Adamu na Haawa ku baarugire omu musiri Edeni, bakazaara abaana baingi. Omwana w’okubanza, Kaini, akaba omuhingi, kandi owa kabiri, Abeeli, akaba omuriisa.

Eizooba rimwe Kaini na Abeeli bakahayo ebitambo ahari Yehova. Ekitambo nookimanya? N’ekiconco ky’omutaano. Yehova akasiima ekitambo kya Abeeli, kwonka ti yaasiima ekya Kaini. Ekyo kikareetera Kaini kugira ekiniga kingi. Yehova akarabura Kaini ngu ekiniga kye kikaba nikiza kumureetera kukora ekintu kibi. Kwonka Kaini tarahurikiize.

Omu mwanya gw’ekyo, Kaini akagira Abeeli ati: ‘Ija tugyendane omu musiri.’ Ku baabaire bari omu musiri bonka, Kaine akaita omurumuna. Yehova akaba naija kukorera ki Kaini? Yehova akafubira Kaini yaamubinga omu ka yaabo. Kaini akaba atarikwija kwikirizibwa kugaruka omuka.

Mbwenu shi eki nikitwegyesa ki? Nitubaasa kutandika kugira ekiniga ebintu byakorwa omu muringo ogu tutarikwenda. Twatandika kugira ekiniga​—nari abandi baaturabura aha kugira ekiniga—​twine kukora empindahinduka ahonaaho kandi tukarinda enyehurira zaitu zitakatureetiire kukora ekintu kibi.

Ahabw’okugira ngu Abeeli akaba naakunda Yehova kandi akakora ebyabaire bihikire, Yehova naija kuguma naamwijuka. Yehova naija kugaruka ahe Abeeli amagara ku araahindure ensi paradiso.

Ku haahingwireho obwire, abantu bakaba baingi omu nsi. Baingi ahari bo bakaba bari babi. Nangwa na bamwe ahari baamaraika omu iguru bakahinduka babi. Bakaruga omu ka yaabo omu iguru baija omu nsi. Noomanya ahabw’enki baakozire ekyo? Bakaba nibenda ngu bajware omubiri gw’abantu reero bashwere abakazi omu nsi.

Baamaraika n’abakazi abo bakazaara abaana b’aboojo. Abaana abo bakakura baagira amaani mingi kandi baaguma nibatwariza kubi abandi. Bakahutaaza abantu. Yehova akaba atarikubaasa kwikiriza embeera egyo kugumizamu. N’ahabw’ekyo akacwamu kucwekyereza abantu babi arikukoresa omwegyemure.

Kwonka hakaba hariho omushaija owaabaire ari ow’omutaano. Akaba naakunda Yehova. Eiziina rye akaba ari Noa. Akaba aine omukazi n’abatabani bashatu, Shemu, Hamu, na Yafeesi, kandi buri mutabani akaba aine omukazi. Yehova akagambira Noa kwombeka emeeri mpango kugira ngu we n’eka ye bataitwa omwegyemure. Emeeri ekaba eri ekibokisi kihango ekirikubaasa kuzeereera aha maizi. Kandi Yehova akagambira Noa kuta enyamaishwa nyingi omu meeri kugira ngu nazo zihonokyeho.

Noa ahonaaho akatandika kwombeka emeeri. Noa n’eka ye bakamara emyaka nka 50 barikwombeka emeeri egyo. Bakombeka emeeri nk’oku Yehova yaabaire abagambiire. Obwire obwo, Noa akarabura abantu ngu nihaza kubaho omwegyemure. Kwonka tihariho n’omwe owaamuhurikiize.

Bwanyima, obwire bw’okuza omu meeri bukahika. Ka tureebe ekyabaireho.