Buri mwaka, eminyeeto abaingi abakuziibwe nk’Abajurizi ba Yehova nibabatizibwa. Nooteekateeka kuhika aha kubatizibwa? Kyaba nikwo kiri, oine kubanza waamanya okwehayo n’okubatizibwa nibimanyisa ki.

• Okubatizibwa nikimanyisa ki?

• Okwehayo nikimanyisa ki?

• Ahabw’enki ni kikuru kubatizibwa?

• Eki ab’orwingano rwawe barikugamba

• Ebishuba hamwe n’amazima

Okubatizibwa nikimanyisa ki?

Okubatizibwa okurikugambwaho omu Baibuli nikutwariramu okwibikwa omu maizi, beitu kutari kushukwaho otwizi. Kandi kwine eki kurikujwekyera.

• Okwibikwa omu maizi aha kubatizibwa nikyoreka muranga ngu torikwija kucwamu kukora ebi orikwenda byonka.

• Ku ori kuruga omu maizi nooyoreka ngu waatandika orugyendo rusya orw’okukora ebirikushemeza Ruhanga.

Ku orikubatizibwa nooyoreka muranga ngu noikiriza ku Yehova niwe aine obushoboorozi bw’okutaho emitindo y’ekihikire n’ekigwire, kandi nooyoreka omu butongore okuraganisa kwawe okw’okukora ebi arikwenda oyekundiire.

Eky’okuteekateekaho: Niki ekiine kukureetera kwenda kworeka muranga ngu oyehaireyo kworobera Yehova? Reeba 1 Yohaana 4:19 na Okushuuruurwa 4:11.

Okwehayo nikimanyisa ki?

Otakabatiziibwe, oine kwehayo ahari Yehova omu mubonano. Ota shi?

Omu kushaba, noogambira Yehova ngu nooraganisa kumuheereza ebiro byona, kandi ngu noija kukora ebi arikwenda n’obu haakubaho ki, nari n’obu abandi baakukuremesa.

Okubatizibwa nikworeka muranga ngu oyehaireyo omu mubonano. Nooyoreka abandi ngu toriho ahabwawe kureka ahabwa Yehova.—Matayo 16:24.

Eky’okuteekateekaho: Ahabw’enki embeera zaawe nizeeyongyera kuba nungi waayehayo ahari Yehova? Reeba Isaaya 48:17, 18 na Abaheburaayo 11:6.

Ahabw’enki ni kikuru kubatizibwa?

Yesu akooreka ngu abakuratsi be boona baine kubatizibwa. (Matayo 28:19, 20) N’ahabw’ekyo, Abakristaayo baine kubatizibwa. Kandi, Baibuli neegira ngu okubatizibwa nikwetengyesa kubaasa kujunwa.—1 Petero 3:21.

Kwonka, ekiine kukuhiga kwenda kubatizibwa ni rukundo ei oiniire Yehova n’okwenda kumusiima. Emiteekateekyere yaawe eine kuba nk’ey’omuhandiiki wa zaaburi, owaahandiikire ati: ‘N’enki eki ndizimuurira [Yehova], ahabw’ebirungi bye byona ebi ankoreire? . . . Niinyija kutakira eiziina rya [Yehova]. Mpikiirize ebi naahigire ahari [Yehova].’—Zaaburi 116:12-14.

Eky’okuteekateekaho: Yehova akukoreire birungi ki, kandi noobaasa kumugarurira ki? Reeba Eky’ebiragiro 10:12, 13 na Abarooma 12:1.

Waaba noogyendera aha misingye ya Baibuli kandi orikuteeraho kugira omukago murungi na Ruhanga, noija kwenda kubatizibwa. Kwonka shi noobaasa kumanya ota yaaba ohikire kubatizibwa?a

Ebiri omu kicweka eki

• Nshemereire kuba niimanya birikwingana ki?

• Nyine kuba ninkora ki?

• Eki ab’orwingano rwawe barikugamba

Nyine kuba niimanya birikwingana ki?

Okwetebeekanisiza okubatizibwa tikirikumanyisa ngu oine kugira ebi waakwata omu mutwe, nk’omuntu orikuza kukora ebigyezo. Kureka, nikiija kukwetengyesa kukoresa okubaasa kwawe kw’okuteekateeka kwehamiza ngu eki Baibuli erikwegyesa n’amazima. (Abarooma 12:1) Nk’eky’okureeberaho:

• Noohamiza kimwe ngu Ruhanga ariho kandi ngu niwe oine kuramya?

  Baibuli neegira eti: “Omuntu weena orikwija ahari Ruhanga, ashemereire kwikiriza ku ariho, kandi ku aha ebihembo abamusherura.”—Abaheburaayo 11:6.

  Yebuuze oti: ‘Ahabw’enki niinyikiririza omuri Ruhanga?’ (Abaheburaayo 3:4) ‘Ahabw’enki niwe nyine kuramya?’—Okushuuruurwa 4:11.

  Nooyenda obuhwezi? Reeba “Creation or Evolution?—Part 1: Why Believe in God?”

• Noohamiza kimwe ngu obutumwa bwa Baibuli niburuga ahari Ruhanga?

  Baibuli neegira eti: ‘Ebyahandiikirwe byona, ebihandiikisiibwe omwoyo gwa Ruhanga, biine omugasho gw’okwegyesa omuntu, n’okumuhana, n’okumuhabura, n’okumutendeka omu by’okuhikiirira.’—2 Timoseo 3:16.

  Yebuuze oti: ‘Ahabw’enki niinyikiriza ngu Baibuli ti kitabo kirimu ebiteekateeko by’abantu?’—Isaaya 46:10; 1 Abatesalonika 2:13.

  Nooyenda obuhwezi? Reeba “How Can the Bible Help Me?—Part 1: Exploring Your Bible.”

• Noohamiza kimwe ngu Yehova naakoresa ekibiina Ekikristaayo kuhikiiriza ekigyendererwa kye?

  Baibuli neegira eti: “Ekitiinisa kibe ekya [Ruhanga] omu [kibiina] n’omuri Kristo Yesu okuhitsya obusingye bwona ebiro n’ebiro.’—Abaefeso 3:21.

  Yebuuze oti: ‘Nindeeba ebi ndikwega omu Baibuli n’omu nteerane z’Ekikristaayo, nk’ebirikuruga aha bantu nari Yehova?’ (Matayo 24:45) ‘Ninza omu nteerane, n’obu abazaire bangye baakuba batarikuzayo (baaba nibakwiriza)?’—Abaheburaayo 10:24, 25.

  Nooyenda obuhwezi? Reeba “Why Attend Meetings at the Kingdom Hall?”

Nyine kuba ninkora ki?

Toine kuba ohikiriire kubaasa kubatizibwa. Kwonka, oine kuba nooyoreka ngu buzima nooyenda ‘kureka ebibi, okore ebirungi.’ (Zaaburi 34:14) Nk’eky’okureeberaho:

• Noogyendera aha mitindo ya Yehova?

  Baibuli neegira eti: “[Guma oine] omutima ogutarikweshinja.”—1 Petero 3:16.

  Yebuuze oti: ‘Nyorekire nta ngu okubaasa kwangye kw’okuteekateeka kutendekirwe “kutaanisa ekirungi n’ekibi”?’ (Abaheburaayo 5:14) ‘Hariho obu mbaasize kwangira okugyemeserezibwa? Banywani bangye nibampiga kukora ekihikire?’—Enfumu 13:20.

  Nooyenda obuhwezi? Reeba “How Can I Train My Conscience?”

• Noikiriza ebirikuruga omu bi orikukora?

  Baibuli neegira eti: “Buri omwe omuriitwe naija kwegambira, naayetonganira ahari Ruhanga.’—Abarooma 14:12.

  Yebuuze oti: ‘Ndi ow’amazima, omu bi ndikukora n’omu bi ndikukorera abandi?’ (Abaheburaayo 13:18) ‘Niinyikiriza enshobe zangye nari niinteeraho kuzishereka nari kwekwatsa abandi?’—Enfumu 28:13.

  Nooyenda obuhwezi? Reeba “How Can I Deal With My Mistakes?”

• Nooteeraho kuguma oine omukago murungi na Yehova?

  Baibuli neegira eti: “Mwirire haihi Ruhanga, nawe abone kubairira haihi.”—Yakobo 4:8.

  Yebuuze oti: ‘Niinteeraho kwirira haihi Yehova mu miringo ki?’ Nk’eky’okureeberaho, ‘Ninkira kushoma Baibuli?’ (Zaaburi 1:1, 2) ‘Ninshaba obutoosha?’ (1 Abatesalonika 5:17) ‘Ningamba kyenyini omu kushaba? Banywani bangye, nibanywani ba Yehova?’—Zaaburi 15:1, 4.

  Nooyenda obuhwezi? Reeba “How Can the Bible Help Me?—Part 2: Make Bible Reading Enjoyable” na “Why Should I Pray?”

AKAKORYO: Kubaasa kwetebeekanisiza okubatizibwa, shoma eshuura 37 ey’akatabo Questions Young People Ask—Answers That Work, aka 2. Yetegyereze ekicweka ekirimu eby’okukora aha rupapura 308 na 309.

Otiinire kwehayo ahari Yehova kandi okabatizibwa? Kyaba nikwo kiri, ekicweka eki nikiza kukuhwera kusingura okutiina okwo.

Ebiri omu kicweka eki

• Kwonka shi ku naakukora ekibi ky’amaani bwanyima y’okubatizibwa?

• Kandi shi ku naakuba nintiina obujunaanizibwa obu ndikwija kutunga naabatizibwa?

• Kwonka shi ku naakuba ninyehurira nk’otashemereire kuheereza Yehova?

• Eki ab’orwingano rwawe barikugamba

Kwonka shi ku naakukora ekibi ky’amaani bwanyima y’okubatizibwa?

Ekirikukureetera kwerarikirira: Obundi haine ou orikumanya owaakozire ekibi ky’amaani akabingwa omu kibiina. (1 Abakorinso 5:11-13) Noobaasa kuba nootiina ngu ekyo nikyo kiraakuhikeho.

“Obu naabanza kuteekateeka aha kubatizibwa, nkatiina ngu nimbaasa kukora enshobe y’amaani. Kandi, nkateekateeka oku ekyo kyabaire nikiija kukwata aha bazaire bangye.”—Rebekah.

Ekyahandiikirwe kikuru: “Omubi arekye omuhanda gwe . . . Agarukye ahari [Yehova], abone kumusaasira, ahari Ruhanga waitu, ahakuba naija kumusaasirira kimwe.”—Isaaya 55:7.

Kiteekateekyeho: N’obu abasiisi abarikwanga kweteisa barikubingwa omu kibiina, Yehova naagirira embabazi abacureezi abarikweteisa kandi bakaikiriza okuhanwa.—Zaaburi 103:13, 14; 2 Abakorinso 7:11.

Amazima gari ngu, n’obu oraabe otahikiriire, noobaasa kwangira okwohibwa ahabw’obuhwezi bwa Yehova. (1 Abakorinso 10:13) Ahakuba naiwe orikucwamu oku oraatwaze, beitu ti omuntu ondiijo?

“Nkaba nintiina ngu naaheza kubatizibwa ninyija kukora enshobe y’amaani, kwonka nketegyereza ngu naaba ntabatiziibwe nimba naakora enshobe. Nketegyereza ngu ebirikubaasa kubaho omu biro by’omumaisho tibiine kundemesa kucwamu eki nyine kukora hati.”—Karen.

Eki Oine Kuteekateekaho: Waacwamu kubatizibwa, noija kwetantara kukora ebibi by’amaani, nk’oku abaheereza ba Yehova abarikukira obwingi barikukora.—Abafilipi 2:12.

Nooyenda obuhwezi obundi? Reeba “How Can I Resist Temptation?”

Kandi shi ku naakuba nintiina obujunaanizibwa obu ndikwija kutunga naabatizibwa?

Ekirikukureetera kwerarikirira: Nk’eky’okureeberaho, noobaasa kuba noomanya abato, nari banywani baawe abarugire owaabo, bakaza kwongyera aha buheereza bwabo. Noobaasa kwerarikirira ngu abantu nibaija kwenda ngu okore nikyo kimwe.

“Omukristaayo obatiziibwe naaba ahikire kuheebwa obujunaanizibwa bwingi omu buheereza, kwonka abantu abamwe nibaba bateteekateekire kuheereza nari embeera zaabo tizitarikubabaasisa.”—Marie.

Ekyahandiikirwe kikuru: ‘Omuntu weena agyeze omurimo gwe, abe nigwo yaayehimbisizamu, kutari kwehimbisiza mu gwa mutaahi we.’—Abagalatia 6:4.

Kiteekateekyeho: Omu mwanya gw’okwegyeragyeranisa n’abandi, ta omutima aha bigambo ebiri omu Mako 12:30: ‘Kunda [Yehova] Ruhanga waawe n’omutima gwawe gwona.’

Nihooreka ngu oine kuheereza Yehova n’omutima gwawe gwona, omu mwanya gw’okuheereza omuntu ondiijo. Buzima ku oraabe nookunda Yehova, noija kusherura oburyo bw’okumuheereza nk’oku okubaasa kwawe kuri.

“N’obu okubatizibwa kuri okucwamu kukuru, kwonka ti mugugu. Waayehitsya abanywani barungi, nibaija kukuhwera. Okuhikiriza obujunaanizibwa bwawe mporampora nikiija kukureetera okushemererwa. Kwonka waaba otabatiziibwe, nooyereetera obusaasi.”—Julia.

Eki Oine Kuteekateekaho: Siima Yehova ahabw’okworeka ngu naakukunda. Ekyo nikiija kukuhwera kumuha ekirikukirayo oburungi.—1 Yohaana 4:19.

Nooyenda obuhwezi obundi? Reeba “How Responsible Am I?”

Kwonka shi ku naakuba ninyehurira nk’otashemereire kuheereza Yehova?

Ekirikukureetera kwerarikirira: Yehova niwe arikukizayo amaani omu iguru n’omu nsi, waaamugyeragyeranisa n’abantu! N’ahabw’ekyo, noobaasa kubangaanisa yaaba Ruhanga naamanya ngu oriho.

“Ahabw’okugira ngu abazaire bangye n’Abajurizi ba Yehova, nkaba niinyerarikirira ngu nkahinduka munywani wa Yehova ahabw’abazaire bangye kandi ngu Yehova taraanyeiriize haihi.”—Natalie.

Ekyahandiikirwe kikuru: “Tihariho orikubaasa kwija ahariinye, Tata owaantumire yaaba atamwiriize haihi.”—John 6:44.

Kiteekateekyeho: Ahabw’okugira ngu oriyo nooteekateeka aha kubatizibwa nikyoreka ngu Yehova ariyo naakweyiriza haihi kubaasa kugira omukago murungi nawe. Okaayenzire kwikiriza okweta kwe?

Ijuka ngu tihaine muntu weena, oyihireho Yehova, oine kutugambira ebi twine kukora kubaasa kumwirira haihi. Kandi Ekigambo kye nikituhamiza ngu waayirira haihi Ruhanga, . . . naija kukwirira haihi.”—Yakobo 4:8.

“Ahabw’okugira ngu noomanya ebirikukwata ahari Yehova kandi obaasize kumwirira haihi n’obuhame ngu naakukunda. N’ahabw’ekyo waatandika kuteekateeka ngu tohikire kumuheereza, ijuka ngu we tikwo arikukureeba Kandi Yehova butoosha naakora ekihikire.”—Selina.

Eki Oine Kuteekateekaho: Waahikiiriza ebirikwetengyesa eby’omu Baibuli kubaasa kubatizibwa, nikimanyisa ngu nooba ohikire kuheereza Yehova. Kandi ijuka ngu niwe oine kuramya.—Okushuuruurwa 4:11.

Nooyenda obuhwezi? Reeba “Why Should I Pray?”