1-3. Ni bibuuzo ki ebirikukwata aha kufa ebi abantu barikwebuuza, kandi amadiini agamwe nigabigarukamu gata?

BAIBULI neegira ngu obunaku nibwija kuhika okufa kube kutakiriho. (Okushuuruurwa 21:4) Omu Shuura ya 5, twegire ngu ekitambo nikitubaasisa kutunga amagara agatahwaho. Kwonka abantu na hati nibafa. (Omubuurizi 9:5) N’ahabw’ekyo ekibuuzo kikuru kiri ngu abafu bari nkahi?

² Ni kikuru kutunga eky’okugarukamu ky’ekibuuzo eki okukira munonga twafeerwa omukundwa. Nitubaasa kwebuuza tuti: ‘Hati yaaza nkahi? Mbwenu shi ariyo naatureeba? Naabaasa kutuhwera? Nitwija kugaruka kumureeba?’

³ Ediini nizigarukamu ebibuuzo ebyo omu miringo etarikushushana. Abamwe nibeegyesa ngu waaba otwire nookora ebirungi nooza omu iguru kwonka waaba otwire nookora ebibi ngu nooyokibwa omu muriro ogutaraara. Abamwe nibagira ngu ku orikufa noohinduka omwoyo, reero otuura n’abanyabuzaare baawe abaafiire. Abandi nibagira ngu ku orikufa okacwerwa orubanja, noogaruka ozaarwa busya, nari ogaruka oine omubiri ogurikutaana n’ogu waabaire oine, obundi ori nk’omuntu nari enyamaishwa.

4. Amadiini maingi nigeegyesa ki aha bikwatiraine n’okufa?

⁴ Amadiini nigeegyesa ebintu birikutaana munonga. Kwonka haihi goona nigashushanisa ekiteekateeko. Nigeegyesa ngu omuntu ku arikufa, haine ekintu ekirikumurugamu kikaguma kihuriire. Mbwenu shi ekyo buzima kihikire?

ABAFU BARI NKAHI?

5, 6. Okufa nikimanyisa ki?

⁵ Yehova naamanya ekirikubaho omuntu ku arikufa, kandi naatugambira ngu omuntu ku arikufa, naaba atakiine magara. Okufa nikutaana n’okugira amagara. N’ahabw’ekyo omuntu ku arikufa, enyehurira ze n’ebiteekateeko bye tihaine ahandi ahu birikuza bikaguma bihuriire.a Omuntu ku arikufa naaba atarikubaasa kureeba, kuhuurira nari kuteekateeka.

⁶ Omugabe Sulemaani akagira ngu “abafiire tibagira ki bamanya.” Abafu tibarikubaasa kukunda, nari kugira rwango, kandi ‘okuzimu tihariyo murimo, nari enaama, nari okumanya n’obu bwakuba obwengye.’ (Shoma Omubuurizi 9:5, 6, 10.) Omuri Zaaburi 146:4, nihagira ngu omuntu ku arikufa, ‘ebiteekateeko bye nibihwaho.’

OKU YESU YAASHOBOOROIRE OKUFA

7. Yesu akashoboorora ata okufa?

⁷ Laazaaro munywani wa Yesu ku yaafiire, Yesu akagambira abeegi be ati: “Laazaaro munywani waitu agwejegyeire.” Kwonka Yesu akaba atarikumanyisa ngu Laazaaro ahuumwire. Yesu bwanyima akagira ati: “Laazaaro afiire.” (Yohaana 11:11-14) Yetegyereze ngu Yesu akagyeragyeranisa okufa n’okugwejegyera. Taragizire ngu Laazaaro akaba ari omu iguru nari n’abanyabuzaare be abaabaire baafiire. Kandi taragizire ngu Laazaaro akaba ariyo naabonabona omu muriro ogutaraara, nari ngu akaba ariyo naaza kuzaarwa busya nk’omuntu nari enyamaishwa. Laazaaro akaba ari nk’ogwejegyereire kimwe. Hariho ebyahandiikirwe ebindi ebirikugyeragyeranisa okufa n’okugwejegyera. Baibuli neegira ngu Stefano ku yaitsirwe “yaagwejegyera.” (Ebyakozirwe 7:60) Entumwa Paulo akahandiika arikugira ngu Abakristaayo abamwe bakaba “bagwejegyereire” omu kufa.—1 Abakorinso 15:6.

8. Nitumanya tuta ngu Ruhanga tarahangire abantu ngu bafe?

⁸ Mbwenu shi Ruhanga akahanga Adamu na Haawa ngu bwanyima baije bafe? Ngaaha! Yehova akabahanga kuguma baine amagara marungi kandi bashemereirwe ebiro byona. Obu Yehova yaahanga abantu, akabatamu ekyetengo ky’okugumaho ebiro byona. (Omubuurizi 3:11) Abazaire nibaba batarikwenda kureeba abaana baabo nibaba abakaikuru nari abagurusi kandi bakafa, nikwo na Yehova arikwehurira atyo ahariitwe. Mbwenu shi Yehova ku araabe yaatuhangire kugumaho ebiro byona, ahabw’enki nitufa?

AHABW’ENKI NITUFA?

9. Ahabw’enki ekiragiro eki Yehova yaahaire Adamu na Haawa kyabaire kitagumire kworobera?

⁹ Omu musiri Edeni, Yehova akagambira Adamu ati: “Omuti gwona ogw’omu kibanja noikirizibwa kuryaho nk’oku orikwenda; kwonka omuti gw’okumanya oburungi n’obubi otariguryaho, ahabw’okuba eizooba eri origuryaho, buzimazima oryafa.” (Okutandika 2:9, 16, 17) Ekiragiro ekyo kikaba kitagumire kworobera kandi Yehova akaba aine obushoboorozi bw’okugambira Adamu na Haawa ekirungi n’ekibi. Ku ogire ngu bakoorobera Yehova bakaba nibaija kworeka ngu nibamuha ekitiinisa ahabw’obushoboorozi bwe. Kandi bakaba nibaija kworeka ngu buzima nibamusiima ahabwa byona ebi yaabaire abahaire.

10, 11. (a) Sitaane akahabisa ata Adamu na Haawa? (b) Ahabw’enki Adamu na Haawa baabaire bataine ky’okwekwatsa ahabw’eki baakozire?

¹⁰ Eky’obusaasi, Adamu na Haawa bakacwamu kugomera Yehova. Sitaane akabuuza Haawa ati: “N’eky’amazima, Ruhanga akagira ngu mutarirya aha muti gwona ogw’omuri eki kibanja?” Haawa akagarukamu ati: “Nitwikirizibwa kurya ebijuma by’emiti y’omu kibanja, kureka ebijuma by’omuti oguri ahagati y’ekibanja; nibyo Ruhanga yaagizire ati: Mutaribirya, n’obu kwakuba okubikoraho, mutakaafa.”—Okutandika 3:1-3.

¹¹ Reero Sitaane akagira ati: “Okufa kwo buzima timurifa. Ruhanga naamanya ngu eizooba rimuriguryaho, amaisho gaanyu garyaiguka, naimwe mube nka Ruhanga, mumanye oburungi n’obubi.” (Okutandika 3:4-6) Sitaane akaba naayenda kureetera Haawa kuteekateeka ngu naabaasa kwecweramu ekibi n’ekirungi. Kandi Sitaane akababeiha aha bikwatiraine n’ebyabaire nibiija kuruga omu kurya aha kijuma. Sitaane akagira ngu Haawa akaba atarikwija kufa, n’ahabw’ekyo Haawa akarya ekijuma kandi yaatwarira na iba nawe yaakirya. Adamu na Haawa bakaba nibamanya ngu Yehova akaba abagambiire kutarya ekijuma ekyo. Ku baakiriire, bakooreka ngu bacwiremu kuhenda ekiragiro ekyabaire nikyetegyerezibwa gye kandi kitagumire. Ahabw’okurya aha kijuma bakooreka ngu bakaba batarikuha ekitiinisa Ishebo ow’omu iguru. Bakaba bataine ky’okwekwatsa kyona ahabw’eki baakozire.

12. Ahabw’enki kyabaire eky’obusaasi munonga Adamu na Haawa okugomera Yehova?

¹² Buzima ni kibi munonga okureeba ngu abazaire baitu ab’okubanza bakaremwa kworobera Omuhangi waabo! Noohurira ota waateeraho munonga kukuza gye mutabani waawe nari muhara waawe, reero bwanyima akakugomera akakora ekirikutaana n’eki omuragiire kukora? Mbwenu shi torikwehurira kubi munonga?

13. Yehova akaba naamanyisa ki obu yaagira ngu ‘noija kugaruka omu mucuucu’?

¹³ Adamu na Haawa ku baagomire, bakafeerwa omugisha gw’okutunga amagara agatahwaho. Yehova akaba agambiire Adamu ati: “Ori omucuucu, n’omu mucuucu nimwo origaruka.” (Shoma Okutandika 3:19.) Eki kikaba nikimanyisa ngu Adamu akaba naija kugaruka abe omucuucu nk’obu yaabaire atakahangirwe. (Okutandika 2:7) Adamu ku yaasiisire, akafa kandi akaba atakiriho.

14. Ahabw’enki nitufa?

¹⁴ Adamu na Haawa kuri baayorobeire Ruhanga, na hati kuri bariho. Kwonka ku baamugomeire, baashiisha, bwanyima bakarugaho baafa. Ekibi ekyo kiri nk’endwara y’akabi ei twahungwire aha bazaire baitu ab’okubanza. Twena nituzaarwa turi abasiisi, niyo nshonga ahabw’enki nitufa. (Abarooma 5:12) Kwonka ekyo tikyo Ruhanga yaabaire naayendeza abantu. Ruhanga akaba atarikwenda ngu abantu bafe, kandi Baibuli neegira ngu rufu ‘n’omuzigu.’—1 Abakorinso 15:26.

AMAZIMA NIGATUHINDURA AB’OBUSINGYE

15. Okumanya amazima agarikukwata aha kufa nikiturinda kita?

¹⁵ Twamanya amazima agarikukwata aha kufa nigaturinda enyegyesa zigwire. Baibuli neeyegyesa ngu abafu tibarikushaasha kandi tibaine naku. Titurikubaasa kugamba nabo, kandi nabo tibarikubaasa kugamba naitwe. Titurikubaasa kubahwera kandi nabo tibarikubaasa kutuhwera. Tibarikubaasa kutukora kubi, n’ahabw’ekyo titushemereire kubatiina. Kwonka ediini nyingi nizeegyesa ngu abafu haine ahu bari bahuriire, kandi ngu nitubaasa kubahwera twaha esente abeebembezi b’ediini nari abarikutwarwa nk’abarikwera. Kwonka twaba nitumanya amazima agarikukwata aha kufa titurikubaasa kubeihwabeihwa.

16. Amadiini maingi nigeegyesa ki aha bafu?

¹⁶ Sitaane naakoresa amadiini g’ebishuba kubeihabeiha abantu ngu abafu bahuriire. Nk’eky’okureeberaho, amadiini agamwe nigeegyesa ngu ku turikufa haine ekirikuturugamu kikaguma kihuriire. Ediini ei orimu neeyegyesa etyo, nari neekwegyesa eki Baibuli erikugamba aha bafu? Sitaane naakoresa ebishuba kwiha abantu ahari Yehova.

17. Ahabw’enki enyegyesa y’okwotsya abantu omu muriro gutaraara erikugwisa kubi Yehova?

¹⁷ Ebi amadiini maingi garikwegyesa nibitiinisa. Nk’eky’okureeberaho, agamwe nigeegyesa ngu abantu babi nibaija kuguma nibookibwa omu muriro ebiro byona. Ekishuba ekyo nikikora kubi Yehova. Tarikubaasa kwikiriza abantu kubonabona omu muringo nk’ogwo! (Shoma 1 Yohaana 4:8.) Noobaasa kutwara ota omuntu orikufubira omwana we arikumwotsya emikono omu muriro? Buzima nooteekateeka ngu ni mubi munonga. Kandi nooba otarikwenda n’okumanya ebirikumukwataho. Kandi buzima okwo nikwo Sitaane arikwenda ngu abantu bareebe Yehova!

18. Ahabw’enki tutashemereire kutiina abafu?

¹⁸ Ediini ezimwe nizeegyesa ngu abantu ku barikufa, nibahinduka emyoyo. Amadiini nk’ago, nigeegyesa ngu emyoyo y’abafu twine kugiha ekitiinisa kandi tukagitiina, ngu ahabw’okuba neebaasa kuhinduka banywani baitu nari abazigu baitu. Abantu baingi nibaikiriza ekishuba eki. Nibatiina abafu, n’ahabw’ekyo nibabaramya omu mwanya gw’okuramya Yehova. Ijuka ngu abafu tibarikubaasa kuhurira kintu kyona, n’ahabw’ekyo titushemereire kubatiina. Yehova niwe Muhangi waitu. Ni Ruhanga ow’amazima, kandi niwe wenka ou tushemereire kuramya.—Okushuuruurwa 4:11.

19. Okumanya amazima agarikukwata aha bafu nikituhwera kita?

¹⁹ Okumanya amazima agarikukwata aha bafu nikuturinda obutahabisibwa ebishuba by’ediini. Kandi amazima aga nigatuhwera kwetegyereza gye eki Yehova arikuturaganisa n’eki arikuraganisa aha biro by’omumaisho.

20. Nituza kwega ki omu shuura erikukurataho?

²⁰ Ira munonga, Yobu omuheereza wa Ruhanga akabuuza ati: “Omuntu ku afa, agaruka abaho?” (Yobu 14:14) Mbwenu shi buzima nikibaasika omuntu ofiire kugaruka akabaho? Eky’okugarukamu eki Ruhanga arikutuha omu Baibuli nikihuumuriza munonga. Nitwija kukireeba omu shuura erikukurataho.

1-3. Turi mu kihome ki, kandi Yehova naija kutukomorora ata?

KA TUGIRE ngu oteirwe omu kihome ahabw’omushango ogu otarakozire. Tihariho mugisha gwona ogw’okurekurwa. Toine matsiko goona aha biro byawe by’omumaisho, kandi tihaine eki orikubaasa kukora kuruga omu kihome. Kwonka okiba ori aho otaine amatsiko, omanya ngu hariho omuntu oine amaani g’okukwiha omu kihome kandi araganiise kukuhwera. Okaayehurira ota?

² Twena turi nk’abari omu kihome ky’okufa. N’obu turikuteeraho munonga, titurikubaasa kuhunga okufa. Kwonka Yehova aine amaani g’okutwiha omu kufa. Kandi araganiise ati: “Omuzigu orihererukayo kwihwaho ni rufu.”—1 Abakorinso 15:26.

³ Teekateeka oburuhuuko obu orikwija kutunga waaba otarikwerarikirira ngu noija kufa. Yehova naija kwihaho okufa, kandi azoore n’abaafiire. Teekateeka aha ku ekyo kirikwija kukugasira. Naaraganisa ngu abafu nibaija kugaruka babe abahuriire. (Isaaya 26:19) Eki Baibuli neekyeta okuzooka.

OMUKUNDWA KU ARIKUFA

4. (a) Niki ekirikubaasa kutuhuumuriza twafeerwa omunyabuzaare nari omukundwa? (b) Ni baahi abaabaire banywani ba Yesu?

⁴ Ku turikufeerwa omunyabuzaare, nari omunywani, nitugira obusaasi, n’amaganya ebirikureebeka nk’ebitarikubaasa kwemerwa. Nitwehurira nk’abataine buhwezi bwona. Tihaine eki turikubaasa kukora kugaruraho omuntu ofiire. Kwonka Baibuli neetuha okuhuumurizibwa okwabuzima. (Shoma 2 Abakorinso 1:3, 4.) Ka tureebe eky’okureeberaho ekirikworeka ngu Yehova na Yesu nibendera kimwe kuzoora abakundwa baitu abaafiire. Obu Yesu yaabaire ari omu nsi, akaba akira kutaayaayira Laazaaro na banyaanya, Mariamu na Mariza. Bonshatu bakaba bari banywani ba Yesu. Baibuli neegira eti: “Yesu akaba akunda Mariza n’omurumuna na Laazaaro.” Kwonka eizooba rimwe Laazaaro akafa.—Yohaana 11:3-5.

5, 6. (a) Yesu akatwaza ata obu yaabaire ari n’abanyabuzaare ba Laazaaro nibarira? (b) Ahabw’enki nikigaruramu amaani kumanya oku Yesu yaabaire naatwara okufa?

⁵ Yesu akaza kuhuumuriza Mariza na Mariamu. Mariza ku yaahuriire ngu Yesu ariyo naija, akashohora aheeru y’orurembo kumubugana. Akashemererwa kureeba Yesu, kwonka akagira ati: “Kuri obaire ori aha, munyaanyazi takufiire.” Mariza akateekateeka ngu Yesu akaija akyerereirwe. Bwanyima y’ekyo, Yesu akareeba Mariamu arikurira. Ku yaareebire obusaasi bwabo, nawe akagira obusaasi yaarira. (Yohaana 11:21, 33, 35) Akagira obusaasi obu turikugira twafeerwa omuntu ou turikukunda.

⁶ Okumanya ngu Yesu nawe naagira obusaasi omuntu ku arikufa, nikitugaruramu amaani. Kandi Yesu ari nka Ishe Yehova. (Yohaana 14:9) Yehova aine amaani g’okwihiraho kimwe okufa, kandi eki nikyo arikwija kukora juba.

“LAAZAARO, SHOHORA, OIJE!”

7, 8. Ahabw’enki Mariza yaabaire atarikwenda ngu baihe eibaare aha kituuro kya Laazaaro, kwonka Yesu akakora ki?

⁷ Obu Yesu yaahika aha kituuro kya Laazaaro, kikaba kikingireho eibaare rihango. Yesu akagira ati: “Mwiheho eibaare.” Kwonka Mariza akaba atarikwenda ngu bariiheho. Omutumbi gwa Laazaaro gukaba gumazire ebiro bina omu kituuro. (Yohaana 11:39) Akaba atarikumanya eki Yesu yaabaire ari haihi kukora kuhwera munyaanya.

⁸ Yesu akeeta Laazaaro ati: “Shohora, oije.” Eki Mariza na Mariamu baareebire kikaba nikitangaaza. ‘Omushaija owaabaire afiire akashohora, azingazingirwe omu myenda emikono n’amaguru.’ (Yohaana 11:43, 44) Laazaaro akazoorwa yaagaruka yaaba ohuriire. Akagaruka yaaba hamwe n’abanyabuzaare be na banywani be. Bakaba nibabaasa kumukwataho, kandi bakagamba nawe. Ka kyabaire kiri eky’okutangaaza ky’amaani! Ahakuba Yesu akaba yaaheza kuzoora Laazaaro.

“MWISHIKI ‘WE, NINKUGAMBIRA NTI: IMUKA”

9, 10. (a) N’oha owaahaire Yesu amaani g’okuzoora abantu? (b) Ahabw’enki ebyahandiikirwe ebirikukwata aha kuzooka biri eby’omuhendo ahariitwe?

⁹ Mbwenu shi Yesu akazoora abantu arikukoresa amaani ge? Ngaaha. Yesu atakazoire Laazaaro, akashaba Yehova, kandi Yehova akamuha amaani g’okumuzoora. (Shoma Yohaana 11:41, 42.) Laazaaro tiwe wenka owaazoirwe. Baibuli neegamba aha mwishiki w’emyaka 12 owaabaire arwaire munonga. Ishe orikwetwa Yairo akaba atarikumanya eky’okukora, kandi akeeshengyereza Yesu kumukiza. Niwe mwana wenka ou yaabaire aine. Ku yaabaire naagamba na Yesu, abashaija baija baamugira bati: “Muhara waawe yaakaba; nooruhiza ki omwegyesa?” Kwonka Yesu akagira ati: “Otatiina, ikiriza kwonka.” Bwanyima akagyenda na Yairo omu ka ye. Ku baahikire haihi n’enju, Yesu akaba naabaasa kuhurira abantu nibarira kandi arikubareeba. Yesu akabagira ati: “Mutarira; ahabw’okuba tafiire, agwejegyeire.” Ishe na nyina nibabaasa kuba baayebuurize eki Yesu yaabaire naamanyisa. Yesu akashaba buri omwe kuruga omu nju, reero yaataaha omu kishengye ari n’abazaire b’omwishiki ahu omwishiki yaabaire arambiire. Yesu akakwata omukono gw’omwishiki, reero yaamugira ati: “Mwishiki ‘we, ninkugambira nti: Imuka.” Teekateeka aha kushemererwa kw’abazaire be, omwishiki ku yaayemereire akatandika kugyenda. Yesu akazoora muhara waabo. (Mako 5:22-24, 35-42; Luka 8:49-56) Kuruga obwo, ku baabaire bareeba muhara waabo, bakaba baijuka eki Yehova yaabakoreire kurabira omuri Yesu.a

¹⁰ N’eky’amazima, abu Yesu yaazoire bakagaruka baafa. Kwonka ebirikubakwataho n’eby’omuhendo, ahakuba nibituha amatsiko. Yehova aine ekyetengo ky’okuzoora abantu, kandi buzima naija kubazoora.

EKI TURIKWEGA OMU BYAHANDIIKIRWE EBIRIKUGAMBA AHA KUZOOKA

11. Ebiri omu Omubuurizi 9:5 nibitwegyesa ki ahari Laazaaro?

¹¹ Baibuli neeyoreka gye ngu ‘abaafiire tibaine eki barikumanya.’ Obu Laazaaro yaabaire afiire nikwo yaabaire ari atyo. (Omubuurizi 9:5) Nk’oku Yesu yaagizire, Laazaaro akaba ari nk’ogwejegyeire. (Yohaana 11:11) Obu Laazaaro yaabaire ari omu kituuro, akaba ‘ataine eki arikumanya.’

12. Nitumanya tuta ngu buzima Laazaaro akazooka?

¹² Obu Yesu yaazoora Laazaaro, abantu baingi bakakireeba. Nangwa n’abazigu ba Yesu bakaba nibamanya ngu akakora eky’okutangaaza eki. Ahakuba bakaba nibareeba Laazaaro ahuriire, kandi eki kikaba nikihamya ngu buzima akazooka. (Yohaana 11:47) Kandi, abantu baingi bakaza kureeba Laazaaro, n’ekyarugiremu bakatandika kwikiriza ngu Yesu akaba ayohereziibwe Ruhanga. Abazigu ba Yesu ekyo tibarakikunzire, n’ahabw’ekyo bakacuma enaama y’okwita Yesu na Laazaaro.—Yohaana 11:53; 12:9-11.

13. Niki ekirikutuhamiza ngu Yehova naija kuzoora abafu?

¹³ Yesu akeegyesa ngu, “abari omu bituuro boona” abarikwijukwa nibaija kurugaho nibazooka. (Yohaana 5:28) Eki nikimanyisa ngu abo boona abu Yehova arikwijuka nibaija kugaruka babe abahuriire. Kwonka Yehova kubaasa kuzoora omuntu, aine kwijuka buri kimwe ekirikukwata aha muntu ogwo. Buzima ekyo naabaasa kukikora? Omu iguru harimu obuhumbi n’obuhumbi bw’enyonyoozi. Baibuli neegira ngu Yehova naamanya eiziina rya buri nyonyoozi. (Shoma Isaaya 40:26.) Ku araabe naijuka eiziina rya buri nyonyoozi, naija kwijuka gye abakundwa baitu abaafiire, kandi naabaasa kubagarura babe abahuriire. Ekikuru munonga, Yehova niwe yaahangire buri kimwe, n’ahabw’ekyo nitumanya ngu aine amaani g’okuzoora abantu bakaba abahuriire.

14, 15. Ebigambo bya Yobu nibitwegyesa ki aha kuzooka?

¹⁴ Yobu omushaija omwesigwa akaba naikiriza ngu nihaija kubaho okuzooka. Akabuuza ati: “Omuntu ku afa, agaruka abaho?” Akagambira Yehova ati: ‘Oryanyeta kandi naanye ndyakwetaba. Naiwe noija kwetenga kureeba eki emikono yaawe yaakozire.’ Buzima, Yobu akamanya ngu Yehova aine ekihika ky’okuzoora abafu.—Yobu 14:13-15.

¹⁵ Amatsiko g’okuzooka nigakureetera kwehurira ota? Noobaasa kuba nooyebuuza oti: ‘Kwonka shi abanyabuzaare bangye na banywani bangye abaafiire, nabo nibaija kuzooka?’ Nikituhuumuriza kumanya ngu buzima Yehova naayenda kuzoora abafu. Ka tureebe eki Baibuli erikugamba aha baraazoorwe n’ahu baraatuure.

NIBAIJA ‘KUHURIRA EIRAKA RYE, BARUGYEMU’

16. Abo abaraazoorwe nibaija kutuura omu mbeera zirikushusha ki?

¹⁶ Ira, abo abaazookire bakagaruka baaba n’ab’omu maka gaabo aha, omu nsi. Eki nikiija kugaruka kubaho omu biro by’omumaisho, kwonka kirikuhita aha kya ira. Ahabw’enki? Ahabw’okuba abaraazoorwe kutuura omu nsi nibaija kutunga omugisha gw’okugumaho ebiro byona obutagaruka kufa. Ensi ei baraatuuremu neija kuba neetaanira kimwe aha y’obunaku obu. Tiharikwija kubaho ntaro, ebikorwa bibi, n’endwara.

17. Ni baahi abarikwija kuzoorwa?

¹⁷ Ni baahi abaraazoorwe? Yesu akagira ngu ‘boona abari omu bituuro abarikwijukwa nibaija kuhurira eiraka rye barugyemu.’ (Yohaana 5:28, 29) Kandi Okushuuruurwa 20:13 nihagira hati: “Enyanja yaagarura abafu abaabaire bagirimu, na rufu n’Okuzimu byagarura abafu abaabaire bariyo.” Buzima, obuhumbi n’obuhumbi bw’abantu nibaija kuzooka. Entumwa Paulo nawe akagira ati: “Haryabaho okuzooka kw’abahikiriire n’abatahikiriire.” (Shoma Ebyakozirwe 24:15.) Ekyo nikimanyisa ki?

18. ‘Abahikiriire’ abarikwija kuzooka ni baahi?

¹⁸ ‘Abahikiriire’ nibatwariramu abaheereza ba Yehova abaabaire bariho Yesu atakaizire omu nsi. Abantu nka Noa, Abrahamu, Saara, Musa, Ruusi, na Esteeri nibaija kuzooka kutuura omu nsi. Noobaasa kushoma ahari bamwe aha bashaija n’abakazi aba omu Abaheburaayo eshuura 11. Kandi shi abaheereza ba Yehova abeesigwa abarikufa omu bunaku obu? Nabo ‘n’abahikiriire,’ n’ahabw’ekyo nibaija kuzooka.

19. ‘Abatahikiriire’ ni baahi, kandi Yehova naija kubaha mugisha ki?

¹⁹ ‘Abatahikiriire’ nibatwariramu obuhumbi bw’abantu abataratungire omugisha gw’okumanya Yehova. N’obu baraabe baafiire, Yehova tabeebirwe. Naija kubazoora, kandi nibaija kutunga omugisha gw’okwega ebirikumukwataho kandi bamuheereze.

20. Ahabw’enki ti buri omwe ngu naija kuzooka?

²⁰ Eki shi nikimanyisa ngu buri muntu weena owaafiire naija kuzooka? Ngaaha. Yesu akagira ngu abantu abamwe tibarikwija kuzooka. (Luka 12:5) N’oha orikwija kucwamu yaaba omuntu araazookye nari kutazooka. Yehova niwe mucwi w’emanja omukuru, kwonka ahaire Yesu obushoboorozi “kuba omucwi w’emanja z’abahuriire n’abafiire.” (Ebyakozirwe 10:42) Buri omwe oraacwerwe orubanja nk’omugomi, kandi atarikwenda kuhinduraho tarikwija kuzoorwa.—Reeba Ebirikukiraho 19.

ABARIKUZOOKA KUZA OMU IGURU

21, 22. (a) Nikimanyisa ki okuzooka kuza omu iguru? (b) N’oha owaabandize kuzooka kuza omu iguru?

²¹ Baibuli neetugambira aha bantu abarikwija kutuura omu iguru. Omuntu ku arikuzooka kuza omu iguru, tarikuzoorwa aine omubiri gw’abantu. Naazoorwa kutuura omu iguru aine omubiri gw’omwoyo.

²² Yesu niwe muntu w’okubanza kuzooka omu kuzooka okw’omuringo ogu. (Yohaana 3:13) Ku haahingwireho ebiro bishatu Yesu aherize kwitwa, Yehova akamuzoora. (Zaaburi 16:10; Ebyakozirwe 13:34, 35) Yesu, tarazookire n’omubiri gw’abantu. Entumwa Petero naashoboorora ngu Yesu ‘akaitwa omu mubiri, kwonka yaahindurwa ohuriire omu mwoyo.’ (1 Petero 3:18) Yesu akagaruka yaaba ohuriire nk’ekihangirwe ky’omwoyo eky’amaani! (1 Abakorinso 15:3-6) Kwonka Baibuli neegira ngu tiwe wenka orikwija kutuura omu iguru.

23, 24. ‘Ab’obusyo obukye’ abu Yesu yaagambireho ni baahi, kandi nibaija kuhika bangahi?

²³ Yesu atakafiire, akagambira abeegi be abeesigwa ati: “Ninza kubashemereza omwanya.” (Yohaana 14:2) Eki nikimanyisa ngu bamwe aha bakuratsi be bakaba nibaija kuzooka kutuura nawe omu iguru. Ni bangahi? Yesu akabeeta “obusyo obukye.” (Luka 12:32) Entumwa Yohaana akaha omuhendo gwenyine obu yaareeba Yesu “ayemereire aha rushozi Saayuuni [omu iguru] hamwe n’abantu” 144,000.—Okushuuruurwa 14:1.

²⁴ Abakristaayo 144,000 bakaba nibaija kuzoorwa ryari? Baibuli neetugambira ngu eki kikaabaireho Kristo yaatandika kutegyeka omu iguru. (1 Abakorinso 15:23) Hati turi omu bunaku obu, kandi baingi aha 144,000 baazookire kuza omu iguru. Abo abakiri omu nsi abarikufa omu bwire obu nibazooka ahonaaho baza omu iguru. Kwonka, abantu abarikukira obwingi nibaija kuzooka omu biro by’omumaisho kutuura omu Paradiso omu nsi.

25. Nituza kwega ahari ki omu shuura erikukurataho?

²⁵ Juba, Yehova naija kucungura abantu okufa, kandi rufu neija kurugiraho kimwe! (Shoma Isaaya 25:8.) Kwonka shi abarikuzooka kuza omu iguru nibaija kukorayo ki? Baibuli neeshoboorora ngu nibaija kutegyeka omu Bukama bw’omu iguru. Nitwija kwega ebirikukiraho aha butegyeki obwo omu shuura erikukurataho.