Abaine Ekihika ky’Okumanya Amazima Nibaija Kuhurikiriza

1. Abantu abamwe nibatwaza bata baahurira amakuru marungi? (Ebyakozirwe 13:​47, 48; 16:​14, 15)

ABANTU baingi omu kyasha ky’okubanza bakaikiriza amazima ahonaaho ku bahuriire obutumwa bw’Abakristaayo. (Shoma Ebyakozirwe 13:​47, 48; 16:​14, 15.) Nikyo kimwe n’obunaku obu, abamwe nibashemererwa ku barikuhurira amakuru marungi omurundi gw’okubanza. Nangwa n’abo abarikwanga omu kubanza, nibabaasa kwenda kwega ahari Ruhanga bwanyima. Twine kukora ki twabona abantu nk’abo omu buheereza?

2. Omurimo gwaitu gw’okuhindura abantu abeegi nigugyeragyeranisibwa guta n’ogw’omuhingi?

² Teekateeka aha ky’okureeberaho eki. Omurimo gwaitu gw’okuhindura abantu abeegi nigubaasa kugyeragyeranisibwa n’ogw’omuhingi. Omuhingi yaareeba ekijuma kimwe kihiisize, naakisharura n’obu yaakuba naabyara omusiri ogundi. Nikyo kimwe, twabona omuntu orikwenda kuhurikiriza obutumwa bwaitu, nitwenda kumuhwera kuba omwegi wa Kristo ahonaaho. Kwonka nabwo, nitugumizamu kuhwera abandi abarikwetenga obwire kumanya omugasho gw’okwega Baibuli. (Yoh. 4:​35, 36) Okwetegyereza nikwija kutuhwera kumanya oku turikubaasa kubahwera. Omu kicweka eki, nituza kureeba eki turikubaasa kukora kuhwera abantu abeeteekateekire kutuhurikiza twagaaniira nabo omurundi gw’okubanza. Nituza n’okureeba oku turikubaasa kuhwera abantu nk’abo kugumizamu nibatunguuka.

ABANTU BAABA BEETEEKATEEKIRE KUMANYA AMAKURU MARUNGI

3. Nitubaasa kukora ki twabugana abarikwenda kumanya ebirikukiraho omu kubuurira? (1 Abakorinso 9:26)

³ Ku turikubugana abarikwenda kumanya ebirikukiraho omu kubuurira, nitwenda kubahwera kuza omu muhanda gw’amagara ahonaaho. Omu mbeera nk’egyo, titwine kweziringa kutandika kubeegyesa Baibuli n’okubeeta omu nteerane ahonaaho.—Shoma 1 Abakorinso 9:26.

4. Ha eky’okureeberaho eky’omuntu owaabaire aine ekihika ky’okwega Baibuli ahonaaho.

⁴ Okutandika kubeegyesa Baibuli. Bamwe aha bu turikubuurira nibaba nibenda kutandika kwega Baibuli ahonaaho. Nk’eky’okureeberaho, eizooba rimwe ry’Orwakana, omukazi omwe omuri Canada akaija aha kagaari yaatwara akatabo Yesiimire Amagara Ebiro Byona! Munyaanyazi-itwe owaabaire ariho akamushoboororera ngu n’ak’okuhwera abantu kwega Baibuli. Akaba naayenda kumanya ebirikukiraho n’ahabw’ekyo akaha munyaanyazi-itwe enamba y’esimu. Bwanyima omu izooba eryo, omukazi ogwo akamwoherereza obutumwa arikumubuuza obu baraatandikye kwega. Munyaanyazi-itwe ku yaamugizire ngu naija kumwegyesa aha wiikenda, akamugarukamu ati: “Kandi shi nyencakare? Ahakuba nyine obwire.” N’ahabw’ekyo bakatandika okwega aha Rwakataano. Akaija omu nteerane saabiiti egyo kandi yaagumizamu naatunguuka jubajuba.

5. Nitubaasa kworeka tuta okwetegyereza twatandika kwegyesa omuntu Baibuli? (Reeba n’ebishushani.)

⁵ Titwine kuteekateeka ngu boona abu turaabuurire nibaija kutwaza nk’omukazi ogwo. Ahakuba abamwe nikibaasa kubeetengyesa obwire kukunda ebi turikubeegyesa. Nikibaasa kutwetengyesa kutandika kugaaniira nabo aha nshonga erikubashemeza. Kwonka nabwo, twine kuguma tubaineho emiteekateekyere mirungi, kandi tukooreka ngu nitubafaho, reero omu bwire bukye nitubaasa kutandika kubeegyesa Baibuli. Nitubaasa kugamba ahari ki, twaba nitubashoboororera entebeekanisa y’okwega Baibuli? Ka tureebe eki ab’eishe-emwe na banyaanyazi-itwe abamwe baagambire aha nshonga egi.

6. Nitubaasa kugamba ki twaba nitushoboororera omuntu entebeekanisa y’okwega Baibuli?

⁶ Ababuurizi na payoniya kuruga omu mahanga gatari gamwe abaabuuziibwe aha bikwatiraine n’okutandika kwegyesa abeegi bakagira ngu waaba nooshoboororera omuntu entebeekanisa y’okwega Baibuli, n’eky’obwengye kwetantara ebigambo nk’ebi: “okwega,” “omushomo gwa Baibuli,” nari “okukwegyesa.” Kureka, nikiba kiri kirungi kukoresa ebigambo nk’ebi: “okugaaniira” nari “okuhikaanisa ebiteekateeko ahari Baibuli.” Noobaasa kugumizamu ekigaaniiro orikugira oti: “Ka nikitangaaza kureeba oku Baibuli erikugarukamu ebibuuzo bikuru ebirikukira kubuuzibwa” nari “Baibuli ti kitabo ky’ediini kyonka, kureka neetuhwera omu miringo mingi.” Noobaasa kwongyeraho oti: “Tikiraatware obwire bwingi. Nitubaasa kwega ebintu by’omuhendo omu dakiika 10 nari 15 zonka.” Ekyo noobaasa kukikora otamureteire kuteekateeka ngu aine kuhamira aha ntebeekanisa y’okwega Baibuli buri saabiiti.

7. Ni ryari obu abamwe barikwetegyereza amazima g’omu Baibuli? (1 Abakorinso 14:​23-25)

⁷ Beete omu nteerane. Nikireebeka ngu omu bwire bw’entumwa Paulo, abamwe bakabanza kwetegyereza amazima obu baija omu ruteerane rw’Ekikristaayo. (Shoma 1 Abakorinso 14:​23-25.) Nikyo kimwe n’obunaku obu. Abasya abaingi nibakira kutunguuka juba baatandika kwija omu nteerane zaitu. Mbwenu shi ni ryari obu oshemereire kubeeta? Omu ishomo 10 ery’ekitabo Yesiimire Amagara Ebiro Byona! nihahiga omuntu kwija omu nteerane, kwonka titwine kutegyereza kubanza twahika omu ishomo eryo. Waabuurira omuntu omurundi gw’okubanza, noobaasa kumweta omu ruteerane rw’aha wiikenda, obundi orikumugambira omutwe gw’orubazo rwa boona, nari enshonga nkuru ei turaayegyeho omu Munaara gw’Omurinzi.

8. Nitubaasa kugambira ki omuntu twaba nitumweta omu nteerane? (Isaaya 54:13)

⁸ Waaba nooyeta omuntu omu nteerane, mushoboororere oku zirikutaana n’ez’amadiini agandi agu arikumanya. Omwegi wa Baibuli omwe ku yaizire omu nteerane omurundi gw’okubanza, omu bwire bw’okwega Omunaara gw’Omurinzi akabuuza orikumwegyesa ati: “Orikwebembera ekicweka naamanya amaziina ga buri omwe?” Omwegyesa we akamugira ngu nituteeraho kumanya amaziina g’abari omu kibiina nk’oku turikumanya ab’omu maka gaitu. Ekyo kikamutangaaza munonga ahakuba kikaba nikitaana n’eki yaabaire naamanya omu diini ye. Nitubaasa n’okumugambira oku ekigyendererwa ky’enteerane zaitu kirikutaana n’ediini ezindi. (Shoma Isaaya 54:13.) Nituza omu nteerane kuramya Yehova, kumwegaho, n’okugumyana. (Heb. 2:12; 10:​24, 25) Niyo nshonga ahabw’enki enteerane zaitu zitebeekanisiibwe kutuhwera kwega, kandi tizirikubamu emigyenzo y’ediini. (1 Kor. 14:40) Omu Kyombeko ky’Obukama nihaba nihaaka gye kutuhwera kwega. Kandi ahabw’okugira ngu titurikugwera rubaju omu by’obutegyeki, titurikugamba aha bibiina by’eby’obutegyeki n’obu kwakuba okuteera empaka aha nshonga ezo. Waaba nooyeta omwegi, ni kirungi kubanza waamworeka vidiyo Niki Ekirikukorerwa aha Kyombeko ky’Obukama? Ekyo nikiza kumuhwera kumanya ekiraabeho yaija.

9-10. Waaba nooyeta omuntu noobaasa kumugambira ki kumuhwera kutatiina kwija omu nteerane? (Reeba n’ekishushani.)

⁹ Abamwe nibeeziringa kwija omu nteerane ahabw’okutiina ngu nitubaasa kubareetera kuhindura ediini yaabo. Hamiza omuntu ngu nitukunda kutaayaayisa abagyenyi kandi titurikubagyemesereza kugira eki bagamba nari kutwegaitaho. Nitwakiira ab’omu maka otwariiremu n’abaana bato. Omu nteerane zaitu, abaana tibarikwegyesibwa bonka kureka nibashutama n’abazaire baabo. N’ahabw’ekyo abazaire nibaba nibareeba abaana baabo n’ebi barikubeegyesa. (Bir. 31:12) Titurikushorooza esente nari kurabyamu ebahaasa. Kureka nitukuratira ekiragiro kya Yesu ekirikugira kiti: “Mukaheerwa busha, naimwe muheere busha.” (Mat. 10:8) Noobaasa n’okugambira omuntu ngu taine kujwara emyenda ey’ebeeyi kubaasa kwija omu nteerane, ahakuba Ruhanga naareeba omutima beitu etari ndeebeka y’omuntu.—1 Sam. 16:7.

¹⁰ Omuntu yaija omu nteerane, kora ekirikubaasika kumureetera kwikaikana. Mwanjurire abareeberezi n’ababuurizi abandi. Yaahurira aikaikaine, nikiija kumuhiga kugaruka omurundi ogundi. Yaaba ataine Baibuli noobaasa kumuhwera kukuratira ebirikugambwaho murikukoresa hamwe eyaawe.

WAATANDIKA KWEGYESA OMUNTU BAIBULI

11. Noobaasa kworeka ota ngu nooha ekitiinisa obwire n’entebeekanisa ei okozire n’omwegi waawe?

¹¹ Twine kwijuka nshonga ki twaba nitwegyesa omuntu Baibuli? Ha obwire bwe n’entebeekanisa ei mukozire ekitiinisa. Nk’eky’okureeberaho, waamuraganisa, hikayo omu bwire n’obu abantu omu kicweka kyanyu baakuba batarikufayo aha kukwata obwire. Ekindi, ni kirungi kukoresa obwire bukye aha murundi gw’okubanza. Ababuurizi abamwe abaine obukugu nibagira ngu ekyo ni kirungi n’obu omwegi yaakuba naakyenda kwega bingi. Kandi otakaagamba bingi kureka reka omwegi agambe ebi arikuteekateeka n’oku arikwehurira.—Enf. 10:19.

12. Twine kugira kigyendererwa ki twatandika kwegyesa omuntu Baibuli?

¹² Twatandika kwegyesa omwegi, nituba nitwenda kumuhwera kumanya Yehova na Yesu, n’okubakunda aihire aha mutima. Ekyo noobaasa kukikora orikumworeka eki Baibuli erikwegyesa bitari ebi orikumanya. (Byak. 10:​25, 26) Nk’eky’okureeberaho, obu entumwa Paulo yaabaire naabuurira, akaba ata omutima aha kubuurira ahari Yesu ou Yehova yaayohereize ngu atuhwere tumumanye kandi tumukunde. (1 Kor. 2:​1, 2) Na Paulo akooreka ku kirikikuru kuhwera abeegi abasya kugira emitwarize mirungi erikubaasa kugyeragyeranisibwa n’ezaabu, efeeza n’amabaare g’obuguzi bwingi. (1 Kor. 3:​11-15) Emitwarize egyo ekaba neetwariramu okwikiriza, obwengye, okwetegyereza, n’okutiina Yehova. (Zab. 19:​9, 10; Enf. 3:​13-15; 1 Pet. 1:7) Tooreza oku Paulo yaabaire naayegyesa orikuhwera abeegi baawe kugira okwikiriza kuhami n’omukago guhami na Ishebo ow’omu iguru owa rukundo.—2 Kor. 1:24.

13. Nitubaasa kworeka tuta okugumisiriza n’okwetegyereza twaba nituhwera abarikwenda kumanya amazima? (2 Abakorinso 10:​4, 5) (Reeba n’ekishushani.)

¹³ Tooreza oku Yesu yaabaire naayegyesa orikworeka okugumisiriza n’okwetegyereza. Yetantare kubuuza omwegi ebibuuzo ebirikumureetera kwehurira kubi. Kandi haagira enshonga eyaamugumira, noobaasa kugyehuzya, reero mugigaaniireho omurundi ogundi. Omu mwanya gw’okuteeraho kumugyemesereza kwikiriza enyegyesa ei atakeeteekateekire kwikiriza, muhe bwire kugira ngu amazima gatsimbe emizi omu mutima gwe. (Yoh. 16:12; Kol. 2:​6, 7) Baibuli neegyeragyeranisa enyegyesa z’ebishuba ezi turikuteeraho kusingura nk’orugo ruraingwa. (Shoma 2 Abakorinso 10:​4, 5) Omu mwanya gw’okusheenya ekisiika nk’ekyo kugwera omwegi waawe, muhwere kuhindura Yehova obweshereko bwe.—Zab. 91:9.

ABASYA BAIJA OMU NTEERANE

14. Twine kutwariza tuta abasya abarikwija omu nteerane zaitu?

¹⁴ Yehova naayenda ngu tutwarize abasya omu muringo gwa rukundo tutataire omutima aha ruganda rwabo, esente ezi baine, nari obukomooko bwabo. (Yak. 2:​1-4, 9) Mbwenu shi nitubaasa kworeka tuta ngu nitukunda abasya abarikwija omu nteerane zaitu?

15-16. Nitubaasa kureetera tuta abasya kwikaikana baija omu nteerane zaitu?

¹⁵ Abamwe nibaija omu nteerane zaitu barikwenda kumanya oku turikutwaza, nari omuntu ondiijo kuruga omu kicweka ekindi yaabahiga kwija. N’ahabw’ekyo titwine kweziringa kuhikiirira abantu nkabo baija omu nteerane zaitu, kandi tukabaakiira tutabareeteire kwehurira kubi. Noobaasa kushutama nabo, mukorese Baibuli yaawe n’ebindi bitabo ebi turikukoresa omu nteerane, nari obatungire ebyabo. Ekindi oine kufayo aha nyehurira zaabo. Omushaija omwe ku yaizire aha Kyombeko ky’Obukama akagambira ow’eishe-emwe owaamwakiire ngu akaba atiinire ahabw’okwija ajwire emyenda ya butoosha. Ow’eishe-emwe akamureetera kwikaikana kandi yaamushoboororera ngu Abajurizi ba Yehova turi abantu baabutoosha. Omushaija ogwo akatunguuka yaahika aha kubatizibwa, kwonka tareebirwe ebi ow’eishe-emwe yaamugambiire. Twine kwijuka eki: Twaba nitugamba n’abasya aha kutandika kw’enteerane, nari aha muheru gwazo, titwine kwetaatsya omu bitatukwaitseho nari kubabuuza ebibuuzo ebirikubareetera kwehurira kubi.—1 Pet. 4:15.

¹⁶ Ekindi, nitubaasa kureetera abasya kwikaikana turikugamba omu muringo gw’ekitiinisa omu by’okugarukamu byaitu, nari twaba nitugamba aha batari Bajurizi ba Yehova n’ebi barikwikiriza. Yetantare kukoresa ebigambo ebirikubaasa kubateeza entsibo nari kubareetera kwehurira kubi. (Tit. 2:8; 3:2) Nk’eky’okureeberaho, titwine kugamba kubi aha bi barikwikiriza ahabw’okugira ngu nibitaana n’ebyaitu. (2 Kor. 6:3) Ab’eishe-emwe abarikuha embazo za boona nibakwata enshonga egyo n’obwegyendesereza. Nibashoboorora ebigambo ebigumire kwetegyereza, ahabw’okugira ngu omu nteerane nihaba harimu n’abatari Bajurizi ba Yehova.

17. Twine kukora ki twashanga omuntu oine ekihika ky’okumanya amazima omu kubuurira?

¹⁷ Omurimo gwaitu gw’okuhindura abantu abeegi nigwongyera kuba mukuru buri izooba eririkuhinguraho, kandi nitugumizamu kusherura abantu abaine ekihika ky’okumanya amazima. (Byak. 13:48) Haagira abu twabona, titwine kweziringa kutandika kubeegyesa Baibuli nari kubeeta omu nteerane zaitu. Twakora ekyo, nitubahwera kuza omu muhanda ogurikuhitsya “omu magara.”—Mat. 7:14.