OMUTWE OGURI AHA MUNAARA | YESU NAAJUNA—KI ABANTU?
Ahabw’Enki Turikwetenga ow’Okutujuna
“Omuntu ozairwe omukazi amara ebiro bikye, aba ow’enaku nsha. Arabya nk’ekirabyo, ayoma; ahingura nk’ekicuucu, tagumaho.”—Yobu 14:1, 2.
Okuruga ira, abantu batwire nibateekateeka aha ku kyakubaire kirikushemeza kutuuraho baine amagara marungi g’obunyeeto. Kwonka eky’obusaasi, twine amagara agarikufa. Ebigambo bya Yobu, ebyagambirwe emyaka erikurenga enkumi ishatu na hati bihikire.
Abantu boona baine ekyetengo ky’okutuuraho ebiro byona omu nsi. Baibuli neegira ngu Ruhanga akata omu mitima yaitu ekyetengo ky’okwenda kutuuraho ebiro byona n’okuteekateeka aha ki kirikumanyisa. (Omubuurizi 3:11) Nooteekateeka ngu n’eky’oburyo Ruhanga oine rukundo kutuha ekyetengo eki atarikubaasa kuhikiiriza? Ku oraabe noogarukamu ngu ngaaha, buzima ohikire. Ekigambo kya Ruhanga nikigira ngu rufu n’omuzigu kandi ngu naija “kwihwaho.”—1 Abakorinso 15:26.
Hatariho kubanganisa rufu n’omuzigu. Tihariho orikubaasa kwetenga okufa. Haaba nihaza kubaho akabi, nitukeetantara, tukeeshereka nari tuhunga. Twarwara nituteeraho kusherura oku turaabe gye. Nitukora kyona ekirikubaasika kwetantara ekintu ekirikubaasa kutureetera kufa.
Mbwenu shi hariho enshonga erikutureetera kwikiriza ngu omuzigu ogu otwireho naija kurugaho? Eego eriho. Yehova Ruhanga, Omuhangi, tarahangire abantu ngu batuureho kumara emyaka mikye reero bafe. Okufa kikaba kitari kigyendererwa kye omu kubanza. Akaba naayenda ngu abantu batuure omu nsi ebiro byona, kandi naahikiiriza buri kigyendererwa kye kyona.—Isaaya 55:11.
Kwonka shi okufa nikwija kuhwaho kuta? Okuruga ira abantu batwire nibateeraho munonga kwihaho okufa, kwonka baremirwe. Nikyo kimwe n’omu bunaku obu, abantu nibagumizamu kuteeraho kwihaho okufa. Abanyasayansi bajumbwire obujanjabi n’emibazi erikutamba endwara ezimwe. Babaasize kwetegyereza obuhangwa bw’ebintu bingi ebiine amagara. Omu myanya mingi, abantu ebiro ebi nibahangaara kukira oku kyabaire kiri omu kyasha eky’enyima. Kwonka nabwo okufa tibarikubaasa kukwihaho. Nk’oku Baibuli erikugira, ‘byona bigaruka omu mucuucu.’—Omubuurizi 3:20.
Amakuru marungi gari ngu titushemereire kwesiga ebi abantu barikukora ngu nibiza kumaraho oburemeezi obu obutwireho. Yehova Ruhanga atebeekaniise kutujuna okufa kandi Yesu Kristo niwe ntima y’entebeekanisa egyo.