu ibiikiro rya hekalu. (Luka 21:1-4) N’ahabw’ekyo buri omwe naabaasa kugira ‘ebi yaaguma naabiika’ kugira ngu abiheyo “nk’oku amaririire omu mutima gwe.”—1 Abakorinso 16:2; 2 Abakorinso 9:7.

Twine amatsiko ngu Yehova naija kuguma naahiga abo abarikwenda ‘kumuhaisa ekitiinisa’ barikuhayo kushagika omurimo gw’okubuurira, kugira ngu ebi akunda bikorwe.—Enfumu 3:9.

• Ahabw’enki ekibiina kyaitu kiri eky’omutaano aha diini ezindi?

• Ebi abantu barikuhayo beekundiire nibikoresibwa bita?

Eiziina Ekyombeko ky’Obukama, niryoreka ngu ebirikwegyesibwa omu mwanya ogwo nibikwata aha Bukama bwa Ruhanga, obu Yesu yaabuuriireho munonga.—Luka 8:1.

N’emyanya y’okuramya okw’amazima. Aha Byombeko by’Obukama, Abajurizi ba Yehova nibegyesibwa ebirikubahwera omu murimo gw’okubuurira. (Matayo 24:14) Ebyombeko by’Obukama tibirikwingana, tibirikushushana, ti bihango munonga kandi ebingi nibikoresibwa ebibiina birengire ahari kimwe. Omu myaka egi, tubaasize kwombeka enkumi n’enkumi z’Ebyombeko by’Obukama ebisya, turikwombeka nka bitaano buri izooba ahabw’okugira ngu ebibiina nibyeyongyera. Eki nikibaasika kita?—Matayo 19:26.

Nibyombekwa esente ezirikuheebwayo kwombeka Ebyombeko by’Obukama. Esente ezo nizoherezibwa aha ofiisi y’eitaagi kugira ngu ebibiina ebirikwenda kwombeka Ebyombeko by’Obukama nari kubihunduuza bizikorese.

Nibyombekwa abo abarikwehayo beekundiire abatarikushashurwa. Omu mahanga amaingi nihaba harimu Guruupu Ezirikwombeka Ebyombeko by’Obukama. Abo abarikuhwera omu kwombeka nibaguma nibaza omu myanya etari emwe n’emwe omu ihanga ryabo, kuhwera ab’eishe-emwe omu bicweka ebyo omu kwombeka Ebyombeko by’Obukama. Omu mahanga agandi hariho ab’eishe-emwe abatendekirwe abatoorainwe kureeberera okwombeka n’okuhunduuza Ebyombeko by’Obukama ebiri omu kicweka eki barimu. N’obu aba baraabe nibeehayo kuhwera omu kwombeka okwo, ab’eishe-emwe omu kibiina ei Ekyombeko ky’Obukama kirikuba nikyombekwa, nibejumbira kimwe omu kwombeka okwo. Ebi byona bibaasize kubaho ahabw’abantu ba Yehova abarikwehayo beekundiire n’ahabw’obuhwezi bw’omwoyo gwe ogurikwera.—Zaaburi 127:1; Abakolosai 3:23.

• Ahabw’enki emyanya ei turikuramizamu neeyetwa Ebyombeko by’Obukama?

• Niki ekirikutubaasisa kwombeka Ebyombeko by’Obukama omu nsi yoona?