EISHOMO 10
Noobaasa Kugasirwa Ota omu Nteerane z’Abajurizi ba Yehova?
Oreetsirweho kuza omu nteerane z’Abajurizi ba Yehova? Waaba otakagiireyo, noobaasa kutiina kuzayo omurundi gw’okubanza. Noobaasa kwebuuza oti: ‘Niki ekirikubaho omu nteerane ezo? Ahabw’enki ni nkuru? Ahabw’enki nyine kuzizamu?’ Omu ishomo eri, noija kwega oku orikubaasa kwirira haihi Ruhanga, kandi okagasirwa ahabw’okuba hamwe n’abandi omu nteerane.
1. Enshonga nkuru munonga y’okuza omu nteerane n’eha?
Omuhandiiki omwe wa Baibuli akaha enshonga nkuru y’okuba hamwe n’abandi omu nteerane. Akagira ati: ‘Niinyija kuhimbisiza [Yehova] omu iteeraniro rihango ry’abantu.’ (Zaaburi 26:12) Abajurizi ba Yehova nabo nibashemererwa munonga baaba bari hamwe omu nteerane. Omu nsi yoona, nibaza omu nteerane buri saabiiti kuhimbisa Ruhanga, kweshongora, n’okushaba. Kandi emirundi mikye buri mwaka, nibagira enteerane empango kuramya Yehova.
2. Noija kwega ki omu nteerane zaitu?
Omu nteerane, nituta omutima aha biri omu Kigambo kya Ruhanga, ‘turikukishoboorora gye kikeetegyerezibwa.’ (Shoma Nehemia 8:8.) Waaza omu nteerane, noija kwega ahari Yehova n’emitwarize ye mirungi munonga. Ku oraayongyere kumanya ngu naakukunda munonga, noija kumwirira haihi. Kandi noija kwega oku arikubaasa kukuhwera kugira okumarwa.—Isaaya 48:17, 18.
3. Noobaasa kugasirwa ota waashashaanuka n’abandi omu nteerane zaitu?
Yehova naatuhiga ‘kuteekateeka oku turaayezirikanise, okukundana n’okukora ebirungi, tutarikureka kuteeranira hamwe.’ (Abaheburaayo 10:24, 25) Omu nteerane zaitu, noija kureeba abantu abarikufayo ahari bagyenzi baabo, kandi abari nkaiwe abarikwenda kwongyera kwega ahari Ruhanga. Noija kuhurira barikukoresa ebiri omu Baibuli kugumyana. (Shoma Abarooma 1:11, 12.) Noija kutunga omugisha gw’okugaaniira n’abandi ababaasize kusingura oburemeezi abatari omu bushwere nari ababurimu. Ezi ni zimwe aha nshonga ahabw’enki Yehova naayenda ngu tugume nituza omu nteerane tutarikwosha!
SHWIJUMA GYE
Manya oku enteerane z’Abajurizi ba Yehova zitebeekanisiibwe, n’enshonga ahabw’enki okuteeraho kuzizamu kutarikufa busha.
4. Enteerane z’Abajurizi ba Yehova
Omu kyasha ky’okubanza, Abakristaayo bakaba nibaza omu nteerane butoosha kuramya Yehova. (Abarooma 16:3-5) Shoma Abakolosai 3:16, kubaasa kugarukamu ekibuuzo eki:
Abakristaayo omu kyasha ky’okubanza bakaba nibaramya bata Yehova?
Hati, Abajurizi ba Yehova nibagira enteerane omu myanya yaabo ey’okuramizamu. Kubaasa kureeba oku nteerane zaabo ziri, Zaana VIDIYO. Bwanyima, reeba ekishushani ky’oruteerane rw’ekibiina, kubaasa kugarukamu ebibuuzo ebirikukurataho.
Ebiri omu Abakolosai 3:16 nibihikaana bita n’ebirikuba aha Kyombeko ky’Obukama?
Omu vidiyo nari omu kishushani, haine ekindi eki waareeba ekirikushemeza?
Shoma 2 Abakorinso 9:7, kubaasa kugarukamu ekibuuzo eki:
Ahabw’enki enteerane z’Abajurizi ba Yehova zitarimu kushorooza esente?
Iwe n’orikukwegyesa Baibuli mushwijume eby’oruteerane rumwe orwa saabiiti egi.
Ni kicweka ki eky’oruteerane eki orikuteekateeka ngu nikibaasa kukushemeza nari kukugasira?
Eki waaba nookimanya?
Aha jw.org, noobaasa kushangaho obu enteerane zirikubaho n’ahu zirikuba omu nsi yoona.
Enteerane zaitu nizitwariramu embazo, eby’okureeberaho, na vidiyo. Nizitandika n’ekyeshongoro n’okushaba, kandi nizihendera n’ekyeshongoro n’okushaba
Omu bicweka ebimwe eby’oruteerane, abahurikiize nibagira eki baagarukamu
Buri omwe naayakiirwa, abaine amaka, abatari mu bushwere, abakaikwire, n’abaana
Enteerane zaitu n’eza busha. Abajurizi ba Yehova tibarikushorooza sente
5. Okuza omu nteerane nikyetengyesa okuteeraho
Teekateeka aha ky’okureeberaho ky’eka ya Yesu. Kubaasa kuza aha mukoro gwa buri mwaka, bakaba baine kugyenda mahiro nka 60 barikuraba omu nshozi kuruga Nazareesi kuhika Yerusaalemu. Shoma Luka 2:39-42, kubaasa kugarukamu ebibuuzo ebi:
Noogira ngu bakaba baine kuteeraho n’amaani kubaasa kuza Yerusaalemu?
Ahabw’enki nooba oine kuteeraho n’amaani kubaasa kuza omu nteerane?
Ahabw’enki nooteekateeka ngu okuteeraho kuzizamu tikurikufa busha?
Baibuli neegira ngu okuza omu nteerane kuramiza hamwe ni kikuru munonga. Shoma Abaheburaayo 10:24, 25, kubaasa kugarukamu ekibuuzo eki:
Ahabw’enki twine kuza omu nteerane tutarikwosha?
ABAMWE NIBAGIRA NGU: “Tikirikukwetengyesa kuba hamwe n’abandi. Okwegyera Baibuli omu ka nikimara.”
Ni kyahandiikirwe ki nari ni ky’okureeberaho ki kuruga omu Baibuli ekirikworeka eki Yehova arikwenda?
OMU BUGUFU
Okuza omu nteerane nikiija kukuhwera kwongyera kwega ebirikukwata ahari Yehova, kuhamya omukago gwawe nawe, n’okumuramya ori n’abandi.
Okweijutsya
Ahabw’enki Yehova naatuhiga kuteeranira hamwe?
Waaza omu nteerane z’Abajurizi ba Yehova noija kwegayo ki?
Noobaasa kugasirwa mu miringo ki endiijo waaza omu nteerane?
JUMBURA EBINDI
Kandi shi waaba nootiina kuza omu nteerane? Reeba oku omushaija owaabaire naayehurira atyo yaakunzire enteerane.
Reeba oku omutsigazi omwe yaakunzire munonga enteerane n’eki yaakozire kuguma naazizamu.
Manya oku abandi barikwehurira ahabw’okuza omu nteerane.
“Ahabw’enki Nikyetengyesa Kuza omu Nteerane aha Kyombeko ky’Obukama?” (Eky’aha mukura)
Manya oku omushaija omwe owaabaire ari omu kigombe ky’abarikuhenda ebiragiro yaakozire empinduka bwanyima y’okuza omu nteerane z’Abajurizi ba Yehova.
“Nkaba Ngyenda n’Embundu Yangye Buri Hamwe” (Omunaara gw’Omurinzi, Gyuraayi 1, 2014)