Bakahandiika Ebirikukwata Ahari Yesu

Nooreeba abashaija aba omu kishushani?— Abashaija aba ni Matayo, Mako, Luka, Yohaana, Petero, Yakobo, Yuda, na Paulo. Abashaija aba boona bakaba bariho obu Yesu yaabaire ari omu nsi, kandi bakahandiika ebirikumukwataho. Ka twongyere kwega ebirikubakwataho.

Bashatu aharibo bakaba bari entumwa abaabuuriire na Yesu. Noobamanya?— Ni Matayo, Yohaana, na Petero. Entumwa Matayo na Yohaana bakaba nibamanya gye Yesu, kandi buri omwe akahandiika ekitabo ekirimu ebirikukwata ahari Yesu. Kandi n’entumwa Yohaana akahandiika ekitabo ekirikwetwa Okushuuruurwa, n’ebaruha y’okubanza eya Yohaana, ebaruha eya kabiri eya Yohaana n’ebaruha ya kashatu eya Yohaana. Kandi entumwa Petero akahandiika ebaruha ibiri eziri omu Baibuli. Nizeetwa ebaruha y’okubanza eya Petero na ebaruha ya kabiri eya Petero. Omu baruha ye eya kabiri, Petero akahandiika ebirikukwata aha bu Yehova yaagamba ahari Yesu naayema omu iguru naagira ati: ‘Ogu n’Omwana wangye ou nkunda, kandi ou nshemererewa munonga.’

Abashaija abandi abari omu kishushani nabo nibatwegyesa ebirikukwata ahari Yesu kurabira omu bitabo ebi baahandiikire ebiri omu Baibuli. Omwe aharibo ni Mako. Mako naabaasa kuba yaabaire ariho obu baakwata Yesu kandi akareeba byona ebyabaireho. Ondiijo akaba ari Luka. Akaba ari omushaho kandi aine kuba yaahindukire Omukristaayo bwanyima y’okufa kwa Yesu.

Abandi babiri aha baahandiikire Baibuli abu orikureeba omu kishushani bakaba bari barumuna ba Yesu. Noomanya amaziina gaabo?— Nibeetwa, Yakobo na Yuda. Omu kubanza, bakaba batarikwikiririza omuri Yesu. Obumwe bakateekateeka ngu agwire eiraro. Kwonka bwanyima baakahinduka Abakristaayo.

Ow’aha muheru omu kishushani ni Paulo kandi n’omwe aha baahandiikire Baibuli. Atakahindukire Omukristaayo, akaba naayetwa Saulo. Akaba naayanga Abakristaayo kandi arikubahiiganisa. Noomanya ekyareeteire Paulo yaahinduka Omukristaayo?— Eizooba rimwe, Paulo akaba naagyenda omu ruguuto, ahonaaho yaahurira eiraka ririkuruga omu iguru. Eiraka eryo rikaba riri erya Yesu. Akabuuza Paulo ati: ‘Ahabw’enki noohiiganisa abakuratsi bangye?’ Bwanyima y’ekyo, Paulo akahinduka Omukristaayo. Paulo akahandiika ebitabo 14 by’omu Baibuli, kuruga aha kitabo kya Abarooma kuhika aha kya Abaheburaayo.

Twine kushoma Baibuli butoosha, tikwo?— Ku turikushoma Baibuli, nitwega ebintu bingi ebirikukwata ahari Yesu. Okaayenzire kwongyera kwega ebirikumukwataho?—