Okwikiriza​— Nikutuhwera Kuhama

OKWIKIRIZA kwine amaani maingi. Nk’eky’okureeberaho, n’obu Sitaane araabe naayenda kushiisha omukago gwaitu na Yehova, okwikiriza nikutuhwera kuraaza “emyambi y’omuriro yoona ey’omubi.” (Efe. 6:16) Twaba twine okwikiriza nitubaasa kusingura oburemeezi oburi nk’orushozi ruhango. Yesu akagambira abeegi ati: ‘Ku muraabe mwine okwikiriza nk’akajuma ka sinaapi, ku murigambira orushozi oru ngu, ruga aha, oze hariya, nirwija kurugaho.’ (Mat. 17:20) Obu okwikiriza kurikubaasa kutuhamya omu by’omwoyo, ni kirungi kwebuuza ebibuuzo ebi: Okwikiriza niki? Embeera y’omutima gwaitu neekwata eta aha kwikiriza kwaitu? Nitubaasa kuhamya tuta okwikiriza kwaitu? N’oha ou twine kwikiririzamu?​—Rom. 4:3.

OKWIKIRIZA NIKI?

Okwikiriza nikukira aha kumanya bumanya amazima ahakuba na “baadaimoni nibaikiiriza [ngu Ruhanga ariho], nibatetema.” (Yak. 2:19) Mbwenu shi okwikiriza niki?

Baibuli neeshoboorora okwikiriza omu miringo ebiri. Ogw’okubanza, “okwikiriza nikwo kuhamiza kimwe ebi twineho amatsiko.” (Heb. 11:1a) Waaba oine okwikiriza, noohamiza kimwe ngu byona ebi Yehova arikuraganisa bihikire kandi ngu nibiija kuhikiirira. Nk’eky’okureeberaho, Yehova akagambira Abaisraeli ati: “Ku mwakuba nimubaasa kwita endagaano yangye, ei naaragaine na nyomushana na nyekiro, ngu nyomushana na nyekiro birekye kubaho omu bunaku bwabyo, n’endagaano ei naaragaine n’omwiru wangye Daudi ekaafa.” (Yer. 33:20, 21) Mbwenu shi haine obu orikutiina ngu izooba niriza kwanga kureebeka nari kurenga, reero habure kubaho ihangwe nari ekiro? Ku oraabe otarikubangaanisa ebiragiro by’obuhangwa ebirikuhwera ensi kwetoorora nari kwehinguririza izooba, mbwenu shi oshemereire kubangaanisa ngu Omuhangi owaataireho ebiragiro ebyo tarikwija kuhikiiriza ebi arikugamba? Ngaaha buzima!​—Isa. 55:10, 11; Mat. 5:18.

Ogwa kabiri, okwikiriza “nikwo kutumanyisiza kimwe ebitarikureebwa.” Okwikiriza nikimanyisa ‘okumanyira kimwe’ ekintu, nari okutunga ‘obuhame’ obuhikire oburikukwata aha bintu ebi tutarikureeba n’amaisho kwonka ebiriho. (Heb. 11:1b) Mu muringo ki? Ka tugire ngu omwana yaakubuuza ngu, ‘noohamya ota ngu omwoya guriho?’ N’obu oraabe otarikureeba omwoya, noobaasa kumuhwera kuteekateeka aha buhame oburikworeka ngu guriho, nk’okwitsya, omuyaga kuhuuha ebintu, n’ebindi. Omwana yaaheza kwetegyereza obuhame obwo, naikiriza ngu ebintu ebitarikureebwa n’amaisho biriho. Nikyo kimwe, okwikiriza nikwegamira aha buhame obuhikire.​—Rom. 1:20.

OKWIKIRIZA NIKWETENGYESA KUBA OINE OMUTIMA MURUNGI

Ahabw’okugira ngu okwikiriza nikwegamira aha buhame, omuntu aine kubanza ‘yaamanyira kimwe amazima’ kubaasa kukugira. (1 Tim. 2:4) Kwonka ekyo tikirikumara. Entumwa Paulo akahandiika ati: ‘Omutima nigwo omuntu aikiririsa.’ (Rom. 10:10) Omuntu taine kwikiriza amazima kyonka, kureka aine n’okugatwara nk’ag’omuhendo. Obwo nibwo arikubaasa kugira okwikiriza, arikukora ebirikuhikaana n’amazima. (Yak. 2:20) Omuntu yaaba atarikusiima amazima ayihire aha mutima, naabaasa kwanga obuhame obuhikire ahabw’okuguma naaremera aha miteekateekyere ye, nari arikusherura rwekwatso y’okwejumba omu byetengo by’omubiri. (2 Pet. 3:3, 4; Yud. 18) Niyo nshonga ahabw’enki ira, ti boona abaareebire eby’okutangaaza ngu bakagira okwikiriza. (Kub. 14:11; Yoh. 12:37) Omwoyo gurikwera niguhwera abo bonka abarikukunda amazima kugira okwikiriza.​—Gal. 5:22; 2 Tes. 2:10, 11.

OKU DAUDI YAAGIZIRE OKWIKIRIZA KUHAMI

Omugabe Daudi n’omwe aha baabaire baine okwikiriza kuhami. (Heb. 11:32, 33) Kwonka, ti buri omwe omu ka ye ngu akaba aine okwikiriza kuhami. Nk’eky’okureeberaho, hariho obu mukuru we Eliabu yaayoreka ngu tarikwikiririza omu maani ga Yehova, akakabukira Daudi ahabw’okwenda kumanya ahabw’enki Goliasi naabazooga. (1 Sam. 17:26-28) Tihaine orikuzaarwa aine okwikiriza nari orikukuhungura kuruga aha bazaire be, n’ahabw’ekyo okwikiriza kwa Daudi kukaba nikwegamira aha mukago gwe na Ruhanga.

Omu Zaaburi 27, Daudi naayoreka ekyamuhwereire kugira okwikiriza kuhami. (Omushororongo 1) Daudi akateekateeka aha bi yaarabiremu n’oku Yehova yaamuhweraire kusingura abazigu be. (Omushororongo 2, 3) Akasiima munonga entebeekanisa y’okuramya ei Yehova yaataireho. (Omushororongo 4) Daudi akaba naaramya Ruhanga ari hamwe n’abataahi be aha hekalu. (Omushororongo 6) Akeezirikira kushaba Yehova. (Omushororongo 7, 8) Kandi Daudi akaba naakunda kwegyesibwa Ruhanga. (Omushororongo 11) Omutwarize ogu gukaba guri mukuru munonga ahari Daudi, kandi akabaasa kugira ati: Nkaabaire ndi nkahi “kuri ntaraikiriize.”​—Omushororongo 13.

OKU ORIKUBAASA KUHAMYA OKWIKIRIZA KWAWE

Noobaasa kugira okwikiriza kuhami nk’okwa Daudi waateeraho kugira emiteekateekyere nk’eye, okahikiiriza n’ebiri omu Zaaburi 27. Obu okwikiriza kurikwegamira aha kumanya okuhikire, oku orikweyongyera kweyegyesa Baibuli n’ebitabo ebirikugishoboorora, nikwo kiraakworobere kugira omutwarize ogu ogw’omwoyo gurikwera. (Zab. 1:2, 3) Guma nooteekateeka aha bi orikwega. Waateekateeka aha bi orikwega, noija kwongyera kusiima Yehova. Waayeyongyera kusiima Yehova, nikiija kukuhiga kumwikiriza, kandi omuramye ori omu nteerane, na waaba noobuurira abandi aha matsiko gaawe. (Heb. 10:23-25) Kandi, nitworeka okwikiriza kwaitu turikugumizamu “kushaba obutoosha okutaruha.” (Luk. 18:1-8) N’ahabw’ekyo, yezirikye kushaba Yehova, oine obwesigye ngu ‘naakutaho omutima.’ (1 Tes. 5:17; 1 Pet. 5:7) Okwikiriza nikutureetera kukora ekihikire, kandi twakora ekihikire nituba nituhamya okwikiriza kwaitu.​—Yak. 2:22.

IKIRIRIZA OMURI YESU

Yesu omu kiro eki baamureebiizeho, akagambira abeegi be ati: ‘Mwikiririze omuri Ruhanga, naanye muunyikiririzemu.’ (Yoh. 14:1) N’ahabw’ekyo twine kwikiririza omuri Yehova na Yesu. Nitubaasa kwikiririza tuta omuri Yesu? Ka tureebe emiringo eshatu.

Ogw’okubanza, ekitambo okitware nk’ekiconco eki Yehova akuhaire iwe nk’omuntu. Entumwa Paulo akagira ati: ‘Amagara agu nyine omu mubiri ngaine ahabw’okwikiririza omu Omwana wa Ruhanga, owankunzire akeehayo ahabwangye.’ (Gal. 2:20) Waikiririza omuri Yesu, nooba noohamiza kimwe ngu ekitambo kikaheebwayo ahabwawe, kandi nikyo Yehova arikwihiriraho kukusaasira ebibi, akakuha amatsiko g’amagara agatahwaho, kandi nikyo kirikukirayo kukuhamiza ngu Ruhanga naakukunda. (Rom. 8:32, 38, 39; Efe. 1:7) Okwikiririza omu kitambo nikiija kukuhwera kuguma otarikweshinja.​—2 Tes. 2:16, 17.

Ogwa kabiri, yirira haihi Yehova orikumushaba kurabira omu kitambo kya Yesu. Ahabw’ekitambo, nitubaasa kushaba Yehova “tutaine bwoba, tubone kuheebwa okusaasirwa, n’okugirirwa embabazi z’okutuhwera ahu turaazeetengyere hoona.” (Heb. 4:15, 16; 10:19-22) Okushaba nikutuhwera kumariirira kwangira okwohibwa kukora ekibi.​—Luk. 22:40.

Ogwa kashatu, yorobera Yesu. Entumwa Yohaana akahandiika ati: ‘Orikwikiririza omu Omwana aine amagara agatahwaho; kwonka otarikworobera Mwana, taribona magara; kureka ekiniga kya Ruhanga kiguma ahariwe.’ (Yoh. 3:36) Yetegyereze ngu Yohaana akagyeragyeranisa okugira okwikiriza n’obugomi. N’ahabw’ekyo, nooyoreka ngu noikiririza omuri Yesu orikumworobera. Kandi nitumworobera turikuhikiiriza “ekiragiro kya Kristo,” ekirikutwariramu byona ebi yaayegyeise n’ebi yaaturagiire. (Gal. 6:2) Kandi nooyoreka ngu nooyorobera Yesu orikukuratira obuhabuzi obu arikutuha kurabira omu ‘mwambari omwesigwa kandi ow’obwengye.’ (Mat. 24:45) Waayorobera Yesu, nikiija kukubaasisa kwemera oburemeezi bwona oburi nk’eihunga.​—Luk. 6:47, 48.

“MWEYOMBEKYE AHA MUSINGI GW’OKWIKIRIZA KWANYU OKURIKWERA MUNONGA”

Izooba rimwe, omushaija akagira Yesu ati: “Niinyikiriza! Onkize obutaikiriza bwangye!” (Mak. 9:24) Omushaija ogwo akaba aine okwikiriza kuringanaire, kwonka omu bucureezi, akamanya ngu aine kwongyera aha kwikiriza kwe. Nk’omushaija ogwo, twena nitwija kuhikwaho embeera ezirikwetengyesa kugira okwikiriza kuhami. Kandi twena nitubaasa kuhamya okwikiriza kwaitu hati. Nk’oku twareeba, nituhamya okwikiriza kwaitu twayeyegyesa Ekigambo kya Ruhanga, kandi tukakiteekateekaho, twakora ekyo nitwija kwongyera kukunda Yehova. Okwikiriza kwaitu nikwija kuhama twaba nituramya Yehova turi n’ab’eishe-emwe bagyenzi baitu, turikubuurira aha matsiko gaitu, kandi turikwezirika kuguma nitushaba. Okukira byona, twahamya okwikiriza kwaitu, nitutunga ekiconco ekirikukira ebindi byona. Ekigambo kya Ruhanga nikituhiga kiti: “Abarikukundwa, mweyombekye aha musingi gw’okwikiriza kwanyu okurikwera munonga . . . mwerindire omu kukunda kwa Ruhanga.”​—Yud. 20, 21.